ಎಟಿಎಂಗೆ ಹಾಕಲು ತಂದ 1.5 ಕೋಟಿ ಹಣದೊಂದಿಗೆ ಕಾರು ಚಾಲಕ ಪರಾರಿ

ಪಾಟ್ನಾ (ಬಿಹಾರ) : ಖಾಸಗಿ ಬ್ಯಾಂಕ್​ ಎಟಿಎಂಗೆ ತುಂಬಲು ಹಣ ತೆಗೆದುಕೊಂಡು ಹೋಗುತ್ತಿದ್ದ ವಾಹನ ಚಾಲಕ ಬ್ಯಾಂಕಿನ  ಹಣದೊಂದಿಗೆ ಪರಾರಿಯಾಗಿರುವ ಘಟನೆ ಪಾಟ್ನಾದ ಅಲಂಗಂಜ್​ ಪೊಲೀಸ್​ ಠಾಣಾ ವ್ಯಾಪ್ತಿಯ  ಡಂಕ ಇಮ್ಲಿ ಗೊಲಂಬರ್​​ ಎಂಬಲ್ಲಿ ನಡೆದಿದೆ.  ಆರೋಪಿ ಸೂರಜ್​ ಕುಮಾರ್​​ ಎಂಬಾತ ಬ್ಯಾಂಕಿನ 1.5 ಕೋಟಿ ರೂಪಾಯಿಯೊಂದಿಗೆ ಪರಾರಿಯಾಗಿರುವುದಾಗಿ ಪೊಲೀಸರು ತಿಳಿಸಿದ್ದಾರೆ. ಈ ಸಂಬಂಧ ಪ್ರಕರಣ ದಾಖಲಿಸಿಕೊಂಡ ಪೊಲೀಸರು ಖಾಸಗಿ ಸಂಸ್ಥೆಯ ಗನ್​​ ಮ್ಯಾನ್ ಸುಭಾಶ್​ ಯಾದವ್​​​, ಆಡಿಟರ್ ಅಮರೇಶ್​ ಸಿಂಗ್​​ ಸೇರಿ   ಸೋನುಕುಮಾರ್​​, ದಿಲೀಪ್​ ಕುಮಾರ್​​  ಎಂಬವರನ್ನು  ವಶಕ್ಕೆ  ಪಡೆದಿದ್ದಾರೆ. ಇವರನ್ನು ಪೊಲೀಸರು ತೀವ್ರ ವಿಚಾರಣೆ ನಡೆಸುತ್ತಿದ್ದಾರೆ.

ಇವರು ಡಂಕ ಇಮ್ಲಿ ಗೊಲಂಬರ್​​ನಲ್ಲಿರುವ  ಖಾಸಗಿ ಬ್ಯಾಂಕಿನ ಎಟಿಎಂಗೆ ಹಣ ಹಾಕಲು ಬಂದಿದ್ದರು. ಈ ವೇಳೆ ಮೂವರು ಕಾರಿನಿಂದ ಇಳಿದು ಎಟಿಎಂ ಬಳಿಗೆ ಹೋಗಿದ್ದಾರೆ. ಈ ವೇಳೆ ಕಾರು ಚಾಲಕ ಸೂರಜ್​ ಕುಮಾರ್​​ ಸ್ಥಳದಿಂದ ಹಣದೊಂದಿಗೆ ಪರಾರಿಯಾಗಿದ್ದಾನೆ.  ಬಳಿಕ ಆರೋಪಿ ಕಾರನ್ನು ಮಾರ್ಗಮಧ್ಯೆ ಬಿಟ್ಟು , ಕಾರಿನಲ್ಲಿದ್ದ 1.5 ಕೋಟಿ ಹಣದೊಂದಿಗೆ ಪರಾರಿಯಾಗಿದ್ದಾನೆ ಎಂದು ತಿಳಿದುಬಂದಿದೆ. ಇನ್ನು ಪೊಲೀಸರು ಜಿಪಿಎಸ್​ ಮೂಲಕ ವಾಹನವನ್ನು ಪತ್ತೆ ಹಚ್ಚಿದ್ದು, ಆರೋಪಿಗಾಗಿ ಶೋಧ ಮುಂದುವರೆಸಿದ್ದಾರೆ.

ಇದನ್ನೂ ಓದಿ : ಬಿಹಾರದಲ್ಲಿ ಅಗ್ನಿ ಅವಘಡ: 50ಕ್ಕೂ ಹೆಚ್ಚು ಅಂಗಡಿಗಳು ಸುಟ್ಟು ಕರಕಲು