ಬೇಡ್ತಿ ಸೇತುವೆ ಸಂಚಾರ ಪುನಾರಂಭ... ಅನರ್ಹ ಶಾಸಕ ಶಿವರಾಮ್​ ಹೆಬ್ಬಾರ್ ಪರಿಶೀಲನೆ

ಕಳೆದ 3 ದಿನಗಳಿಂದ ಬಂದ್​ ಆಗಿದ್ದ ಯಲ್ಲಾಪುರದ ಬೇಡ್ತಿ ಸೇತುವೆ ಮೇಲೆ ಸಂಚಾರ ಪುನಾರಂಭವಾಗಿದ್ದು, ಅನರ್ಹ ಶಾಸಕ ಶಿವರಾಮ್ ಹೆಬ್ಬಾರ್ ಅವರು ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದಾರೆ.

ಶಿರಸಿ: ಉತ್ತರ ಕನ್ನಡ ಜಿಲ್ಲೆಯಲ್ಲಿ ಸುರಿದ ಭಾರಿ ಮಳೆಗೆ ಕಳೆದ 3 ದಿನಗಳಿಂದ ಬಂದ್ ಆಗಿದ್ದ ಯಲ್ಲಾಪುರದ ಬೇಡ್ತಿ ಸೇತುವೆಯ ಮೇಲಿನ ಸಂಚಾರ ಪುನಾರಂಭವಾಗಿದೆ.

ಸಂಚಾರ ಬಂದ್ ಆದ ಪರಿಣಾಮ ಸಾರ್ವಜನಿಕರು ಯಲ್ಲಾಪುರದಿಂದ ಶಿರಸಿಗೆ ಓಡಾಡಲು ಸಾಕಷ್ಟು ಸಮಸ್ಯೆ ಅನುಭವಿಸುತ್ತಿದ್ದರು. ಈ ಹಿನ್ನೆಲೆಯಲ್ಲಿ ಯಲ್ಲಾಪುರ ಕ್ಷೇತ್ರದ ಅನರ್ಹ ಶಾಸಕ ಶಿವರಾಮ್ ಹೆಬ್ಬಾರ್, ಪಿಡಬ್ಲ್ಯೂಡಿ ಅಧಿಕಾರಿಗಳ ಜೊತೆ ಬೇಡ್ತಿ ಬ್ರಿಡ್ಜ್ ಬಳಿ ತೆರಳಿ ಪರಿಶೀಲನೆ ನಡೆಸಿದರು. ಸ್ವತಃ ಬಸ್​ನಲ್ಲಿ ಕುಳಿತು ಬ್ರಿಡ್ಜ್ ಮೇಲೆ ಸಂಚರಿಸಿದರು.

ಕಳೆದ 3 ದಿನಗಳಿಂದ ಬಂದ್​ ಆಗಿದ್ದ ಬಸ್ ಸಂಚಾರ ಪ್ರಾರಂಭವಾಗಿದ್ದು, ಸಾರ್ವಜನಿಕರು ಸಂತಸ ವ್ಯಕ್ತಪಡಿಸಿದ್ದಾರೆ. ಬೈಕ್, ಕಾರು ಮತ್ತು ಬಸ್ ಸಂಚಾರಕ್ಕೆ ಮಾತ್ರ ಅವಕಾಶ ನೀಡಲಾಗಿದ್ದು, ಪ್ರಯಾಣಿಕರು ಬಸ್​ನಲ್ಲಿ ಸಂಚರಿಸದೆ ಬ್ರಿಡ್ಜ್ ಮೇಲೆ ನಡೆದು ಸಂಚರಿಸುತ್ತಿದ್ದಾರೆ. ಬ್ರಿಟಿಷರ ಕಾಲದ ಸೇತುವೆಯಾದ ಕಾರಣ ಮುನ್ನೆಚ್ಚರಿಕಾ ಕ್ರಮವಾಗಿ ಭಾರಿ ವಾಹನ ಸಂಚಾರವನ್ನು ನಿಷೇಧಿಸಲಾಗಿದೆ.