ಮೈಸೂರು: ಜುಬಿಲಿಯೆಂಟ್ ಜನರಿಕ್ ಫಾರ್ಮಾಸುಟಿಕಲ್ ಕಂಪನಿಗೆ ಚೀನಾದಿಂದ ಕಚ್ಚಾ ವಸ್ತುಗಳು ಬರುತ್ತಿವೆ. ಇದರಿಂದ ಕೊರೊನಾ ಸೋಂಕು ಭಾರತಕ್ಕೆ ಬಂದಿದೆ ಎಂದು ನಂಜನಗೂಡಿನ ಶಾಸಕ ಹರ್ಷವರ್ಧನ್ ಆರೋಪ ಮಾಡಿದ್ದಾರೆ.
ಸಚಿವ ಶ್ರೀರಾಮುಲು ಜೊತೆ ಇಂದು ಸಭೆಯಲ್ಲಿ ಚರ್ಚಿಸಿ ನಂತರ ಮಾಧ್ಯಮಗಳ ಜೊತೆ ಮಾತನಾಡಿದ ಅವರು, ಜುಬಿಲಿಯೆಂಟ್ ಕಂಪನಿಗೆ ಚೀನಾದಿಂದ ಕಚ್ಚಾ ವಸ್ತುಗಳು ಬರುತ್ತಿವೆ ಎಂದು ಅಲ್ಲಿಯ ನೌಕರನೇ ದೂರವಾಣಿಯಲ್ಲಿ ತಿಳಿಸಿದ್ದಾನೆ ಎಂದರು.
ಈ ಕುರಿತು ನನ್ನ ಮೇಲೆ ಹಲವು ರೀತಿಯ ಒತ್ತಡಗಳು ಬರುತ್ತಿವೆ. ಆದರೆ, ನನಗೆ ನನ್ನ ಕ್ಷೇತ್ರದ ಜನ ಮುಖ್ಯ. ಇದರಿಂದ ಹಿಂದೆ ಸರಿಯುವ ಪ್ರಶ್ನೆಯೇ ಇಲ್ಲ. ಜುಬಿಲಿಯೆಂಟ್ ಕಾರ್ಖಾನೆಯ ಮೇಲೆ ನಾನು ಮಾಡಿರುವ ಆರೋಪ ಸುಳ್ಳಲ್ಲ. ಈ ಅನಾಹುತಕ್ಕೆ ಯಾರು ಕಾರಣ ಅವರ ತಲೆದಂಡ ಆಗಲೇಬೇಕು. ನನ್ನ ಮೇಲೆ ಯಾವುದೇ ಒತ್ತಡ ಬಂದರು ನಾನು ಬಗ್ಗುವುದಿಲ್ಲ ಎಂದರು.
ಈ ಕಂಪನಿಯ ಉತ್ಪಾದನೆ ಸರಿಯಿಲ್ಲ ಎಂದು ಅಮೆರಿಕವೇ ನೋಟಿಸ್ ಕೊಟ್ಟಿದೆ. ಈ ಕಂಪನಿಯ ಬಗ್ಗೆ ಗೂಗಲ್ನಲ್ಲಿರುವ ವೆಬ್ಸೈಟ್ನಲ್ಲಿ ತಿಳಿಯಬಹುದು ಎಂದರು.
