ಹಾಸನ : ಹೇಮಾವತಿ ನದಿ ಪಾತ್ರದ ಪಶ್ಚಿಮಘಟ್ಟ ಹಾಗೂ ಮಲೆನಾಡು ಭಾಗದಲ್ಲಿ ವರ್ಷಧಾರೆ ಇನ್ನೂ ತಗ್ಗಿಲ್ಲ. ಹಾಸನ ಭಾಗದಲ್ಲಿ ಮಳೆ ಪ್ರಮಾಣ ಕೊಂಚ ಪ್ರಮಾಣದಲ್ಲಿ ತಗ್ಗಿದ್ದರೂ ನೆರೆ ಮಾತ್ರ ನಿಂತಿಲ್ಲ.
ಜಿಲ್ಲೆಯ ಕೊಣನೂರಿನ ಕಾವೇರಿ ನದಿ ಕಳೆದ ಮೂರುದಿನಗಳಿಂದ ಮೈದುಂಬಿ ಹರಿಯುತ್ತಿದ್ದಾಳೆ. ಕಾವೇರಿ ನದಿಯ ಹರಿಯುವಿಕೆಯಿಂದ ಕೊಣನೂರು, ಕಟ್ಟೇಪುರ, ಮಾದಾಪುರ, ರಾಮನಾಥಪುರ, ಗೊಬ್ಬಳಿ, ಲಕ್ಕೂರು, ಕೇರಳಾಪುರ ಸೇರಿದಂತೆ 50ಕ್ಕೂ ಹೆಚ್ಚು ಹಳ್ಳಿಗಳ ಹೊಲಗದ್ದೆಗಳು ನೀರಿನಿಂದ ಜಲಾವೃತವಾಗಿವೆ. ಹೀಗಾಗಿ ರೈತಾಪಿ ವರ್ಗ ಸಂಕಷ್ಟಕ್ಕೆ ಸಿಲುಕಿದೆ.
ಇನ್ನು ಅರಕಲಗೂಡು ಭಾಗದಲ್ಲಿ ಹೆಚ್ಚಾಗಿ ತಂಬಾಕು, ಬಾಳೆ, ಅಡಿಕೆ, ಶುಂಠಿ ಸೇರಿದಂತೆ ಇನ್ನಿತರ ಬೆಳೆಗಳನ್ನು ಬೆಳೆಯಲಾಗುತ್ತದೆ. 57 ವರ್ಷಗಳಿಂದಲೂ ಕಂಡರಿಯದ ನೆರೆ ಕಳೆದ ವರ್ಷ ಮತ್ತು ಈ ವರ್ಷ ಕಾಣಿಸಿಕೊಂಡಿದೆ. ಈಗಾಗಲೇ ಮೇ ತಿಂಗಳಲ್ಲಿ ಸ್ವಲ್ಪ ಪ್ರಮಾಣದ ಮಳೆಯಾಗಿದ್ದರಿಂದ, ಅರಕಲಗೂಡು ಭಾಗದ ರೈತರು ತಂಬಾಕು, ಬಾಳೆ ಮತ್ತು ಶುಂಠಿ ಬೆಳೆದಿದ್ದರು. ಇದ್ದಕ್ಕಿದ್ದಂತೆ ಪ್ರವಾಹ ಎದುರಾಗಿದ್ದರಿಂದ ಎಲ್ಲಾ ಬೆಳೆಗಳು ನೀರಿನಲ್ಲಿ ಕೊಚ್ಚಿ ಹೋಗಿವೆ. ಬಾಳೆ ತೋಟಗಳು ಸಂಪೂರ್ಣ ಮುಳುಗಿವೆ.
