ಮೇಯರ್ ಗದ್ದುಗೆ ಹಿಡಿಯಲು ಬಿಜೆಪಿಯವರು ಅಡ್ಡ‌ ದಾರಿ‌ ಹಿಡಿದಿದ್ದಾರೆ: ಎ.ನಾಗರಾಜ್

ಮತದಾರರ ಪಟ್ಟಿಗೆ ಸಚಿವ ಆರ್​.ಶಂಕರ್​ ಹೆಸರು ಸೇರ್ಪಡೆಗೆ ಸಂಬಂಧಪಟ್ಟಂತೆ ದಾವಣಗೆರೆ ಪಾಲಿಕೆಯಲ್ಲಿ ಬಿಜೆಪಿ-ಕಾಂಗ್ರೆಸ್​ ನಡುವೆ ವಾಗ್ವಾದ ಮುಂದುವರೆದಿದ್ದು, ಮೇಯರ್​ ಹೇಳಿಕೆಗೆ ಪಾಲಿಕೆ ಪ್ರತಿಪಕ್ಷ ನಾಯಕ ತಿರುಗೇಟು ನೀಡಿದ್ದಾರೆ.

ದಾವಣಗೆರೆ: ಮೇಯರ್ ಗದ್ದುಗೆ ಹಿಡಿಯಲು ಬಿಜೆಪಿಯವರು ಅಡ್ಡ‌ದಾರಿ‌ ಹಿಡಿದಿದ್ದಾರೆ. ಸ್ಥಳೀಯರಲ್ಲದ ಎಂಎಲ್‌ಸಿಗಳನ್ನು ಮತದಾರರ ಪಟ್ಟಿಯಲ್ಲಿ ಸೇರ್ಪಡೆ ಮಾಡುತ್ತಿದ್ದಾರೆ ಎಂದು ಪಾಲಿಕೆ ವಿಪಕ್ಷ ನಾಯಕ ಎ.‌ನಾಗರಾಜ್ ಮತ್ತೆ ಅಕ್ರೋಶ ವ್ಯಕ್ತಪಡಿಸಿದ್ದಾರೆ.

ಮಹಾನಗರ ಪಾಲಿಕೆಯಲ್ಲಿ ಮಾತನಾಡಿದ ಅವರು, ಮತದಾರರ ಪಟ್ಟಿ ಸೇರ್ಪಡೆಗೆ ಅಗತ್ಯ ಕಾನೂನು ಕ್ರಮ ಅನುಸರಿಸುತ್ತಿಲ್ಲ. ತರಾತುರಿಯಲ್ಲಿ ದಾವಣಗೆರೆ ಮತದಾರರ ಪಟ್ಟಿಯಲ್ಲಿ ಸ್ಥಳೀಯರಲ್ಲದವರನ್ನು ಸೇರ್ಪಡೆ ಮಾಡಿದ್ದಾರೆ. ಅನ್​​ಲೈನ್​​ ಮೂಲಕ ಸಚಿವ ಆರ್.‌ಶಂಕರ್ ಅವರ ಹೆಸರನ್ನು ಮತದಾರರ ಪಟ್ಟಿಯಲ್ಲಿ ಸೇರಿಸಿದ್ದೇವೆ ಎಂದು ಬಿಜೆಪಿಯವರು ಹೇಳುತ್ತಿದ್ದಾರೆ. ಆದರೆ ದಾವಣಗೆರೆಯ ಅಂತಿಮ ಮತದಾರರ ಪಟ್ಟಿಯಲ್ಲಿ ಆರ್.ಶಂಕರ್​ ಹೆಸರು ಇಲ್ಲ ಎಂದು ಆರೋಪಿಸಿದ್ದಾರೆ.

ಹಾವೇರಿಯ ರಾಣೆಬೆನ್ನೂರು ತಹಶೀಲ್ದಾರ್​ ನೀಡಿರುವ ಮತದಾರರ ಪಟ್ಟಿಯಲ್ಲಿ ಆರ್​.ಶಂಕರ್​ ಅವರ ಹೆಸರು ಇದೆ. ಇದಕ್ಕೆ ಸಂಬಂಧಪಟ್ಟ ಅಗತ್ಯ ದಾಖಲೆಗಳು ನಮ್ಮಲ್ಲಿವೆ. ಸಚಿವರೊಬ್ಬರ ಹೆಸರು ಎರಡು ಕ್ಷೇತ್ರಗಳ ಮತದಾರರ ಪಟ್ಟಿಯಲ್ಲಿ ನೋಂದಾಯಿಸಿರುವುದು ಅಪರಾಧ ಆಗುತ್ತದೆ. ಎಂಎಲ್‌ಸಿಗಳು ಸಂಚಾರಿ ಮತದಾರರಾಗಿದ್ದಾರೆ, ಅವರು ಮತದಾನಕ್ಕೆ ಆಗಮಿಸಬಾರದು. ಕಾನೂನು ಉಲ್ಲಂಘಿಸಿದ್ರೆ ಸಚಿವ ಆರ್​. ಶಂಕರ್ ವಿರುದ್ಧ ಹೈಕೋರ್ಟ್‌ ಮೊರೆ ಹೋಗುತ್ತೇವೆ. ಶಂಕರ್ ​ಅವರ ಎಂಎಲ್‌ಸಿ ಸ್ಥಾನ ರದ್ದಾಗುವವರೆಗೂ ಹೋರಾಡುತ್ತೇವೆ ಎಂದು ಎ.ನಾಗರಾಜ ಎಚ್ಚರಿಕೆ ನೀಡಿದರು.