ನವದೆಹಲಿ: ಚಾರ್ಟರ್ಡ್ ಅಕೌಂಟೆಂಟ್ಸ್ (ಸಿಎ) ಪರೀಕ್ಷೆಗಳನ್ನು ಮುಂದೂಡಬೇಕೆಂಬ ಮನವಿಯನ್ನು ದೆಹಲಿ ಹೈಕೋರ್ಟ್ ಇಂದು (ಏಪ್ರಿಲ್ 8) ವಜಾಗೊಳಿಸಿತು. ಮೇ 2024ರಲ್ಲಿ ನಡೆಯಲಿರುವ ಸಿಎ ಪರೀಕ್ಷೆಗಳನ್ನು ಮುಂದೂಡುವಂತೆ ಇನ್ಸ್ಟಿಟ್ಯೂಟ್ ಆಫ್ ಚಾರ್ಟರ್ಡ್ ಅಕೌಂಟೆಂಟ್ಸ್ (ಐಸಿಎಐ) ಗೆ ಆದೇಶಿಸಬೇಕೆಂದು ಕೋರಿ ಕೆಲ ಸಿಎ ಆಕಾಂಕ್ಷಿಗಳು ನ್ಯಾಯಾಲಯದ ಮೊರೆ ಹೋಗಿದ್ದರು.
"ಈ ವಿನಂತಿಯನ್ನು ನೋಡಿ ನಮಗೆ ಆಶ್ಚರ್ಯವಾಗುತ್ತಿದೆ. ಯಾವುದೇ ರೀತಿಯಿಂದ ನೋಡಿದರೂ ಈ ಅರ್ಜಿಯಲ್ಲಿ ಯಾವುದೇ ಹುರುಳಿಲ್ಲ ಎಂಬುದು ಮೇಲ್ನೋಟಕ್ಕೆ ಸ್ಪಷ್ಟವಾಗಿದೆ." ಎಂದು ವಿಚಾರಣೆಯ ಸಂದರ್ಭದಲ್ಲಿ ನ್ಯಾಯಾಲಯ ಹೇಳಿತು. ಯಾವುದೇ ಸಿಎ ಪರೀಕ್ಷೆಯು ಮತದಾನದ ದಿನಾಂಕದಂದು ನಡೆಯುತ್ತಿಲ್ಲ. ವಿದ್ಯಾರ್ಥಿಗಳು ತಮ್ಮ ಮತ ಚಲಾಯಿಸಲು ಬಯಸಿದರೆ ಅದಕ್ಕೆ ತಕ್ಕಂತೆ ತಮ್ಮ ಸಿದ್ಧತೆಗಳನ್ನು ಸಮತೋಲನಗೊಳಿಸಿಕೊಳ್ಳಬೇಕೆಂದು ನ್ಯಾಯಾಲಯ ತಿಳಿಸಿತು.
ಐಸಿಎಐ ಬಿಡುಗಡೆ ಮಾಡಿದ ಪರಿಷ್ಕೃತ ಪರೀಕ್ಷಾ ವೇಳಾಪಟ್ಟಿಯ ಪ್ರಕಾರ, ಸಿಎ ಇಂಟರ್ ಮೀಡಿಯೆಟ್ ಗ್ರೂಪ್ 1ರ ಪರೀಕ್ಷೆ ಮೇ 7 ರ ಬದಲು ಮೇ 3, 5 ಮತ್ತು 9 ರಂದು ನಡೆಯಲಿದ್ದು, ಗ್ರೂಪ್ 2 ರ ಪರೀಕ್ಷೆ ಮೇ 9, 11 ಮತ್ತು 13 ರ ಬದಲು ಮೇ 11, 15 ಮತ್ತು 17 ರಂದು ನಡೆಯಲಿದೆ. ಅಂತಿಮ ಗುಂಪು 1 ಪರೀಕ್ಷೆಯನ್ನು ಮೇ 6 ರ ಬದಲು ಮೇ 2, 4 ಮತ್ತು 8 ರಂದು ನಡೆಸಲಾಗುವುದು. ಸಿಎ ಅಂತಿಮ ಗ್ರೂಪ್ 2 ಪರೀಕ್ಷೆಯು ಮೇ 8, 10 ಮತ್ತು 12 ರ ಬದಲು ಮೇ 10, 14 ಮತ್ತು 16 ರಂದು ನಡೆಯಲಿದೆ. ಫೌಂಡೇಶನ್ ಹಂತದ ಸಿಎ ಪರೀಕ್ಷೆ ಜೂನ್ 20, 22, 24 ಮತ್ತು 26 ರಂದು ನಡೆಯಲಿದೆ.
ಆದಾಗ್ಯೂ ಸಿಎ ಆಕಾಂಕ್ಷಿಗಳು ಈ ಬದಲಾವಣೆಯ ಬಗ್ಗೆ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. 2024 ರ ಮೇ ತಿಂಗಳಲ್ಲಿ ಲೋಕಸಭಾ ಚುನಾವಣೆಗಳು ಸಹ ನಿಗದಿಯಾಗಿರುವುದರಿಂದ, ಮನೆಯಿಂದ ದೂರ ವಾಸಿಸುವ ಕೆಲ ವಿದ್ಯಾರ್ಥಿಗಳು ಮತ ಚಲಾಯಿಸಲು ಮನೆಗೆ ಹಿಂತಿರುಗಲು ಸಾಧ್ಯವಾಗುವುದಿಲ್ಲ ಎಂದು ಅವರು ವಾದಿಸುತ್ತಿದ್ದಾರೆ.
ಪರೀಕ್ಷೆ ಮುಂದೂಡುವಂತೆ ನ್ಯಾಯಾಲಯಕ್ಕೆ ಅರ್ಜಿ ಸಲ್ಲಿಸಲು ಮಕ್ಕಳ ಕಾರ್ಯಕರ್ತೆ ಅನುಭಾ ಶ್ರೀವಾಸ್ತವ ಸಹಾಯ್ ಅವರು ಸಿಎ ವಿದ್ಯಾರ್ಥಿಗಳಿಗೆ ಸಹಾಯ ಮಾಡಿದ್ದರು. ಮೇ 2024ರ ಸಿಎ ಪರೀಕ್ಷೆ ಮುಂದೂಡಿಕೆಯ ಈ ಹೋರಾಟವನ್ನು ಇತರ ಕೆಲವು ಸಿಎಗಳು ಸಹ ಬೆಂಬಲಿಸಿದ್ದಾರೆ.
ಇದನ್ನೂ ಓದಿ : 17 ಮೊಮ್ಮಕ್ಕಳಿಗೆ ಒಂದೇ ಸಲಕ್ಕೆ ವಿವಾಹ ಮಾಡಿಸಿದ ತಾತ; ಬಂಧುಗಳಿಗೂ ಒಂದೇ ಆಮಂತ್ರಣ ಪತ್ರಿಕೆ! - GRANDCHILDRENS MARRIAGE
