ಧಾರವಾಡ: ಕೊರೊನಾ ವೈರಸ್ ಭೀತಿ ದಿನದಿಂದ ದಿನಕ್ಕೆ ಹೆಚ್ಚುತ್ತಲೇ ಇದೆ. ಆದ್ರೆ ಈ ವೈರಸ್ ತಡೆಗಟ್ಟಲು ಸರ್ಕಾರ ಇನ್ನಿಲ್ಲದ ಶ್ರಮವಹಿಸುತ್ತಿದೆ. ಸೋಂಕಿತ ವ್ಯಕ್ತಿಯ ಟ್ರಾವೆಲ್ ಹಿಸ್ಟರಿ ಟ್ರ್ಯಾಕ್ ಮಾಡುವುದೇ ಜಿಲ್ಲಾಡಳಿತಕ್ಕೆ ಮೊದಲ ಸವಾಲು ಎನ್ನುವಂತಾಗಿತ್ತು. ಆದರೆ ಈ ಸಮಸ್ಯೆಗೆ ಈಗ ಸುಲಭ ಉಪಾಯವೊಂದು ಸಿಕ್ಕಿದೆ.
ಹೌದು, ನಗರದ 10 ನೇ ತರಗತಿ ವಿದ್ಯಾರ್ಥಿಯೊಬ್ಬ ಕೊರೊನಾ ಸೋಂಕಿತ ವ್ಯಕ್ತಿಯ ಟ್ರಾವೆಲ್ ಹಿಸ್ಟರಿ ಟ್ರ್ಯಾಕ್ ಮಾಡಬಲ್ಲ ಆ್ಯಪ್ ಅಭಿವೃದ್ಧಿಪಡಿಸಿದ್ದು, ಕೊರೊನಾ ವಿರುದ್ಧದ ಹೋರಾಟಕ್ಕೆ ಇದು ನೆರವಾಗಲಿದೆ.
ಜೆಎಸ್ಎಸ್ ಸೆಂಟ್ರಲ್ ಸ್ಕೂಲ್ನ 10ನೇ ತರಗತಿ ವಿದ್ಯಾರ್ಥಿ ಮನೋಜ್ ಶಿರಹಟ್ಟಿ ಆ್ಯಪ್ ಆವಿಷ್ಕರಿಸಿದ್ದಾರೆ. ಧಾರವಾಡದ ವಿದ್ಯಾರ್ಥಿ ಆ್ಯಪ್ ಇದೀಗ ಪಿಎಂಒ ಗಮನ ಸೆಳೆದಿದೆ. ಕೊರೊನಾ ಪಾಸಿಟಿವ್ ವ್ಯಕ್ತಿಯ ಟ್ರಾವೆಲ್ ಹಿಸ್ಟರಿ ಟ್ರ್ಯಾಕ್ ಮಾಡುವ ಆ್ಯಪ್ ಇದಾಗಿದ್ದು, ಕೋವಿಶಿಲ್ಡ್ ಎಂಬ ಹೆಸರಿನ ಆ್ಯಪ್ ರಚನೆ ಮಾಡಿದ್ದಾನೆ. ಲಾಕ್ಡೌನ್ ಸಮಯ ಉಪಯೋಗಿಸಿಕೊಂಡ ವಿದ್ಯಾರ್ಥಿ 2 ವಾರದಲ್ಲಿ ಆ್ಯಪ್ ಆವಿಷ್ಕಾರ ಮಾಡಿದ್ದಾನೆ.
ಮೊಬೈಲ್ ನಂಬರ್ ಮೂಲಕ ಕ್ಯೂ ಆರ್‌ ಕೋಡ್ ಆಧರಿಸಿ ಟ್ರ್ಯಾಕ್ ಮಾಡುವ ಆ್ಯಪ್ ಸಿದ್ಧವಾದ ಬಳಿಕ ಪ್ರಧಾನಮಂತ್ರಿ ಕಚೇರಿಗೆ ಮನೋಜ್ ಇದನ್ನು ಕಳುಹಿಸಿದ್ದರು. ಪ್ರಧಾನಿ ಮೋದಿ ಅವರ ಪಿಎಂಒ ಆ್ಯಪ್‌ನಲ್ಲಿ ಮನೋಜ್ ಮಾಹಿತಿ ಕಳುಹಿಸಿದ್ದರು.
ಇದೀಗ ಆ್ಯಪ್‌ಗೆ ಪಿಎಂ ಕಚೇರಿಯಿಂದ ಸ್ಪಂದನೆ ಸಿಕ್ಕಿದೆ. ಹೆಚ್ಚಿನ ಮಾಹಿತಿ ಕಲೆ ಹಾಕಲು ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಇಲಾಖೆಗೆ ನಿರ್ದೇಶನ ನೀಡಲಾಗಿದೆ.
