ಚೆನ್ನೈ (ತಮಿಳುನಾಡು): ಮಾನವ ಮೆದುಳಿನ ಮೇಲೆ ಸಂಶೋಧನೆ ನಡೆಸುತ್ತಿರುವ ಐಐಟಿ ಮದ್ರಾಸ್ನ ಸುಧಾ ಗೋಪಾಲಕೃಷ್ಣನ್ ಬ್ರೈನ್ ಸೆಂಟರ್‌ನ ಸಂಶೋಧನಾ ಕೇಂದ್ರಕ್ಕೆ, ಕೆನಡಾದ ಪ್ರಮುಖ ಹಣಕಾಸು ಕಂಪನಿಯಾದ ಫೇರ್ಫ್ಯಾಕ್ಸ್ ಫೈನಾನ್ಶಿಯಲ್ ಹೋಲ್ಡಿಂಗ್ಸ್ ಲಿಮಿಟೆಡ್ನ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಪ್ರೇಮ್ ವಾತ್ಸಾ ನೆರವಿನ ಹಸ್ತ ಚಾಚಿದ್ದಾರೆ.
ಸುಧಾ ಗೋಪಾಲಕೃಷ್ಣನ್ ಬ್ರೈನ್ ಸೆಂಟರ್ನಲ್ಲಿ ನಡೆಯುತ್ತಿರುವ ಸಂಶೋಧನೆಗಳು ಮೇಲ್ದರ್ಜೆಯಿಂದ ಕೂಡಿವೆ. ಮಾನವ ಮೆದುಳಿನ ದತ್ತಾಂಶ, ವೈಜ್ಞಾನಿಕ ಸಂಶೋಧನೆ ಮತ್ತು ತಾಂತ್ರಿಕ ಸಾಧನಗಳನ್ನು ಇಲ್ಲಿ ಉತ್ಪಾದಿಸಲಾಗುತ್ತಿದೆ. ಇದನ್ನು ಮೆಚ್ಚಿಕೊಂಡಿರುವ ಪ್ರೇಮ್ ವಾತ್ಸಾ ಅವರು ಸಂಶೋಧನೆಗೆ ನೆರವಾಗಲು 5 ಮಿಲಿಯನ್ ಅಮೆರಿಕನ್ ಡಾಲರ್ (ಸುಮಾರು 41 ಕೋಟಿ ರೂ.) ಹಣಕಾಸಿನ ನೆರವು ಘೋಷಿಸಿದ್ದಾರೆ.
ಐಐಟಿ ಮದ್ರಾಸ್ನ ಹಳೆ ವಿದ್ಯಾರ್ಥಿಯೂ ಆಗಿರುವ ಪ್ರೇಮ್ ವಾತ್ಸಾ ಅವರು ಕೆನಡಾದಲ್ಲಿ ಹಣಕಾಸು ವ್ಯವಹಾರಗಳ ಕಂಪನಿಯಾದ ಫೇರ್ಫ್ಯಾಕ್ಸ್ ಫೈನಾನ್ಶಿಯಲ್ ಹೋಲ್ಡಿಂಗ್ಸ್ ಲಿಮಿಟೆಡ್ ಅನ್ನು ಸ್ಥಾಪಿಸಿದ್ದಾರೆ. 1971ರಲ್ಲಿ ಅವರು ಐಐಟಿ ಮದ್ರಾಸ್‌ನಿಂದ ಕೆಮಿಕಲ್ ಇಂಜಿನಿಯರಿಂಗ್‌ನಲ್ಲಿ ಪದವಿ ಪಡೆದಿದ್ದರು. ಜೊತೆಗೆ ಅವರಿಗೆ 1999ರಲ್ಲಿ ಡಿಸ್ಟಿಂಗ್ವಿಶ್ಡ್ ಅಲುಮ್ನಸ್ ಪ್ರಶಸ್ತಿಯನ್ನು ನೀಡಲಾಗಿದೆ.
ಸಂಶೋಧನೆ ಕಾರ್ಯಕ್ಕೆ ಮೆಚ್ಚುಗೆ: ಈ ಕೇಂದ್ರದಲ್ಲಿ ನಡೆಯುತ್ತಿರುವ ಸಂಶೋಧನೆಯನ್ನು ಶ್ಲಾಘಿಸಿದ ಪ್ರೇಮ್ ವಾತ್ಸಾ ಅವರು, ಐಐಟಿ ಮದ್ರಾಸ್ನ ಸುಧಾ ಗೋಪಾಲಕೃಷ್ಣನ್ ಬ್ರೈನ್ ಸೆಂಟರ್‌ನಲ್ಲಿನ ಕೆಲಸದ ಗುಣಮಟ್ಟ ಮತ್ತು ತಂಡದ ಬದ್ಧತೆ ನಿಜವಾಗಿಯೂ ಅತ್ಯುತ್ತಮವಾಗಿದೆ. ಮಾನವ ಮೆದುಳಿನ ಅಪರೂಪದ ಸಂಶೋಧನೆಗಳನ್ನು ನಡೆಸುತ್ತಿದೆ. ಇದು ಮೆದುಳಿನ ಬಗ್ಗೆ ಹೆಚ್ಚಿನ ಜ್ಞಾನವನ್ನು ಬಿತ್ತರಿಸುವ ಜೊತೆಗೆ, ದೂರಗಾಮಿ ಪರಿಣಾಮವನ್ನು ಹೊಂದಿದೆ. ಇದು ಮೆದುಳಿನ ಕಾಯಿಲೆಗಳಿಗೆ ಪರಿಹಾರಗಳನ್ನು ರೂಪಿಸುವುದಕ್ಕೂ ನೆರವು ನೀಡಲಿದೆ ಎಂದು ಹೇಳಿದ್ದಾರೆ.
ವಿಶ್ವದ ವಿವಿಧ ಕ್ಷೇತ್ರಗಳಲ್ಲಿ ಮೆದುಳಿನ ಸಂಶೋಧಕರೊಂದಿಗೆ ನಿಕಟ ಸಹಯೋಗದೊಂದಿಗೆ ಈ ಕೇಂದ್ರದ ಸಿಬ್ಬಂದಿ ಕೆಲಸ ಮಾಡುತ್ತಿದ್ದಾರೆ. ಈ ಮಹತ್ಕಾರ್ಯವನ್ನು ಫೇರ್ಫ್ಯಾಕ್ಸ್ ಬೆಂಬಲಿಸುತ್ತದೆ. ಸಂಸ್ಥೆ ದೊಡ್ಡ ಮಟ್ಟದಲ್ಲಿ ಯಶಸ್ಸು ಸಾಧಿಸಲಿ ಎಂದು ಪ್ರೇಮ್ ವಾತ್ಸಾ ಕೋರಿದ್ದಾರೆ.
ಕೇಂದ್ರದ ವಿಶೇಷತೆ ಏನು?: ಮಾನವ ಮೆದುಳಿನ ದತ್ತಾಂಶಗಳು, ವೈಜ್ಞಾನಿಕ ಸಂಶೋಧನೆ, ತಾಂತ್ರಿಕ ಸಾಧನಗಳನ್ನು ಕ್ರೋಢೀಕರಿಸುವ ಮೂಲಕ ಮಾನವನ ಮೆದುಳಿನ ಬಗ್ಗೆ ಹೆಚ್ಚಿನ ಅಧ್ಯಯನ ನಡೆಸಲು ಮತ್ತು ಜಾಗತಿಕವಾಗಿ ಮೆದುಳಿನ ಸಮಸ್ಯೆಗಳ ಬಗ್ಗೆ ನಡೆಯುವ ಸಂಶೋಧನೆಗಳಿಗೆ ಶಕ್ತಿ ತುಂಬಲು ಸುಧಾ ಗೋಪಾಲಕೃಷ್ಣನ್ ಬ್ರೈನ್ ಸೆಂಟರ್ ಅನ್ನು 2022 ರಲ್ಲಿ ಪ್ರಾರಂಭಿಸಲಾಯಿತು.
ಇಲ್ಲಿ ಈವರೆಗೆ ಹಲವಾರು ಸಂಶೋಧನೆಗಳು ನಡೆದಿವೆ. ವಿಶ್ವ ದರ್ಜೆಯ ಹೈಥ್ರೂಪುಟ್ ಹಿಸ್ಟಾಲಜಿ ಪೈಪ್‌ಲೈನ್ ಅಭಿವೃದ್ಧಿಪಡಿಸಲಾಗಿದೆ. ಅದು ಇಡೀ ಮಾನವ ಮೆದುಳನ್ನು ಪೆಟಾಬೈಟ್ ಸ್ಕೇಲ್‌ನಲ್ಲಿ ಹೆಚ್ಚಿನ ರೆಸಲ್ಯೂಶನ್ ಡಿಜಿಟಲ್ ಚಿತ್ರಗಳಲ್ಲಿ ಸೆರೆಹಿಡಿಯಲಾಗಿದೆ. ಈ ದತ್ತಾಂಶದ ಆಧಾರದ ಮೇಲೆ ಜಾಗತಿಕವಾಗಿ ನರವಿಜ್ಞಾನ ತಜ್ಞರು ಅಧ್ಯಯನ ಮಾಡುತ್ತಾರೆ.
ಇದನ್ನೂ ಓದಿ: ಮಹಿಳಾ ಆಯೋಗಕ್ಕೆ ರಾಶಿ ರಾಶಿ ದೂರು: ಉತ್ತರ ಪ್ರದೇಶದಲ್ಲಿ ಅತಿಹೆಚ್ಚು, ಕರ್ನಾಟಕದಲ್ಲಿ ಎಷ್ಟು? - Womens Complaints Data
