ಅಮರಾವತಿ: ಆಂಧ್ರಪ್ರದೇಶದಲ್ಲಿ ಹೊಸ ಮದ್ಯ ನೀತಿ ಜಾರಿಯಾಗಿದೆ. ಮದ್ಯದ ನೀತಿಯಡಿ 180 ಎಂಎಲ್ ಬಾಟಲಿಯನ್ನು ಕೇವಲ 99 ರೂಪಾಯಿಗೆ ಖರೀದಿಸಬಹುದು ಎಂದು ಅಲ್ಲಿನ ಸರ್ಕಾರ ಹೇಳಿದೆ.
ಆದಾಯ ಹೆಚ್ಚಳದ ನಿರೀಕ್ಷೆಯಲ್ಲಿ ರಾಜ್ಯ ಸರ್ಕಾರ: ಹೊಸ ಮದ್ಯ ನೀತಿ ಜಾರಿಗೆ ಬಂದಿರುವುದರಿಂದ ಆಂಧ್ರಪ್ರದೇಶದ ಗ್ರಾಹಕರು ಅಗ್ಗದ ದರದಲ್ಲಿ ಮದ್ಯ ಖರೀದಿಸಲು ಸಾಧ್ಯವಾಗುತ್ತದೆ. ಸೆಪ್ಟೆಂಬರ್ 18 ರಂದು ರಾಜ್ಯ ಸಚಿವ ಸಂಪುಟ ಅಂಗೀಕರಿಸಿದ ಈ ನೀತಿಯ ಅಡಿ, ಯಾವುದೇ ಬ್ರಾಂಡ್ನ 180 ಮಿಲಿ ಮದ್ಯವನ್ನು 99 ರೂ.ಗೆ ಖರೀದಿಸಲು ಅವಕಾಶವಿದೆ. ಈ ಕ್ರಮದಿಂದ ರಾಜ್ಯ ಸರಕಾರಕ್ಕೆ 5,500 ಕೋಟಿ ಆದಾಯ ಬರುವ ನಿರೀಕ್ಷೆ ಇದೆ ಎಂದು ಅಂದಾಜಿಸಲಾಗಿದೆ.
ಹರಿಯಾಣ ಮತ್ತು ಇತರ ರಾಜ್ಯಗಳ ನೀತಿಗಳಂತೆ ಮದ್ಯದ ಮಾರಾಟದಿಂದ ಆದಾಯವನ್ನು ಹೆಚ್ಚಿಸುವ ಉದ್ದೇಶದಿಂದ ಆಂಧ್ರ ಪ್ರದೇಶ ಸರ್ಕಾರವು ಹೊಸ ಮದ್ಯ ನೀತಿಯನ್ನು ಘೋಷಿಸಿದೆ ಎಂದು ತಿಳಿದು ಬಂದಿದೆ. ರಾಜ್ಯಾದ್ಯಂತ 3,736 ಖಾಸಗಿ ಅಂಗಡಿಗಳಿಗೆ ಪರವಾನಗಿ ನೀಡಲು ಅಧಿಸೂಚನೆ ಸಹ ಹೊರಡಿಸಲಾಗಿದೆ. ಸರ್ಕಾರದ ಅಧಿಸೂಚನೆಯ ಪ್ರಕಾರ, ಭಾರತೀಯ ನಿರ್ಮಿತ ವಿದೇಶಿ ಮದ್ಯ (IMFL) ಮತ್ತು ವಿದೇಶಿ ಮದ್ಯ (FL) ಮಾರಾಟ ಮಾಡಲು ಪರವಾನಗಿಗಳನ್ನು ಆಯ್ಕೆ ಪ್ರಕ್ರಿಯೆಯ ಮೂಲಕ ಖಾಸಗಿ ವ್ಯಕ್ತಿಗಳು ಅಥವಾ ಘಟಕಗಳಿಗೆ ನೀಡಲಾಗುತ್ತದೆ. ಈ ಪರವಾನಗಿಗಳು ಅಕ್ಟೋಬರ್ 12, 2024 ರಿಂದ ಸೆಪ್ಟೆಂಬರ್ 30, 2026 ರವರೆಗೆ ಮಾನ್ಯವಾಗಿರುತ್ತವೆ.
ಸಾಮಾಜಿಕ ನ್ಯಾಯ ತತ್ವದಡಿ ಮದ್ಯದಂಗಡಿಗಳ ಹಂಚಿಕೆ: ಸಬಲೀಕರಣ, ಸಮಾನತೆ ಮತ್ತು ಸಾಮಾಜಿಕ ನ್ಯಾಯದ ತತ್ತ್ವದ ಅಡಿ ಹಾಗೂ ಇದರ ಉತ್ತೇಜನಕ್ಕೆ ಹೊಸ ಮದ್ಯ ನೀತಿ ಅನ್ವಯ 'ಗೀತಾ ಕುಲಾಲು' ಸಮುದಾಯಕ್ಕೆ ಒಟ್ಟು 340 ಅಂಗಡಿಗಳನ್ನು ಮಂಜೂರು ಮಾಡಲಾಗಿದೆ. ಲಾಟರಿ ವ್ಯವಸ್ಥೆಯ ಮೂಲಕ ಅಂಗಡಿಗಳನ್ನು ಆಯ್ಕೆ ಮಾಡಲಾಗುವುದು ಎಂದು ಸರ್ಕಾರ ತಿಳಿಸಿದೆ. ಇದರಿಂದಾಗಿ ಅರ್ಜಿದಾರರು ಬಹು ಅಂಗಡಿಗಳಿಗೆ ಅರ್ಜಿ ಸಲ್ಲಿಸಬಹುದಾಗಿದೆ. ಪ್ರತಿ ಅರ್ಜಿದಾರರು ಪ್ರತಿ ಅಂಗಡಿಗೆ 2 ಲಕ್ಷ ರೂಪಾಯಿ ಮರುಪಾವತಿಸಲಾಗದ ಶುಲ್ಕವನ್ನು ಪಾವತಿಸಬೇಕಾಗುತ್ತದೆ.
ಉತ್ಪನ್ನಗಳ ಲ್ಯಾಂಡಿಂಗ್ ವೆಚ್ಚದ ಮೇಲೆ ಹೆಚ್ಚುವರಿ ಶೇ 2 ರಷ್ಟು ತೆರಿಗೆ: ರಾಜ್ಯ ಪಾನೀಯಗಳ ನಿಗಮದಿಂದ 350-400 ಕೋಟಿ ರೂಪಾಯಿ ಮೌಲ್ಯದ ಮದ್ಯದ ದಾಸ್ತಾನುಗಳನ್ನು ಖರೀದಿ ಮಾಡಲಾಗಿದೆ. ಪ್ರತಿ ಹಣಕಾಸಿನ ವಿಷಯದ ಮೇಲೆ ನಿಗಾ ಇಡಲಾಗಿದೆ. ಮದ್ಯ ಮತ್ತು ಮಾದಕವಸ್ತು ಪುನರ್ವಸತಿ ಸೌಲಭ್ಯಗಳಿಗಾಗಿ ಮದ್ಯ ಉತ್ಪನ್ನಗಳ ಲ್ಯಾಂಡಿಂಗ್ ವೆಚ್ಚದ ಮೇಲೆ ಸರ್ಕಾರವು ಹೆಚ್ಚುವರಿ 2 ಪ್ರತಿಶತ ತೆರಿಗೆಯನ್ನು ಜಾರಿಗೆ ತಂದಿದೆ.
ಈ ಹಿಂದೆ ಇದ್ದ 10 ವಿವಿಧ ತೆರಿಗೆಗಳ ಬದಲಾಗಿ 6 ತೆರಿಗೆ ಹಾಕಲಷ್ಟೇ ನಿರ್ಧಾರ: ಹಿಂದಿನ ವೈಸಿಪಿ ಸರ್ಕಾರವು ಮದ್ಯದ ಮೇಲೆ 10 ವಿವಿಧ ರೀತಿಯ ತೆರಿಗೆಗಳನ್ನು ವಿಧಿಸಿತ್ತು. ಆದರೆ ಹೊಸ ಎನ್‌ಡಿಎ ಸರ್ಕಾರ ಅದನ್ನು 6 ರೂಪಾಂತರಗಳಿಗೆ ಇಳಿಸಿದೆ. ಪರಿಣಾಮವಾಗಿ, ಬೆಲೆಗಳಲ್ಲಿ ಗಮನಾರ್ಹವಾಗಿ ಬದಲಾಗುತ್ತವೆ. ಇನ್ನು ಮುಂದೆ ಉತ್ತಮ ಗುಣಮಟ್ಟದ ಮದ್ಯವನ್ನು ಕಡಿಮೆ ಬೆಲೆಗೆ ಮಾರಾಟ ಮಾಡಲಾಗುವುದು ಎಂದು ಆಂಧ್ರಪ್ರದೇಶ ಸರ್ಕಾರ ತಿಳಿಸಿದೆ.
ಆಂಧ್ರಪ್ರದೇಶದ ಪ್ರೀಮಿಯಂ ಮದ್ಯದ ಅಂಗಡಿಗಳು ಅರ್ಜಿದಾರರು ಮದ್ಯದ ನೀತಿ ಯೋಜನೆಯ ವಿಶೇಷ ವರ್ಗದ ಅಡಿ ಪ್ರೀಮಿಯಂ ಅಂಗಡಿ ಪರವಾನಗಿಗಾಗಿ ಸಹ ಅರ್ಜಿ ಸಲ್ಲಿಸಬಹುದು. ಆದೇಶದ ಪ್ರಕಾರ, ಆಂಧ್ರಪ್ರದೇಶದಲ್ಲಿ ಉನ್ನತ ಮಟ್ಟದ ಚಿಲ್ಲರೆ ಮಾರಾಟ ಒದಗಿಸಲು ರಾಜ್ಯ ಸರ್ಕಾರವು 12 ಪ್ರೀಮಿಯಂ ಸ್ಟೋರ್ ಪರವಾನಗಿಗಳನ್ನು ನೀಡುತ್ತದೆ.
ಇದನ್ನು ಓದಿ: AI ಆಧರಿತ ವ್ಯವಸ್ಥೆಯಿಂದ 60 ಕಾಡಾನೆಗಳ ಪ್ರಾಣ ಉಳಿಸಿದ ಲೋಕೋ ಪೈಲಟ್‌ಗಳು
