ಪ್ರಶಾಂತ್​ ಕಿಶೋರ್​ ಪಕ್ಷದಲ್ಲಿ ಆಂತರಿಕ ಬಿಕ್ಕಟ್ಟು; ರಾಜ್ಯ ಕೋರ್​ ಕಮಿಟಿ ಹುದ್ದೆಗೆ ಇಬ್ಬರ ರಾಜೀನಾಮೆ

ಜನ್ ಸುರಾಜ್ ಪಕ್ಷದಲ್ಲಿನ ಆಂತರಿಕ ಬಿಕ್ಕಟ್ಟಿನಿಂದಾಗಿ ಮಾಜಿ ಕೇಂದ್ರ ಸಚಿವ ದೇವೇಂದ್ರ ಪ್ರಸಾದ್​ ಯಾದವ್​ ಮತ್ತು ಮಾಜಿ ಸಂಸದ ಎಂ.ಹಸನ್ ಅವರು​ ರಾಜ್ಯ ಕೋರ್​ ಕಮಿಟಿ ಹುದ್ದೆಗೆ ರಾಜೀನಾಮೆ ಸಲ್ಲಿಸಿದ್ದಾರೆ.

ಪಾಟ್ನಾ(ಬಿಹಾರ್): ಹಲವು ಚುನಾವಣೆಗಳ ಗೆಲುವಿಗೆ ತಂತ್ರಗಾರಿಕೆ ಹೆಣೆದು 'ಚುನಾವಣಾ ಪರಿಣತ' ಎಂದೇ ಗುರುತಿಸಿಕೊಂಡಿದ್ದ ಪ್ರಶಾಂತ್​ ಕಿಶೋರ್​ ಅವರ ಜನ ಸುರಾಜ್‌ ಪಕ್ಷದಲ್ಲಿ ಮುಸುಕಿನ ಗುದ್ದಾಟ ಶುರುವಾಗಿದೆ. ಪಕ್ಷದ ಇಬ್ಬರು ಪ್ರಮುಖ ನಾಯಕರು ಪ್ರಮುಖ ಹುದ್ದೆಗಳಿಂದ ಕೆಳಗಿಳಿದಿದ್ದಾರೆ.

ಮಾಜಿ ಕೇಂದ್ರ ಸಚಿವ ದೇವೇಂದ್ರ ಪ್ರಸಾದ್​ ಯಾದವ್​ ಮತ್ತು ಮಾಜಿ ಸಂಸದ ಎಂ.ಹಸನ್ ಅವರು​ 125 ಸದಸ್ಯರ ರಾಜ್ಯ ಕೋರ್​ ಕಮಿಟಿಯಿಂದ ಹೊರ ಬಂದಿದ್ದಾರೆ. ಅನಿವಾರ್ಯ ಕಾರಣಗಳಿಂದ ಹುದ್ದೆ ತೊರೆಯುತ್ತಿರುವುದಾಗಿ ಇಬ್ಬರೂ ತಿಳಿಸಿದ್ದು, ವಿವರವಾದ ಮಾಹಿತಿ ನೀಡಲು ನಿರಾಕರಿಸಿದ್ದಾರೆ.

ದೇವೇಂದ್ರ ಪ್ರಸಾದ್​ ಯಾದವ್ ಪ್ರತಿಕ್ರಿಯಿಸಿ​, ನಾನು ಸ್ವಯಂ ಇಚ್ಛೆಯಿಂದ ರಾಜ್ಯ ಕೋರ್​ ಕಮಿಟಿ ಸ್ಥಾನಕ್ಕೆ ರಾಜೀನಾಮೆ ಸಲ್ಲಿಸುತ್ತಿದ್ದೇನೆ ಎಂದು ತಿಳಿಸಿದ್ದಾರೆ. ಹಸನ್​ ಕೂಡ ಇದೇ ಕಾರಣ ನೀಡಿದ್ದು, ನಮ್ಮ ರಾಜೀನಾಮೆ ಪತ್ರವನ್ನು ಸ್ವೀಕರಿಸಬೇಕು ಎಂದಿದ್ದಾರೆ. ಅಲ್ಲದೇ, ತಕ್ಷಣಕ್ಕೆ ಪಕ್ಷ ತೊರೆಯುವ ಯಾವುದೇ ಯೋಚನೆಯಿಲ್ಲ ಎಂದೂ ಹೇಳಿದ್ದಾರೆ.

ಹಸನ್​ ಮತ್ತು ಯಾದವ್ ಅವರ ಪಕ್ಷ ಸೇರ್ಪಡೆಯಿಂದ ಪ್ರಶಾಂತ್​ ಕಿಶೋರ್​ ಮುಸ್ಲಿಂ ಮತ್ತು ಯಾದವ್​ ಮತಗಳನ್ನು ಪಡೆಯುವ ಗುರಿ ಹೊಂದಿದ್ದರು. ಆದರೆ, ಇದೀಗ ಅವರ ರಾಜೀನಾಮೆ ಪಕ್ಷಕ್ಕೆ ಹಿನ್ನಡೆಯಾಗಲಿದೆ ಎಂಬ ಮಾತುಗಳು ಕೇಳಿ ಬಂದಿವೆ.

ಇತ್ತೀಚಿಗೆ ನಡೆದ ಬಿಹಾರ ಉಪ ಚುನಾವಣೆಯಲ್ಲೂ ನಾಲ್ಕು ಕ್ಷೇತ್ರಗಳಲ್ಲಿ ಸೋಲು ಕಾಣುವ ಮೂಲಕ ಪ್ರಶಾಂತ್ ಕಿಶೋರ್​ ಪಕ್ಷ ತೀವ್ರ ಹಿನ್ನಡೆ ಕಂಡಿತ್ತು. ರಾಮಗಢ, ತರಾರಿ ಮತ್ತು ಬೆಲಗಂಜ್​ ಕ್ಷೇತ್ರದಲ್ಲಿ ಪಕ್ಷ ಹೀನಾಯ ಸೋಲುಂಡಿತ್ತು. ಇಮ್ಮಗಂಜ್​ನಲ್ಲಿ ಪಕ್ಷ ಠೇವಣಿ ಉಳಿಸಿಕೊಂಡಿತ್ತು.(ಐಎಎನ್​ಎಸ್​)

ಇದನ್ನೂ ಓದಿ: ಲೋಕಸಭೆಯಲ್ಲಿ 'ಒಂದು ದೇಶ, ಒಂದು ಚುನಾವಣೆ' ವಿಧೇಯಕ ಮಂಡಿಸಿದ ಕೇಂದ್ರ ಸರ್ಕಾರ