ತುಮಕೂರು: ನಗರ ನಿವಾಸಿಗರ ಜೀವನಾಡಿಯಾಗಿದ್ದ ಅಕ್ಕ-ತಂಗಿ ಕೆರೆ ಇದೀಗ ಅಭಿವೃದ್ಧಿಯ ವೇಗಕ್ಕೆ ಸಿಲುಕುವ ಮೂಲಕ ತನ್ನ ಒಡಲಲ್ಲಿ ಜೀವಜಲವನ್ನು ಇರಿಸಿಕೊಳ್ಳದಂತಹ ಸ್ಥಿತಿಗೆ ತಲುಪಿದೆ. ದಶಕಗಳ ಕಾಲ ಜನರ ದಣಿವು ನೀಗಿಸಿದ್ದ ಈ ಕೆರೆ ಇದೀಗ ಅಭಿವೃದ್ಧಿ ಎಂಬ ನಾಗಾಲೋಟದಿಂದ ತತ್ತರಿಸಿ ಹೋಗಿದೆ.
ಪಾಳೆಗಾರರು ನಿರ್ಮಿಸಿದ್ದ ಅಕ್ಕ-ತಂಗಿ ಕೆರೆ ಇದೀಗ ರಾಷ್ಟ್ರೀಯ ಹೆದ್ದಾರಿಗೆ ತುತ್ತಾಗುವ ಮೂಲಕ ಜೀವಜಲಕ್ಕೆ ಕಂಟಕ ತಂದೊಡ್ಡಿದೆ. 2000 ಇಸವಿಯಲ್ಲಿ ಮುಂಬೈ ಮತ್ತು ಬೆಂಗಳೂರು ನಡುವಿನ ರಾಷ್ಟ್ರೀಯ ಹೆದ್ದಾರಿ 4ರ ಕಾಮಗಾರಿಗೆ ಚಾಲನೆ ನೀಡಲಾಗಿತ್ತು. ದುರದೃಷ್ಟವಶಾತ್ ಈ ರಸ್ತೆ ಸಮೃದ್ಧವಾಗಿ ಇದ್ದಂತಹ ಅಕ್ಕ-ತಂಗಿ ಕೆರೆ ನಡುವಿನಲ್ಲೇ ಹಾದು ಹೋಗಿತ್ತು. ಹಿಂದು-ಮುಂದು ನೋಡದ ಸರ್ಕಾರ ಈ ಕೆರೆಯನ್ನು ಇಬ್ಭಾಗ ಮಾಡಿ ಬಿಟ್ಟಿತ್ತು. ಸುಮಾರು 50 ಎಕರೆ ಪ್ರದೇಶದ ಕೆರೆಯ ಬಹುಭಾಗ ರಸ್ತೆ ಕಾಮಗಾರಿಗೆ ತೆಗೆದುಕೊಳ್ಳಲಾಯಿತು. ಈ ಮೂಲಕ ಈ ಕೆರೆ ಜಲ ಮೂಲಕ್ಕೆ ಕೊಡಲಿ ಪೆಟ್ಟು ನೀಡಲಾಯಿತು.
ಸಿದ್ದಗಂಗಾ ಮಠದ ಸಮೀಪ ಇರುವ ಬೆಟ್ಟ ಸೇರಿದಂತೆ ಇನ್ನಿತರ ಹಳ್ಳ-ಕೊಳ್ಳಗಳಿಂದ ಕೆರೆಗೆ ಹರಿದು ಬರುತ್ತಿದ್ದ ನೀರು ಬರಿದಾಯಿತು. ಕೆರೆಯ ಬಹುಭಾಗವನ್ನೆಲ್ಲ ಆವರಿಸಿಕೊಂಡ ರಾಷ್ಟ್ರೀಯ ಹೆದ್ದಾರಿ ಒಂದೆಡೆಯಾದರೆ ಇನ್ನುಳಿದ ಕೆರೆ ಪ್ರದೇಶ ಒತ್ತುವರಿದಾರರ ಕೆಂಗಣ್ಣಿಗೆ ಗುರಿಯಾಗಿತ್ತು. ಅದೇ ಕಸ ವಿಲೇವಾರಿಯ ಸ್ಥಳವಾಗಿಯೂ ಪರಿವರ್ತನೆಗೊಂಡಿತ್ತು. ಈ ಕೆರೆಯ ಶೋಚನೀಯ ಸ್ಥಿತಿಯನ್ನು ಕಂಡ ಅಂದಿನ ಜಿಲ್ಲಾಧಿಕಾರಿ ಹಾಗೂ ಪರಿಸರವಾದಿಗಳು ಇದಕ್ಕೆ ಕಾಯಕಲ್ಪ ನೀಡಲು ಮುಂದಾದರು. ಪರಿಸರವಾದಿಗಳು ಹಾಗೂ ವಿದ್ಯಾರ್ಥಿಗಳು ಅಕ್ಕ-ತಂಗಿ ಕೆರೆ ಉಳಿಸುವ ಒಂದು ಬೃಹತ್ ಹೋರಾಟ ಹಾಗೂ ಜನ ಜಾಗೃತಿಯನ್ನು ಮೂಡಿಸಿದರು. ಇದರ ಪರಿಣಾಮ ಅರಣ್ಯ ಇಲಾಖೆ ಈ ಜಾಗವನ್ನು ತನ್ನ ಸುಪರ್ದಿಗೆ ತೆಗೆದುಕೊಂಡು ಸುಂದರ ಉದ್ಯಾನವನವನ್ನಾಗಿ ಮಾಡಿದೆ.
ಇಂದಿಗೂ ಕೂಡ ಮಳೆ ಬಂದರೆ ಈ ಉದ್ಯಾನವನದಲ್ಲಿ ನೀರಿನ ಸೆಳವು ಗೋಚರಿಸುತ್ತದೆ. ಒಂದು ರೀತಿ ಇಲ್ಲಿ ಹಿಂದೆ ಕೆರೆ ಇತ್ತೆಂಬ ಕುರುಹುಗಳು ಗೋಚರಿಸುತ್ತವೆ. ಇನ್ನೊಂದೆಡೆ ಈ ಕೆರೆಯ ಸುತ್ತಮುತ್ತ ಸಮೃದ್ಧವಾಗಿದ್ದ ಅಂತರ್ಜಲ ಗಣನೀಯ ಪ್ರಮಾಣದಲ್ಲಿ ಕ್ಷೀಣಿಸಿದೆ. ಈ ಕೆರೆಯನ್ನು ಮರುಪೂರಣಗೊಳಿಸುವ ಕಾರ್ಯಕ್ಕೂ ಕೂಡ ಮುಂದಾಗದಂತಹ ಸ್ಥಿತಿ ನಿರ್ಮಾಣವಾಗಿರುವುದು ದುರಂತವಾಗಿದೆ.
