ಸರ್ಕಾರಿ ಇಲಾಖೆಯ ವಾಹನದಲ್ಲೇ ಎಣ್ಣೆ ಕೊಳ್ಳಲು ಬಂದ ಚಾಲಕ

ಸರ್ಕಾರಿ ಇಲಾಖೆಯ ವಾಹನ ಚಾಲಕನೊಬ್ಬ ಇಲಾಖಾ ವಾಹನದಲ್ಲೇ ಮದ್ಯ ಕೊಳ್ಳಲು ವೈನ್​ ಶಾಪ್​ಗೆ ಬಂದಿದ್ದ ಘಟನೆ ಕೊಪ್ಪಳದಲ್ಲಿ ನಡೆದಿದೆ.

ಕೊಪ್ಪಳ: ಕೊಪ್ಪಳದಲ್ಲಿ ಕರ್ತವ್ಯದಲ್ಲಿದ್ದ ಸರ್ಕಾರಿ ಇಲಾಖೆಯೊಂದರ ವಾಹನ ಚಾಲಕ ಎಣ್ಣೆ ಖರೀದಿಸಲು ಸರ್ಕಾರಿ ವಾಹನದಲ್ಲೇ ಬಂದ ಘಟನೆ ನಡೆದಿದೆ.

ಕೆಎ 37, ಜಿ. 101 ನಂಬರ್ ನ ವಾಹನ ಚಾಲಕ ಕರ್ತವ್ಯದಲ್ಲಿ ಇರುವಾಗಲೇ ಮದ್ಯ ಕೊಂಡು ಕೊಳ್ಳಲು ವೈನ್​​ಸ್ಟೋರ್​​ಗೆ ಬಂ​ದಿದ್ದ. 'ಕೋವಿಡ್ ಎಮರ್ಜೆನ್ಸಿ ಕರ್ತವ್ಯ' ಎಂಬ ಸ್ಟಿಕ್ಕರ್ ಹೊಂದಿದ್ದ ಮಹಿಳಾ ಮತ್ತು ಮಕ್ಕಳ ಕಲ್ಯಾಣ ಇಲಾಖೆ ಇಲಾಖೆಯ ಸರ್ಕಾರಿ ವಾಹನದ ಚಾಲಕ ಸೈಯ್ಯದ್​ ನಗರದ ಬಸ್ ನಿಲ್ದಾಣದ ಬಳಿಯ ಮದ್ಯದಂಗಡಿ ಮುಂದೆ ಜೀಪ್‌ ನಿಲ್ಲಿಸಿ ಮದ್ಯದಂಗಡಿಗೆ ಮದ್ಯ ಖರೀದಿಸಲು ತೆರಳಿದ.

ಮಾಧ್ಯಮಗಳ ಕ್ಯಾಮೆರಾ ಕಂಡು ಮದ್ಯದಂಗಡಿಯಿಂದ ವಾಪಸ್​​ ಬಂದು ಅಲ್ಲಿಂದ ವಾಹನ ತೆಗೆದುಕೊಂಡು ಚಾಲಕ ಕಾಲ್ಕಿತ್ತಿದ್ದಾನೆ.