ದಾವಣಗೆರೆ: ನಮ್ಮೂರೇ ನಮಗೆ ಸವಿಬೆಲ್ಲ ಎಂಬ ಮಾತು ಅಕ್ಷರಶಃ ನಿಜ. ಎಷ್ಟೇ ಡಿಗ್ರಿ ತೆಗೆದುಕೊಂಡರೂ, ಎಂತಹ ಕೆಲಸದಲ್ಲೇ ಇದ್ದರೂ, ಯಾವುದೇ ಊರಿನಲ್ಲಿದ್ದರೂ ನಮ್ಮೂರಿನ ಮೇಲೆ ಇರುವ ಅಭಿಮಾನ ಮಾತ್ರ ಕಡಿಮೆಯಾಗೊಲ್ಲ. ನಮ್ಮೂರಿನ ವಿಶೇಷತೆಗಳ ಬಗ್ಗೆ ಎಲ್ಲರಿಗೂ ತಿಳಿಸಬೇಕೆಂಬ ಹಂಬಲವಿರುತ್ತೆ. ಹೀಗೆ ದಾವಣಗೆರೆಯ ಕೆಲ ವಿದ್ಯಾರ್ಥಿಗಳು ಸೇರಿ ತಮ್ಮೂರಿನ ವಿಶೇಷತೆಯ ಬಗ್ಗೆ ಬಹಳ ವಿಶೇಷ ರೀತಿಯಲ್ಲಿ ಜಗತ್ತಿಗೆ ತಿಳಿಸುವ ಪ್ರಯತ್ನ ಮಾಡಿದ್ದಾರೆ.
ದಾವಣಗೆರೆಯ ಎಂಜಿನಿಯರಿಂಗ್ ವಿದ್ಯಾರ್ಥಿಗಳು, 'ಬೆಣ್ಣೆ ದೋಸೆ ಊರು ನಮ್ದು, ನೀವು ಬಂದು ಒಮ್ಮೆ ನೋಡಿ. ಎಲ್ಲೆಲ್ಲಿಂದಲೋ ಬಂದು ಓದುವವರು ಇಲ್ಲಿ ಜಾಸ್ತಿ. ಖಾರಮಂಡಕ್ಕಿನೂ ಕ್ರೇಜು ನಮ್ಮೂರಲಿ ಇಟ್ಸ್ ದಾವಣಗೆರೆ ಇಟ್ಸ್ ದಾವಣಗೆರೆ' ಎಂದು ಗಿಟಾರ್ ಹಿಡಿದು ಹಾಡಿದ್ದಾರೆ.
ಇವರಿಗೆ ನಮ್ಮೂರಿನ ಬಗ್ಗೆ, ನಮ್ಮೂರಿನ ವಿಶೇಷತೆಯ ಬಗ್ಗೆ ಜಗತ್ತಿಗೆ ವಿಶಿಷ್ಟ ರೀತಿಯಲ್ಲಿ ತಿಳಿಸಿಕೊಡಬೇಕೆಂಬ ಹಂಬಲವಿದ್ದು, ಇದಕ್ಕಾಗಿ ತಮ್ಮದೇ ಒಂದು ತಂಡವನ್ನು ಕಟ್ಟಿಕೊಂಡು "ಇಟ್ಸ್ ದಾವಣಗೆರೆ" ಅನ್ನೋ ಆಲ್ಬಂ ಸಾಂಗ್ ಒಂದನ್ನ ಚಿತ್ರೀಕರಿಸಿದ್ದಾರೆ. ದಾವಣಗೆರೆ ನಗರದ ಹಾಗೂ ಜಿಲ್ಲೆಯ ಹಲವು ವಿಶೇಷತೆಗಳನ್ನು ಈ ಆಲ್ಬಂ ಸಾಂಗ್ನಲ್ಲಿ ತೋರಿಸಲಾಗಿದೆ. ಇದಕ್ಕೆ ಸಾಹಿತ್ಯ, ಸಂಗೀತ, ನಿರ್ದೇಶನ ಹಾಗೂ ಸಂಕಲನ ಕೆಲಸಗಳನ್ನು ಇದೇ ವಿದ್ಯಾರ್ಥಿಗಳ ತಂಡ ಮಾಡಿದೆ. ಹಾಲೇಶ್, ಸುಶ್ಮಿತಾ, ಸನತ್, ಕಾರ್ತಿಕ್ ಸೇರಿದಂತೆ ಯುವಕರ ತಂಡ ಅದ್ಭುತವಾಗಿ ಆಲ್ಬಂ ತಯಾರಿಸಿದ್ದು, ಆಲ್ಬಂಬ್ ಬಿಡುಗಡೆ ಮಾಡಿದೆ.
ವಿವಿಧ ಸ್ಥಳಗಳ ವೈಭವ
'ಬ್ರಾಂಡ್ ಸ್ಟುಡಿಯೋ' ಎಂಬ ಟೀಮ್ನವರು ಇಟ್ಸ್ ದಾವಣಗೆರೆ ಆಲ್ಬಂ ಅನ್ನು ಱಂಪ್, ಸೆಮಿ ಕ್ಲಾಸಿಕಲ್, 'ಲಾಸ್ಟ್ ಲೀಫ್' ಎಂಬ ಬ್ಯಾಂಡ್ ಅವರು ರಾಕ್ ಬ್ಯಾಂಡ್ ಶೈಲಿಯ ಮಿಶ್ರಣಗಳನ್ನ ಬೆರೆಸಿ ತಯಾರಿಸಲಾಗಿದೆ. ಇದಕ್ಕಾಗಿ ಈ ವಿದ್ಯಾರ್ಥಿಗಳೂ ಹಲವು ದಿನಗಳ ಕಾಲ ಊಟ ನಿದ್ರೆ ಅನ್ನದೆ ಶ್ರಮವಹಿಸಿ ಸಾಂಗ್ ತಯಾರಿಸಿದ್ದಾರೆ. ಸುಮಾರು 80 ಸಾವಿರ ಖರ್ಚಿನಲ್ಲಿ ಈ ಸಾಂಗ್ ನಿರ್ಮಾಣ ಮಾಡಿದ್ದು, ದಾವಣಗೆರೆ ಪ್ರಮುಖ ಆಕರ್ಷಣೆಗಳಾದ ಗಾಜಿನ ಮನೆ, ಕುಂದುವಾಡ ಕೆರೆ, ಬೆಣ್ಣೆ ದೋಸೆ, ಮಿರ್ಚಿ ಮಂಡಕ್ಕಿಯ ಜೊತೆಗೆ ನಗರದ ಪ್ರಮುಖ ವೃತ್ತಗಳನ್ನು ಚಿತ್ರೀಕರಿಸಿದ್ದಾರೆ. ನಾವು ಹುಟ್ಟಿ ಬೆಳೆದ, ಓದಿದ ಊರಿನ ವಿಶೇಷತೆಗಳನ್ನ ವಿಭಿನ್ನ ರೀತಿಯಲ್ಲಿ ಜನರಿಗೆ ಜಗತ್ತಿಗೆ ತಿಳಿಸಬೇಕು ಅನ್ನೋ ಉದ್ದೇಶದಿಂದ ಈ ಆಲ್ಬಂ ಸಿದ್ದಪಡಿಸಲಾಗಿದ್ದು, ಜನರು ಇದನ್ನ ನೋಡಿ ಹಾರೈಸಬೇಕು ಅಂತ ವಿದ್ಯಾರ್ಥಿ ಮನವಿ ಮಾಡಿದ್ದಾರೆ.
ಒಂದೇ ರಾತ್ರಿಗೆ 4 ಲಕ್ಷ ಲೈಕ್
ಒಟ್ಟಿನಲ್ಲಿ ವಿವಿಧ ಜನರು ವಿವಿಧ ರೀತಿಯಲ್ಲಿ ತಮ್ಮ ಊರಿನ ಬಗ್ಗೆ ತಿಳಿಸುವ ಪ್ರಯತ್ನ ಮಾಡ್ತಾರೆ. ಆದರೆ, ಈ ವಿದ್ಯಾರ್ಥಿಗಳು ಹಲವು ರೀತಿಯ ಸಂಗೀತದ ಪ್ರಕಾರಗಳ ಮೂಲಕ ದಾವಣಗೆರೆಯ ವಿಶೇಷತೆ ತೋರಿಸಲು ಮಾಡಿರುವ ಪ್ರಯತ್ನಕ್ಕೆ ಈಗಾಗಲೇ ಯೂ ಟ್ಯೂಬ್ನಲ್ಲಿ ಒಂದೇ ರಾತ್ರಿಗೆ 4 ಲಕ್ಷಕ್ಕೂ ಹೆಚ್ಚು ಲೈಕ್ ಸಿಕ್ಕಿದೆ.
