ಗೋ ಶಾಲೆಗೆ ಮಾರಿ ಕೋಣ, ಕೋರ್ಟ್​ ಮೆಟ್ಟಿಲೇರುತ್ತಾರಾ ಗ್ರಾಮಸ್ಥರು!?

ಕೋಣ ಕಾಣೆಯಾಗಿದೆ ಎಂದು ದಾವಣಗೆರೆ ಜಿಲ್ಲೆಯ ಬೇಲಿಮಲ್ಲೂರು ಗ್ರಾಮಸ್ಥರು ಹೊನ್ನಾಳಿ ಪೊಲೀಸ್ ಠಾಣೆಯಲ್ಲಿ ದೂರು ನೀಡಿದ್ದರು. ಆ ಪ್ರಕರಣಕ್ಕೆ ಇನ್ನು ಪರಿಹಾರ ಹುಡುಕಲು ಸಾಧ್ಯವಾಗಿಲ್ಲ.

ಶಿವಮೊಗ್ಗ: ಹಾರನಹಳ್ಳಿ ಹಾಗೂ ‌ದಾವಣಗೆರೆ ಜಿಲ್ಲೆಯ ಬೇಲಿ ಮಲ್ಲೂರು ಗ್ರಾಮಗಳ ಕೋಣದ ತಗಾದೆ ಪೊಲೀಸ್ ಠಾಣೆ ಮೇಟ್ಟಿಲೆರಿದ್ದು, ಈಗ ಕೋಣವನ್ನು ಹೊನ್ನಾಳಿ ಪೊಲೀಸರ ಸಮ್ಮುಖದಲ್ಲಿ‌ ನಗರದ ಮಹಾವೀರ ಗೋ ಶಾಲೆಗೆ ಬಿಡಲಾಗಿದೆ.

ಹಾರನಹಳ್ಳಿ ಗ್ರಾಮಸ್ಥರು ಕೋಣ ನಮ್ಮದೇ ಎಂದು ಹೊನ್ನಾಳಿ‌ ಪಟ್ಟಣದಿಂದ ಕಳೆದ ಶನಿವಾರ ತಮ್ಮ ಗ್ರಾಮಕ್ಕೆ ತೆಗೆದುಕೊಂಡು ಬಂದಿದ್ದರು. ಆದರೆ, ತಮ್ಮ ಕೋಣ ಕಾಣೆಯಾಗಿದೆ ಎಂದು ದೂರು ನೀಡಿದ್ದ ಬೇಲಿ ಮಲ್ಲೂರು ಗ್ರಾಮಸ್ಥರು ಹಾರನಹಳ್ಳಿ ಗ್ರಾಮಸ್ಥರು ನಮ್ಮೂರಿನ ಕೋಣವನ್ನು ತೆಗೆದು ಕೊಂಡು ಹೋಗಿದ್ದಾರೆ ಎಂದು ಮತ್ತೆ ಪೊಲೀಸರಿಗೆ ತಿಳಿಸಿದಾಗ, ಹೊನ್ನಾಳಿ ಪೊಲೀಸರು ಹಾರನಹಳ್ಳಿ ಗ್ರಾಮಸ್ಥರಿಗೆ ಕೋಣವನ್ನು ಗೋಶಾಲೆಗೆ ತರಲು ಹೇಳಿದ್ದಾರೆ. ಇದಕ್ಕೆ ಹಾರನಹಳ್ಳಿ ಗ್ರಾಮಸ್ಥರು ಕೋಣವನ್ನು ಗೋ ಶಾಲೆಗೆ ತಂದು ಬಿಟ್ಟಿದ್ದಾರೆ. ಕೋಣ ಯಾರದು ಎಂದು‌ ತೀರ್ಮಾನವಾಗುವವರೆಗೂ ಕೋಣವನ್ನು ಗೋ ಶಾಲೆಯಲ್ಲಿ‌ ಬಿಡಲು ತಿಳಿಸಿದ್ದಾರೆ.

ಈಗ ಕೋಣವನ್ನು ಗೋ ಶಾಲೆಯವರು ನೋಡಿಕೊಳ್ಳುತ್ತಿದ್ದಾರೆ. ಹಾರನಹಳ್ಳಿ ಗ್ರಾಮದಿಂದ ಕೋಣ ಕಾಣೆಯಾಗಿ ಎರಡು ವರ್ಷವಾದರೂ ಅವರು ಯಾಕೆ ದೂರು ನೀಡಿಲ್ಲ ಎಂದು ಬೇಲಿ ಮಲ್ಲೂರು ಗ್ರಾಮಸ್ಥರು ಪ್ರಶ್ನೆ ಮಾಡುತ್ತಿದ್ದಾರೆ. ಅಲ್ಲದೇ ದೇವರಿಗೆ ಬಿಟ್ಟ ಕೋಣ ಹಿರಿಯರು ಸಮಸ್ಯೆ ತೀರ್ಮಾನ ಮಾಡಿದರೆ ನಾವು ಅದಕ್ಕೆ ಬದ್ಧರಾಗಿರುತ್ತೇವೆ ಎನ್ನುತ್ತಾರೆ ಎರಡು ಗ್ರಾಮಸ್ಥರು. ಒಂದು ವೇಳೆ‌ ಎರಡು ಗ್ರಾಮಸ್ಥರಿಗೆ ಒಪ್ಪಿಗೆ ಆಗದೆ ಹೋದರೆ, ನಾವು ಕೋರ್ಟ್​ಗೆ ಹೋಗಲು ಸಿದ್ದ, ಅಲ್ಲಿ ಡಿಎನ್ಎ ಪರೀಕ್ಷೆ ಮಾಡಿದರೆ ಎಲ್ಲ ತಿಳಿಯುತ್ತದೆ ಎನ್ನುತ್ತಾರೆ ಬೇಲಿಮಲ್ಲೂರು ಗ್ರಾಮಸ್ಥರಾದ ನರಸಪ್ಪ. ಕೋಣ ತಮ್ಮದು ಎಂದು ಎರಡು ಗ್ರಾಮಸ್ಥರು ಕೋರ್ಟ್ ಮೇಟ್ಟಿಲೇರುತ್ತಾರಾ‌ ಅಥವಾ ಪಂಚಾಯಿತಿ ತೀರ್ಮಾನಕ್ಕೆ‌ ಬದ್ದರಾಗಿರುತ್ತಾರಾ ಎಂದು ಕಾದು ನೋಡಬೇಕಿದೆ.