ಛತ್ರಪತಿ ಸಂಭಾಜಿನಗರ, ಮಹಾರಾಷ್ಟ್ರ: ಕಲ್ಸುಬಾಯಿ ಶಿಖರವು ಮಹಾರಾಷ್ಟ್ರದ ಅತ್ಯುನ್ನತ ಶಿಖರ ಎಂದು ಕರೆಯಲ್ಪಡುತ್ತದೆ. ಈ ಶಿಖರವನ್ನು ಹತ್ತುವುದು ಎಂತಹವರಿಗೂ ಸವಾಲಿನ ಸಂಗತಿಯೇ ಸರಿ. ಪ್ರತಿ ವರ್ಷ ಹೆಚ್ಚಿನ ಸಂಖ್ಯೆಯಲ್ಲಿ ಇಲ್ಲಿ ಶಿಖರಾರೋಹಣದ ಪ್ರೇಮಿಗಳು ಈ ಪರ್ವತಕ್ಕೆ ಭೇಟಿ ಕೊಡುತ್ತಾರೆ. ಪ್ರಕೃತಿ ಪ್ರೇಮಿಗಳು ಮತ್ತು ಕಾಲೇಜು ವಿದ್ಯಾರ್ಥಿಗಳು ಈ ಶಿಖರವನ್ನು ಒಮ್ಮೆ ಏರಿ ಖುಷಿ ಪಡಲು ಬಯಸುತ್ತಾರೆ.
ಅಂದ ಹಾಗೆ, ಛತ್ರಪತಿ ಸಂಭಾಜಿನಗರ ಜಿಲ್ಲೆಯ ಪೈಠಾಣ್ ತಾಲೂಕಿನಲ್ಲಿ ಹುಟ್ಟಿ ಪೋಲಿಯೋ ಪೀಡಿತರಾಗಿ ಜನಿಸಿದ ವಿಕಲಚೇತನ ಶಿವಾಜಿ ಗಡೆ 14 ವರ್ಷಗಳ ಹಿಂದೆ ತಮ್ಮ ಹುಟ್ಟುಹಬ್ಬದ ನಿಮಿತ್ತ ಕಲ್ಸುಬಾಯಿ ಶಿಖರವನ್ನೇರುವ ಅಭಿಯಾನ ಆರಂಭಿಸಿದ್ದರು. ಅವರು ತಮ್ಮ ಇಚ್ಛಾಶಕ್ತಿಯ ಬಲದ ಮೇಲೆ ಮಹಾರಾಷ್ಟ್ರದ ಎವರೆಸ್ಟ್ ಎಂದು ಪರಿಗಣಿಸಲಾದ ಕಲ್ಸುಬಾಯಿ ಶಿಖರವನ್ನು 20 ಬಾರಿ ಏರಿದ್ದಾರೆ. ಈ ಮೂಲಕ ಮನಸ್ಸು ಮಾಡಿದರೆ ಎಂತಹದ್ದೇ ಸಾಧನೆ ಮಾಡಬಹುದು ಎಂಬುದನ್ನು ಇವರು ತೋರಿಸಿಕೊಟ್ಟಿದ್ದಾರೆ.
ಹಲವೆಡೆ ಪ್ರವಾಸ: ಪೈಠಾಣ್ ತಾಲೂಕಿನ ವಡ್ವಾಲಿ ಗ್ರಾಮದ ಶಿವಾಜಿ ಗಡೆ ಅವರಿಗೆ ಪಾದಯಾತ್ರೆ ಹಾಗೂ ಕೋಟೆಗಳಿಗೆ ಭೇಟಿ ನೀಡುವ ಹವ್ಯಾಸವಿದೆ. ಈ ಹವ್ಯಾಸದ ಮೂಲಕ, ಅಂಗವಿಕಲರಾದರೂ ಶಿವಾಜಿ ಗಡೆ ಅವರು, ಅಕೋಲೆ ತಾಲೂಕು ಮತ್ತು ನಗರ ಜಿಲ್ಲೆಯಲ್ಲಿ ಇರುವ ಹಾಗೂ ಮಹಾರಾಷ್ಟ್ರದ ಎವರೆಸ್ಟ್ ಎಂದು ಪರಿಗಣಿಸಲಾದ 1646 ಮೀಟರ್ (5400-ಅಡಿ) ಕಲ್ಸುಬಾಯಿ ಶಿಖರವನ್ನು ಇಪ್ಪತ್ತು ಬಾರಿ ಯಶಸ್ವಿಯಾಗಿ ಏರಿದ್ದಾರೆ. ಇದೇ ನವೆಂಬರ್ 3ರ ಭಾನುವಾರದಂದು ಶಿವಾಜಿ ಗಡೆ ಅವರು ತಮ್ಮ ನಾಲ್ವರು ಸಹೋದ್ಯೋಗಿಗಳಾದ ಕಚ್ರು ಚಂಬರೆ, ಕಲ್ಯಾಣ್ ಘೋಲಾಪ್, ಸಂತೋಷ್ ಬಟುಲೆ ಮತ್ತು ಸೂರಜ್ ಬಟುಲೆ ಅವರೊಂದಿಗೆ ಈ ಸಾಧನೆ ಮಾಡಿದ್ದಾರೆ. ಕಠಿಣವಾದ ಶಿಖರವನ್ನು ಏರಿ, ಅದರ ಮೇಲೆ ಭಾರತದ ತ್ರಿವರ್ಣ ಧ್ವಜವನ್ನು ಹಾರಿಸಿ ಗಮನ ಸೆಳೆದಿದ್ದಾರೆ.
ಅಕ್ಟೋಬರ್ 10, 2010 ರಂದು ಅವರ ಜನ್ಮದಿನದ ಸಂದರ್ಭದಲ್ಲಿ ಅವರು ಮೊದಲ ಬಾರಿಗೆ ಅಂದರೆ ಈಗ್ಗೆ 14 ವರ್ಷಗಳ ಹಿಂದೆ ಕಲ್ಸುಬಾಯಿ ಶಿಖರವನ್ನು ಏರಿದ್ದರು. 20 ಬಾರಿಯ ಚಾರಣದಲ್ಲೂ ಅವರು ಒಂದೇ ದಿನಕ್ಕೆ ಪರ್ವತವನ್ನು ಏರಿ, ಇಳಿದಿದ್ದಾರೆ. ಹತ್ತು ಬಾರಿ, ಅವರು ಕಲ್ಸುಬಾಯಿ ಶಿಖರದ ತುದಿಯಲ್ಲಿ ರಾತ್ರಿ ತಂಗಿದ್ದಾರೆ. ಪರ್ವತಾರೋಹಣ, ಕೋಟೆ ಸುತ್ತಾಟದ ಹವ್ಯಾಸವನ್ನು ಬೆಳೆಸಿಕೊಂಡು ಪ್ರತಿಷ್ಠಾನದ ಮೂಲಕ ನೂರಾರು ವಿಕಲಚೇತನರನ್ನು ಕಲ್ಸುಬಾಯಿ ಶಿಖರಕ್ಕೆ ಕರೆದುಕೊಂಡು ಹೋಗಿದ್ದಾರೆ. ಇದರೊಂದಿಗೆ ಮಹಾರಾಷ್ಟ್ರದ 167 ಕೋಟೆಗಳಿಗೂ ಪ್ರಯಾಣ ಬೆಳೆಸಿದ ಕೀರ್ತಿಯನ್ನೂ ಕೂಡಾ ಇವರು ಹೊಂದಿದ್ದಾರೆ. ಈ ವಿಶಿಷ್ಟ ಪರ್ವತಾರೋಹಣ ಸಾಧನೆಗಾಗಿ ಶಿವಾಜಿ ಗಡೆಗೆ ಒಂದು ಜಾಗತಿಕ ಹಾಗೂ ಎರಡು ರಾಷ್ಟ್ರೀಯ ಮತ್ತು ಅನೇಕ ರಾಜ್ಯ ಪ್ರಶಸ್ತಿಗಳು ಒಲಿದು ಬಂದಿವೆ.
ಈ ವರ್ಷವೂ ಡಿ.31ರಂದು ರಾಜ್ಯದ ವಿಕಲಚೇತನರಿಂದ ಕಲ್ಸುಬಾಯಿ ಶಿಖರದಲ್ಲಿ ಶಕ್ತಿ ಅಭಿಯಾನ ಹಮ್ಮಿಕೊಳ್ಳಲಾಗಿದೆ ಎಂದು ಶಿವಾಜಿ ಗಡೆ ತಿಳಿಸಿದ್ದಾರೆ.
ಬ್ರಾವೋ ಇಂಟರ್ನ್ಯಾಷನಲ್ ವರ್ಲ್ಡ್ ರೆಕಾರ್ಡ್ ಪ್ರಶಸ್ತಿಯೊಂದಿಗೆ ಗೌರವ; ಶಿವಾಜಿ ಗಡೆ ಅವರು ಕುರುಡು, ಕಿವುಡ-ಮೂಕ, ದೈಹಿಕವಾಗಿ ವಿಕಲಾಂಗರಾರು ಮತ್ತು ಬಹು-ಅಂಗವಿಕಲರು ಸೇರಿದಂತೆ ವಿವಿಧ ರೀತಿಯ 400 ವಿಕಲಚೇತನರಿಗೆ ಕಲ್ಸುಬಾಯಿ ಶಿಖರವನ್ನು ತೋರಿಸಿದ್ದಕ್ಕಾಗಿ ಬ್ರಾವೋ ಇಂಟರ್ನ್ಯಾಷನಲ್ ವರ್ಲ್ಡ್ ರೆಕಾರ್ಡ್ ಪ್ರಶಸ್ತಿಯನ್ನು ಸಹ ಪಡೆದಿದ್ದಾರೆ. ಇನ್ನು ಗಡೆ ಅವರ ಈ ವಿಶಿಷ್ಟ ಸಾಧನೆಗಾಗಿ ರಾಜ್ಯದ ವಿವಿಧೆಡೆಯಿಂದ ವಿಕಲಚೇತನರು ಪ್ರಶಂಸೆ ಕೂಡಾ ವ್ಯಕ್ತಪಡಿಸಿದ್ದಾರೆ.
ಇದನ್ನು ಓದಿ: ಲಡ್ಡು ಪ್ರಸಾದ ವಿವಾದದ ಒಂದು ತಿಂಗಳ ನಂತರ ತಿರುಪತಿ ದೇವಸ್ಥಾನಕ್ಕೆ ಹೊಸ ಅಧ್ಯಕ್ಷರ ನೇಮಕ
