ಉಡುಪಿ: ಯಡಿಯೂರಪ್ಪ ಓರ್ವ ಹೋರಾಟಗಾರ ಎಂದೇ ದೆಹಲಿ ನಾಯಕರು ಅಧಿಕಾರ ಕೊಟ್ಟಿದ್ದಾರೆ. ಒಲ್ಲದ ಶಿಶು ಆಗಿದ್ರೆ ಯಡ್ಯೂರಪ್ಪ ಸಿಎಂ ಆಗ್ತಿರಲಿಲ್ಲ. ಮೋದಿ, ಅಮಿತ್ ಶಾಗೆ ಯಡಿಯೂರಪ್ಪ ಒಲ್ಲದ ಶಿಶು ಎಂದೇಳಿದ ಮಾಜಿ ಸಿಎಂ ಸಿದ್ದರಾಮಯ್ಯ ಹೇಳಿಕೆಗೆ ಶಿವಮೊಗ್ಗ ಸಂಸದ ಬಿ ವೈ ರಾಘವೇಂದ್ರ ತಿರುಗೇಟು ನೀಡಿದ್ದಾರೆ.
ಸಾವರ್ಕರ್ ಬಗ್ಗೆ ಸಿದ್ದರಾಮಯ್ಯ ಹೇಳಿಕೆಗೆ ಪ್ರತಿಕ್ರಿಯಿಸಿ, ರಾಜಕೀಯವಾಗಿ ನೆಹರು ಮನೆತನ ಕಣ್ಮರೆಯಾಗುವ ಆತಂಕ ಕಾಂಗ್ರೆಸ್ಗಿತ್ತು. ಹಾಗಾಗಿ ಯಾವುದೇ ಸ್ವಾತಂತ್ರ್ಯ ಹೋರಾಟಗಾರರನ್ನು ಸ್ಮರಿಸಲೇ ಇಲ್ಲ. ನೆಹರೂ ಮನೆತನದವರು ಅವರ ಮನೆಯವರಿಗೇ ಭಾರತರತ್ನ ಘೋಷಿಸಿಕೊಂಡರು. ಆದರೀಗ ಪ್ರಧಾನಿ ಮೋದಿ ಉತ್ತಮ ನಿರ್ಧಾರ ಮಾಡಿದ್ದಾರೆ. ಅವರ ಹೋರಾಟದ ಪ್ರತಿಫಲ ನಾವು ಅನುಭವಿಸ್ತಾ ಇದ್ದೇವೆ. ಸಾವರ್ಕರ್ರಂತಹ ಸ್ವಾತಂತ್ರ್ಯ ಹೋರಾಟಗಾರರ ಬಗ್ಗೆ ಕಾಂಗ್ರೆಸ್ ಮುಖಂಡರ ಹೇಳಿಕೆ ಖಂಡನೀಯವೆಂದು ಆಕ್ರೋಶ ವ್ಯಕ್ತಪಡಿಸಿದರು.
ಹಾನಿಯಾದ ಮನೆ ರಿಪೇರಿಗೆ ಒಂದು ಲಕ್ಷ ನೀಡಿದ್ದು ಬಿಜೆಪಿ ಸರ್ಕಾರ. ನೆರೆ ಸಂತ್ರಸ್ತರಿಗೆ ಹತ್ತು ಸಾವಿರ ಪರಿಹಾರ ತಕ್ಷಣ ನೀಡಿದ್ದು ನಮ್ಮ ಸರ್ಕಾರ. ಕೇಂದ್ರದಿಂದ ಹಣ ಬಂದಿಲ್ಲ ಅಂತಾ ಕಾಂಗ್ರೆಸ್ ಬೊಬ್ಬೆ ಹೊಡೆಯಬಹುದು. ಆದರೆ, ಹಿಂದೆ ಅವರ ಸರ್ಕಾರ ಬರಗಾಲ, ನೆರೆ ಬಂದಾಗ ಏನು ಮಾಡಿತ್ತು? ದಾಖಲೆ ತೆಗೆದು ನೋಡಿದ್ರೆ ಇವರ ಹಣೆಬರಹ ಗೊತ್ತಾಗುತ್ತೆ. ಗಾಜಿನ ಮನೆಯಲ್ಲಿ ಕೂತು ಕಲ್ಲು ಹೊಡೆಯಬೇಡಿ, ನಮ್ಮ ಸರ್ಕಾರ ನೆರೆ ಸಂತ್ರಸ್ತರಿಗೆ ಉತ್ತಮ ರೀತಿಯಲ್ಲಿ ಸ್ಪಂದಿಸಿದೆ ಎಂದು ವಿಪಕ್ಷ ನಾಯಕರಿಗೆ ಗುದ್ದು ನೀಡಿದ್ದಾರೆ.
