ಹೈ-ರಿಸ್ಕ್ ರಾಜ್ಯದಿಂದ ಬಂದವರಿಗೆ ಮಾತ್ರ ಸಾಂಸ್ಥಿಕ ಕ್ವಾರಂಟೈನ್​..ಗಂಗಾವತಿ ಆರೋಗ್ಯಾಧಿಕಾರಿ

ಇಷ್ಟು ದಿನಗಳ ಕಾಲ ಹೊರ ರಾಜ್ಯದಿಂದ ಬಂದ ಎಲ್ಲರನ್ನೂ 14 ದಿನಗಳು ಸಾಂಸ್ಥಿಕ ಕ್ವಾರಂಟೈನ್​​​ನಲ್ಲಿ ಇರಿಸಲಾಗುತ್ತಿತ್ತು. ಆದರೆ ರಾಜ್ಯ ಸರ್ಕಾರದ ಬದಲಾದ ಗೈಡ್​​ಲೈನ್ ಪ್ರಕಾರ 8 ರಾಜ್ಯಗಳಿಂದ ಬಂದವರನ್ನು ಮಾತ್ರ 7 ದಿನಗಳ ಕಾಲ ಕ್ವಾರಂಟೈನ್​​​​ನಲ್ಲಿ ಇಡಲಾಗುವುದು ಎಂದು ಗಂಗಾವತಿ ಆರೋಗ್ಯಾಧಿಕಾರಿ ಡಾ. ಚಕೋಟಿ ಶರಣಪ್ಪ ಮಾಹಿತಿ ನೀಡಿದ್ದಾರೆ.

ಗಂಗಾವತಿ(ಕೊಪ್ಪಳ): ಬದಲಾದ ಹೊಸ ಗೈಡ್​​​​ಲೈನ್​​​​​​​​​​​​​​​​​​​ ಪ್ರಕಾರ ಹೈ-ರಿಸ್ಕ್ ರಾಜ್ಯಗಳು ಎಂದು ಗುರುತಿಸಲಾದ ರಾಜ್ಯಗಳಿಂದ ಬಂದವರನ್ನು ಮಾತ್ರ ಇನ್ಮುಂದೆ ಸಾಂಸ್ಥಿಕ ಕ್ವಾರಂಟೈನ್​​​​ನಲ್ಲಿರಿಸಲಾಗುವುದು ಎಂದು ತಾಲೂಕು ಆರೋಗ್ಯಾಧಿಕಾರಿ ಡಾ. ಚಕೋಟಿ ಶರಣಪ್ಪ ಹೇಳಿದ್ದಾರೆ.

ಒಟ್ಟು 8 ರಾಜ್ಯಗಳನ್ನು ಹೈ-ರಿಸ್ಕ್ ಎಂದು ಗುರುತಿಸಲಾಗಿದೆ. ಮಹಾರಾಷ್ಟ್ರ, ತಮಿಳುನಾಡು, ಆಂಧ್ರಪ್ರದೇಶ, ಗುಜರಾತ್, ಮಧ್ಯಪ್ರದೇಶ, ಕೇರಳ, ದೆಹಲಿ ಮತ್ತು ರಾಜಸ್ಥಾನ ರಾಜ್ಯಗಳು ಈ ಪಟ್ಟಿಯಲ್ಲಿ ಸೇರಿವೆ. ಈ ರಾಜ್ಯದಿಂದ ಬಂದವರನ್ನು ಮಾತ್ರ 7 ದಿನಗಳ ಕಾಲ ಕ್ವಾರಂಟೈನ್​​​ನಲ್ಲಿ ಇಡಲಾಗುತ್ತದೆ. 5 ಅಥವಾ 7 ನೇ ದಿನಕ್ಕೆ ಸ್ಯ್ವಾಬ್ ಟೆಸ್ಟ್ ಮಾಡಿ ಯಾವುದೇ ಸಮಸ್ಯೆ ಕಾಣದಿದ್ದಲ್ಲಿ ಮನೆಗೆ ಕಳಿಸಲಾಗುವುದು.

8 ರಾಜ್ಯಗಳಿಂದ ಬಂದವರಿಗೆ ಮಾತ್ರ ಕ್ವಾರಂಟೈನ್

ಈ ರಾಜ್ಯಗಳನ್ನು ಹೊರತುಪಡಿಸಿ ಇತರ ರಾಜ್ಯಗಳಿಂದ ಬಂದವರು ಮನೆಯಲ್ಲೇ 14 ದಿನಗಳ ಕಾಲ ಕ್ವಾರಂಟೈನ್​​​​​ನಲ್ಲಿ ಇರಬೇಕಾಗುತ್ತದೆ. ಈಗಾಗಲೇ ತಮಿಳುನಾಡು, ಮಹಾರಾಷ್ಟ್ರ, ಆಂಧ್ರಪ್ರದೇಶ, ಕೇರಳ ಮೊದಲಾದ ರಾಜ್ಯದಿಂದ ಗಂಗಾವತಿಗೆ ಆಗಮಿಸಿದ್ದ 886 ಜನರ ಸ್ವ್ಯಾಬ್ ಟೆಸ್ಟ್ ಮಾಡಲಾಗಿದೆ. 14 ದಿನಗಳ ಕ್ವಾರಂಟೈನ್ ಬಳಿಕ 800 ಜನರನ್ನು ಬಿಡುಗಡೆ ಮಾಡಲಾಗಿದೆ ಎಂದು ಆರೋಗ್ಯಾಧಿಕಾರಿ ಮಾಹಿತಿ ನೀಡಿದರು.