ಆಯುರ್ವೇದ ಗಿಡಮೂಲಿಕೆ ಮಾಸ್ಕ್​ ತಯಾರಿಸಿದ ಬೆಂಗ್ರೆ ಉಸಿರಾ ಇಂಡಸ್ಟ್ರೀಸ್: ಏನಿದರ ವಿಶೇಷತೆ?

ಭಟ್ಕಳದ ಬೆಂಗ್ರೆ ಉಸಿರಾ ಕೈಗಾರಿಕಾ ಘಟಕದಲ್ಲಿ ಸುಗಂಧ ಭರಿತ ಆಯುರ್ವೇದ ಗಿಡಮೂಲಿಕೆಯ ಲಾವಂಚ ಬೇರಿನ ಮುಖಗವಸುಗಳನ್ನು ತಯಾರಿಸಲಾಗುತ್ತಿದೆ. ಆಯುರ್ವೇದ ಗುಣಗಳನ್ನು ಹೊಂದಿರುವ ಲಾವಂಚದ ಬೇರಿನಿಂದ ಸಿದ್ಧಪಡಿಸಿದ ಈ ಮುಖಗವಸು ಧರಿಸುವುದರಿಂದ ಅತೀ ಸೂಕ್ಷ್ಮ ರೋಗಾಣುಗಳನ್ನು ತಡೆಗಟ್ಟಬಹುದು ಹಾಗೂ ಅತೀ ದೀರ್ಘಕಾಲದವರೆಗೂ ಇದರ ಉಪಯೋಗ ಪಡೆದುಕೊಳ್ಳಬಹುದಾಗಿದೆ.

ಭಟ್ಕಳ: ಸುಗಂಧಭರಿತ ಆಯುರ್ವೇದ ಗಿಡಮೂಲಿಕೆಯ ಲಾವಂಚ ಬೇರಿನ ಮುಖಗವಸು(ಮಾಸ್ಕ್​​)ಗಳನ್ನು ತಯಾರಿಸುವಲ್ಲಿ ತಾಲೂಕಿನ ಬಂಗಾರ ಮಕ್ಕಿಯಲ್ಲಿರುವ ಬೆಂಗ್ರೆ ಉಸಿರಾ ಇಂಡಸ್ಟ್ರೀಸ್ ಯಶಸ್ವಿಯಾಗಿದೆ.

ಕಳೆದ 22 ವರ್ಷಗಳಿಂದ ಕರಕುಶಲ ವಸ್ತುಗಳನ್ನು ತಯಾರಿಸಿಕೊಂಡು ಬರುತ್ತಿದ್ದು, ಈ ಸಮಯಕ್ಕೆ ತಕ್ಕಂತೆ ಮುಖ ಮತ್ತು ಬಾಯಿ ಮುಚ್ಚುವಂತಹ ಗವಸುಗಳನ್ನು ತಯಾರಿಸುವಲ್ಲಿ ಇವರು ಮುಂದಾಗಿದ್ದಾರೆ. ಕೊರೊನಾ ವೈರಸ್​ನಿಂದಾಗಿ ಸಾವಿನ ಸಂಖ್ಯೆಯು ದಿನದಿಂದ ದಿನಕ್ಕೆ ಹೆಚ್ಚಾಗುತ್ತಿರುವ ಭೀತಿಯಿ೦ದ ಇದೀಗ ನೈಸರ್ಗಿಕವಾಗಿ ಸಿಗುವ ಲಾವಂಚದ ಬೇರುಗಳನ್ನು ಸಂಸ್ಕರಿಸಿ ಮುಖಗವಸು ತಯಾರಿ ತಾಲೂಕಿನ ಜನರಿಗೆ ನೀಡುವಲ್ಲಿ ಯಶಸ್ವಿಯಾಗಿದ್ದಾರೆ.

ಲಾವಂಚ ಬೇರಿನ ಮುಖಗವಸುಗಳು

ಆಯುರ್ವೇದ ಗುಣಗಳನ್ನು ಹೊಂದಿರುವ ಲಾವಂಚದ ಬೇರಿನಿಂದ ಸಿದ್ಧಪಡಿಸಿದ ಈ ಮುಖಗವಸು ಧರಿಸುವುದರಿಂದ ಅತೀ ಸೂಕ್ಷ್ಮ ರೋಗಾಣುಗಳನ್ನು ತಡೆಗಟ್ಟಬಹುದು ಹಾಗೂ ಅತಿ ದೀರ್ಘ ಕಾಲದವರೆಗೂ ಇದರ ಉಪಯೋಗ ಪಡೆದುಕೊಳ್ಳಬಹುದಾಗಿದೆ.

ಉಸಿರಾ ಇಂಡಸ್ಟ್ರೀಸ್ ಮಾಲೀಕರಾದ ಎಂ. ಮ್ಯಾಥ್ಯೂ ಅವರು ಈಟಿವಿ ಭಾರತದೊಂದಿಗೆ ಮಾತನಾಡಿ ನಾವು ಸತತ 22 ವರ್ಷಗಳಿಂದ ಕರಕುಶಲ ವಿನ್ಯಾಸಗಳನ್ನು ತಯಾರಿಸಿ ಬಳಕೆಗೆ ನೀಡುತ್ತಾ ಬಂದಿರುತ್ತೇವೆ. ಕೊರೊನಾ ಸಂದರ್ಭದಲ್ಲಿ ಮಾಸ್ಕ್​ನ ಬಳಕೆ ಅವಶ್ಯಕವಾದದ್ದನ್ನು ಮನಗಂಡು ನಾವು ಲಾವಂಚದ ಬೇರುಗಳನ್ನು ಉಪಯೋಗಿಸಿ ಮಾಸ್ಕ ತಯಾರಿಸಿದ್ದೇವೆ. ಅದರ ಉಪಯೋಗ ಪಡೆಯಲು ಹತ್ತಿರದ ಜನರಿಗೆ ಕೊಟ್ಟಿದ್ದೇವೆ. ಉಪಯೋಗಿಸದವರಿಂದ ಉತ್ತಮ ಪ್ರತಿಕ್ರಿಯೆ ಬಂದಿದ್ದು, ಇದನ್ನು ಆರು ತಿಂಗಳಿಂದ ಒಂದು ವರ್ಷದವರೆಗೂ ಬಳಕೆ ಮಾಡಬಹುದಾಗಿದೆ. ಕಡಿಮೆ ಮೊತ್ತದ ಮಾಸ್ಕ್​ಗಳು ಲಭ್ಯವಿದ್ದು, 100 ರಿಂದ 150 ರೂಪಾಯಿ ಬೆಲೆಗೆ ಡಬಲ್ ಲೇಯರ್​ ಮಾಸ್ಕ್​ಗೆ ದರ ನಿಗದಿ ಮಾಡಲಾಗಿದೆ ಎಂದು ತಿಳಿಸಿದರು.

ಮಾಸ್ಕ್​ ಬಳಸಿ ಸ್ವಚ್ಛ ಮಾಡುವ ವಿಧಾನ ಹೀಗಿದೆ:

• ಮಾಸ್ಕ್​ ಬಳಕೆಯ ನಂತರ ಸಾಬೂನು ಮತ್ತು ಬಿಸಿ ನೀರಿನಲ್ಲಿ ತೊಳೆಯಬೇಕು.
• ಸೂರ್ಯನ ಬೆಳಕಿನಲ್ಲಿ ಕನಿಷ್ಠ 2 ಗಂಟೆ ಒಣಗಿಸಬೇಕು.
• ಸೂರ್ಯನ ಬೆಳಕು ಇಲ್ಲ ಎಂದಾದಲ್ಲಿ, ಕುಕ್ಕರ್‌ನಲ್ಲಿ ನೀರಿನೊಂದಿಗೆ ಹಾಕಿ ಹತ್ತು ನಿಮಿಷ ಕುದಿಸಿ, ಬೆಚ್ಚಗಿನ ಗಾಳಿಯ ಸಂಪರ್ಕಕ್ಕೆ ಇಡಬೇಕಾಗುತ್ತದೆ ಎಂದು ಉಸಿರಾ ಇಂಡಸ್ಟ್ರೀಸ್ ಮಾಲೀಕರಾದ ಎಂ. ಮ್ಯಾಥ್ಯೂ ಬಳಕೆಯ ವಿವರಣೆ ನೀಡಿದ್ದಾರೆ.