ಯುವಕ ಅಥವಾ ಯುವತಿ ನೋಡಲು ಆಕರ್ಷಕವಾಗಿ ಕಾಣಬೇಕು ಎಂದರೆ ಎತ್ತರವಿರಬೇಕು ಅನ್ನೋದು ಹಲವರ ಅಭಿಪ್ರಾಯ. ಹೀಗಾಗಿ ಸಹಜವಾಗಿ ಎಲ್ಲರೂ ಎತ್ತರವಿರಬೇಕು ಎಂದೇ ಬಯಸುತ್ತಾರೆ. ಆದರೆ, ಈ ಎತ್ತರವೇ ನಮಗೆ ಕೆಲವು ಅನಾರೋಗ್ಯಗಳನ್ನು ಉಂಟು ಮಾಡುತ್ತದೆ ಎಂದು ಅಧ್ಯಯನವೊಂದು ಎಚ್ಚರಿಸಿದೆ. ದೈಹಿಕ ಎತ್ತರವು ಹೃದ್ರೋಗದಿಂದ ಹಿಡಿದು ಕ್ಯಾನ್ಸರ್‌ನಂತಹ ಅಪಾಯಕಾರಿ ಸಮಸ್ಯೆಗಳನ್ನು ತಂದೊಡ್ಡಬಲ್ಲದು ಎನ್ನುತ್ತದೆ ಸಂಶೋಧನೆ.
ರಾಕಿ ಮೌಂಟೇನ್ ರೀಜನಲ್ ವಿಎ ಮೆಡಿಕಲ್ ಸೆಂಟರ್‌ನ ಶ್ರೀಧರನ್ ರಾಘವನ್ ಅವರ ಪ್ರಕಾರ, ಎತ್ತರವಾಗಿರುವುದು ಹೃತ್ಕರ್ಣದ ಕಂಪನ ಮತ್ತು ರಕ್ತನಾಳಗಳ ಉಬ್ಬುವಿಕೆಯ ಅಪಾಯವನ್ನು ಹೆಚ್ಚಿಸುತ್ತದೆ. ಅಲ್ಲದೇ, ಹೃದಯ ಕಾಯಿಲೆ, ಅಧಿಕ ರಕ್ತದೊತ್ತಡ ಮತ್ತು ಅಧಿಕ ಕೊಲೆಸ್ಟ್ರಾಲ್‌ನ ಅಪಾಯಕ್ಕೂ ಕಾರಣವಾಗಬಹುದು ಎನ್ನುತ್ತಾರೆ.
ಓಪನ್ ಆಕ್ಸೆಸ್ ಜರ್ನಲ್ ಪಿಎಲ್ಒಎಸ್ ಜೆನೆಟಿಕ್ಸ್‌ನಲ್ಲಿ ಪ್ರಕಟವಾದ ಅಧ್ಯಯನದಲ್ಲಿ ಹೇಳಿದಂತೆ, ಎತ್ತರವು ನರವ್ಯೂಹದ ಮೇಲೆ ಹೆಚ್ಚಿನ ಅಪಾಯ ಉಂಟಾಗುವ ಸಾಧ್ಯತೆಯನ್ನು ಬಹಿರಂಗಪಡಿಸಿದೆ. ತುದಿ ನರಗಳ ಮೇಲೆ ಎತ್ತರವು ಹೆಚ್ಚಿನ ಹಾನಿ ಉಂಟು ಮಾಡುತ್ತದೆ. ಜೊತೆಗೆ ಚರ್ಮ ಮತ್ತು ಮೂಳೆ ಸವೆತದಂತಹ ಸಮಸ್ಯೆ ಕಾಣಿಸಿಕೊಳ್ಳುತ್ತದೆ ಎಂದು ಪ್ರಸ್ತಾಪಿಸಿದೆ.
ಎತ್ತರದ ಮೇಲೆ ಅಧ್ಯಯನ ನಡೆಸಿದ ತಂಡವು 2,50,000 ಕ್ಕಿಂತ ಹೆಚ್ಚು ವಯಸ್ಕರಿಂದ ಮಾಹಿತಿ ಪಡೆದಿದೆ. ಇಷ್ಟು ಪ್ರಮಾಣದ ಜನರ ಮೇಲೆ 1,000 ಕ್ಕೂ ಹೆಚ್ಚು ಭಿನ್ನ ಪರಿಸ್ಥಿತಿಯಲ್ಲಿ ಪ್ರಯೋಗಗಳನ್ನು ಮಾಡಿ ವಿಶ್ಲೇಷಿಸಿದೆ. ಇದು ಇಲ್ಲಿಯವರೆಗಿನ ಎತ್ತರ ಮತ್ತು ಅದರಿಂದ ಉಂಟಾಗುವ ಸಮಸ್ಯೆಗಳ ಮೇಲೆ ನಡೆದ ಅತಿದೊಡ್ಡ ಅಧ್ಯಯನವಾಗಿದೆ.
ಎತ್ತರದ ವಯಸ್ಕರಲ್ಲಿ ಉಂಟಾಗುವ ಅಪಾಯಕಾರಿ ಸಮಸ್ಯೆಗಳನ್ನು ಈ ಅಧ್ಯಯನದಲ್ಲಿ ಕಂಡುಕೊಳ್ಳಲಾಗಿದೆ. ಆದಾಗ್ಯೂ ಇನ್ನೂ ಹೆಚ್ಚಿನ ಪ್ರಮಾಣದಲ್ಲಿ ವಿಶ್ಲೇಷಣೆ ನಡೆಯಬೇಕಿದೆ. ಅಲ್ಲದೇ, ವಿವಿಧ ದೇಶದ, ವೈವಿಧ್ಯಮಯ ಎತ್ತರದ ವ್ಯಕ್ತಿಗಳ ಮೇಲೆ ಭವಿಷ್ಯದಲ್ಲಿ ಗಂಭೀರ ಅಧ್ಯಯನಗಳು ನಡೆಯಬೇಕಾದ ಅಗತ್ಯವನ್ನು ಅಧ್ಯಯನ ಪ್ರಸ್ತಾಪಿಸಿದೆ.
ಓದಿ: ಬದಲಾಗುತ್ತಿರುವ ಜೀವನ ಶೈಲಿಯಿಂದ ಹೆಚ್ಚುತ್ತಿರುವ ಹೃದಯ ಸ್ತಂಭನ.. ಇದನ್ನು ತಡೆಗಟ್ಟುವುದು ಹೇಗೆ ಗೊತ್ತಾ!?
