ಶಿವಮೊಗ್ಗ: ಈ ಹಿಂದೆ ಸಂಸದರಾಗಿದ್ದ ಬಿ.ಎಸ್.ಯಡಿಯೂರಪ್ಪನವರು 8 ಲಕ್ಷ ರೂ. ಅನುದಾನ ನೀಡಿ ನಗರದ ಮುಖ್ಯ ರೈಲ್ವೆ ನಿಲ್ದಾಣದ ಆವರಣದಲ್ಲಿರುವ ಪ್ರಯಾಣಿಕರ ಸುರಕ್ಷತೆಗಾಗಿ ಪ್ರೀ-ಪೇಡ್ ಆಟೋ ಸ್ಟ್ಯಾಂಡ್ ನಿರ್ಮಾಣ ಮಾಡಿಸಿದ್ದರು. ಆದರೆ, ಈ ಸೌಲಭ್ಯ ಯಾರಿಗೂ ಲಭ್ಯವಾಗಿಲ್ಲ ಎನ್ನುತ್ತಾರೆ ಸ್ಥಳೀಯ ಪ್ರಯಾಣಿಕರು.
ರೈಲ್ವೆ ಪ್ರಯಾಣಿಕರ ಸುರಕ್ಷತೆಗಾಗಿ ಹಾಗೂ ಹಣ ಉಳಿತಾಯ ಮಾಡುವ ಪ್ರೀ-ಪೇಡ್ ಆಟೋ ಸ್ಟ್ಯಾಂಡ್ ಸೇವೆ ಈಗಾಗಲೇ ಬೇರೆ ಮಹಾನಗರಗಳಲ್ಲಿ ಉತ್ತಮವಾಗಿ ಕಾರ್ಯನಿರ್ವಹಿಸುತ್ತಿದೆ. ಬೇರೆ ಜಿಲ್ಲೆಗಳಲ್ಲಿ ಇದ್ದ ಪ್ರೀ- ಪೇಡ್ ಆಟೋ ಸೆಂಟರ್ ಶಿವಮೊಗ್ಗದಲ್ಲಿ ಪ್ರಾರಂಭವಾದಾಗ ಸಾರ್ವಜನಿಕರು ಸಹ ಸಂತಸಗೊಂಡಿದ್ದರು. ಅದರಲ್ಲೂ ಮಹಿಳಾ ಪ್ರಯಾಣಿಕರು ಇನ್ನೂ ಖುಷಿಪಟ್ಟಿದ್ದರು.
ಆದ್ರೆ ಇವರ ಸಂತಸ ಬಹಳ ದಿನ ಇರಲಿಲ್ಲ. ಉದ್ಘಾಟನೆಯಾದ ಕೆಲವೇ ದಿನಗಳಲ್ಲಿ ಪ್ರೀ-ಪೇಡ್ ಆಟೋ ಸ್ಟ್ಯಾಂಡ್ ತನ್ನ ಕಾರ್ಯನಿರ್ವಹಣೆಯನ್ನು ಸ್ಥಗಿತಗಳಿಸಿದೆ.
ಪ್ರೀ-ಪೇಡ್ ಆಟೋ ಸ್ಟ್ಯಾಂಡ್ ಕಾರ್ಯ ನಿರ್ವಹಣೆ:
ಈ ಆಟೋ ಸೆಂಟರ್ನಲ್ಲಿ ಮೊದಲು ಆಟೋ ಚಾಲಕರು ತಮ್ಮ ಆಟೋವನ್ನು ರಿಜಿಸ್ಟರ್ ಮಾಡಿಸಿಕೊಳ್ಳಬೇಕು. ಅಲ್ಲಿ ತಮ್ಮ ಆಟೋದ ವಿವರ, ಚಾಲಕನ ವಿವರವನ್ನು ನೀಡಬೇಕು. ಅದರಂತೆ ಪ್ರಯಾಣಿಕರು ತಮ್ಮ ಪ್ರಯಾಣದ ಹಣವನ್ನು ಮೊದಲೆ ಸ್ಟ್ಯಾಂಡ್ನಲ್ಲಿ ಸಲ್ಲಿಕೆ ಮಾಡಬೇಕು. ನಂತರ ಪ್ರಯಾಣಿಕರು ಬಂದು ತಾವು ಹೋಗುವ ಮಾರ್ಗದ ಕುರಿತು ಸ್ಟ್ಯಾಂಡ್ನಲ್ಲಿ ತಿಳಿಸಿದರೆ ಸೀನಿಯಾರಿಟಿ ಮೇಲೆ ಆಟೋವನ್ನು ಕಳುಹಿಸಿ ಕೊಡಲಾಗುತ್ತದೆ. ಇಲ್ಲಿ ಆಟೋ ಮೀಟರ್ನಲ್ಲಿ ಬರುವಷ್ಟು ಹಣವನ್ನು ಮಾತ್ರ ಪ್ರಯಾಣಿಕರು ನೀಡಬೇಕು. ಅದೇ ರೀತಿ ಅಷ್ಟೇ ಹಣವನ್ನು ಆಟೋ ಚಾಲಕ ಪಡೆದುಕೊಳ್ಳಬೇಕು. ಆದರೆ, ಇದು ಆಟೋ ಚಾಲಕರಿಗೆ ನಷ್ಟವನ್ನುಂಟು ಮಾಡುತ್ತದೆ. ಹಾಗಾಗಿ ಇದಕ್ಕೆ ಸ್ಥಳೀಯ ಆಟೋ ಚಾಲಕರು ವಿರೋಧ ವ್ಯಕ್ತಪಡಿಸಿದ್ದಾರೆ ಎನ್ನಲಾಗಿದೆ.
ಪ್ರೀ-ಪೇಡ್ ಆಟೋ ಸೆಂಟರ್ ಚಾಲನೆ ಮಾಡುವಲ್ಲಿ ಪಾಲಿಕೆ ಹಾಗೂ ಪೊಲೀಸ್ ಇಲಾಖೆಯ ದಿವ್ಯ ನಿರ್ಲಕ್ಷ್ಯ ಎದ್ದು ಕಾಣುತ್ತಿದೆ. ಆಟೋ ಸ್ಟ್ಯಾಂಡ್ ಕಾರ್ಯಾರಂಭ ಮಾಡಿದರೆ ಪ್ರಯಾಣಿಕರ ಸುಲಿಗೆ ನಿಲ್ಲುತ್ತದೆ. ಇನ್ನು ಆಟೋ ಚಾಲಕರಿಂದ ನಡೆಯಬಹುದಾದ ಕ್ರೈಂ ಸಹ ನಿಲ್ಲುತ್ತದೆ. ಈ ಆಟೋ ಸ್ಟ್ಯಾಂಡ್ ಚಾಲನೆ ಮಾಡಿಸಿದ್ದೆ ಆದ್ರೆ ಪೊಲೀಸ್ ಇಲಾಖೆಯು ನೆಮ್ಮದಿಯಿಂದ ಇರಬಹುದಾಗಿದೆ. ಇದರಿಂದ ಹೊಸ ಎಸ್ಪಿಯಾಗಿ ಆಗಮಿಸಿರುವ ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಡಾ. ಅಶ್ವಿನಿ ಅವರು ಇತ್ತ ಗಮನ ಹರಿಸಿ ಪ್ರೀ- ಪೇಡ್ ಆಟೋ ಸ್ಟ್ಯಾಂಡ್ ಪ್ರಾರಂಭವಾಗುವಂತೆ ಮಾಡಬೇಕು ಎಂಬುದು ಪ್ರಯಾಣಿಕರ ಒತ್ತಾಯವಾಗಿದೆ.
