ವಾಹನ ಸವಾರರಿಗೆ ಹಾಸನ ಎಸ್​​ಪಿ ಕ್ಲಾಸ್​: ಅನಗತ್ಯ ಸಂಚಾರಕ್ಕೆ ದಂಡ

ಹಾಸನ ಎಸ್​​ಪಿ ಶ್ರೀನಿವಾಸಗೌಡ ಅನಗತ್ಯವಾಗಿ ರಸ್ತೆಗಿಳಿದ ವಾಹನಗಳನ್ನು ಸೀಜ್ ಮಾಡಿದ್ದು, ಸರ್ಕಾರದ ಆದೇಶ ಮೀರಿ ರಸ್ತೆಯಲ್ಲಿ ಸಂಚರಿಸುವವರ ವಿರುದ್ಧ ನಿಯಮ ಬಾಹಿರ ಚಟುವಟಿಕೆ ಆಧಾರದಲ್ಲಿ ಕೇಸ್​ ದಾಖಲಿಸಿದ್ದಾರೆ.

ಹಾಸನ: ಲಾಕ್​ಡೌನ್​​ ಹಿನ್ನೆಲೆಯಲ್ಲಿ ರಸ್ತೆಯಲ್ಲಿ ಅನವಶ್ಯಕವಾಗಿ ಓಡಾಡುವ ಬೈಕ್​ ಸವಾರರಿಗೆ ಹಾಸನ ಎಸ್​​ಪಿ ಶ್ರೀನಿವಾಸ ಗೌಡ ದಂಡ ವಿಧಿಸಿ ಎಚ್ಚರಿಕೆ ನೀಡಿದ್ದಾರೆ.

ಅನಗತ್ಯವಾಗಿ ರಸ್ತೆಗಿಳಿದವರ ವಾಹನಗಳನ್ನು ಸೀಜ್ ಮಾಡಿದ್ದು, ಸರ್ಕಾರದ ಆದೇಶ ಮೀರಿ ರಸ್ತೆಯಲ್ಲಿ ಸಂಚರಿಸುತ್ತಿದ್ದವರ ವಿರುದ್ಧ ನಿಯಮ ಬಾಹಿರ ಚಟುವಟಿಕೆ ಆಧಾರದಲ್ಲಿ ಕೇಸ್​ ದಾಖಲಿಸಿದ್ದಾರೆ. ಮೇ 3ರವರೆಗೆ ರಸ್ತೆಗಿಳಿಯದಂತೆ ವಾರ್ನಿಂಗ್ ನೀಡಿದ್ದು ದ್ವಿಚಕ್ರ ಮತ್ತು ನಾಲ್ಕು ಚಕ್ರದ ವಾಹನಗಳಿಗೆ ಸ್ಥಳದಲ್ಲೇ 500, 1000 ರೂ. ದಂಡ ವಿಧಿಸಿದ್ದಾರೆ.

ಈ ವೇಳೆ ಜಿಲ್ಲಾಧಿಕಾರಿ ಆರ್. ಗಿರೀಶ್ ವಾಹನ ತಪಾಸಣಾ ಸ್ಥಳಕ್ಕೆ ಭೇಟಿ ನೀಡಿ, ವಾಹನಗಳನ್ನು ಹೆಚ್ಚು ಸೀಜ್ ಮಾಡಬೇಡಿ. ಮತ್ತೆ ಬಿಡಿಸಿಕೊಳ್ಳಲು ಜನರು ಓಡಾಡುತ್ತಾರೆ. ಅವರಿಗೆ ಸ್ಥಳದಲ್ಲೇ ದಂಡ ವಿಧಿಸಿ ಎಂದು ಆದೇಶ ನೀಡಿದರು.