ಮಂಗಳೂರು: ತನ್ನ ಮತ್ತು ತಂಗಿಯ ಮದುವೆಗೆ ಬೇಕಾಗಿ ದುಡಿದ ದುಡ್ಡು ಸಿಗದೆ, ರಜೆಯು ಸಿಗದೆ ದಿಗಿಲುಗೊಂಡು ಮಾನಸಿಕ ಅಸ್ವಸ್ಥನಾದ ಯುವಕನನ್ನು ಗುಣಪಡಿಸಿ ಮತ್ತೆ ಕುಟುಂಬದ ತೆಕ್ಕೆಗೆ ನೀಡುವಲ್ಲಿ ಮಂಗಳೂರಿನ ವೈಟ್ ಡೌಸ್ ಯಶಸ್ವಿಯಾಗಿದೆ. ಉತ್ತರಪ್ರದೇಶದ ಅಲಹಾಬಾದ್ನ ಮೊಹಮ್ಮದ್ ಆಯುಬ್ ಎಂಬವರ ಪುತ್ರ ಶಿಬು ಯಾನೆ ಮೊಹಮ್ಮದ್ ತೊಯಿಬ್ ಎಂಬ ಯುವಕ ಮಂಗಳೂರಿನ ವೈಟ್ ಡೌಸ್ನಲ್ಲಿ ಮಾನಸಿಕ ಅಸ್ವಸ್ಥತೆಯಿಂದ ಗುಣಮುಖನಾಗಿದ್ದಾನೆ.
ಅಲಹಾಬಾದ್ನ ಶಿಬು ಶಿವಕಾಶಿಯಲ್ಲಿ ಕ್ಯಾಲೆಂಡರ್ ತಯಾರಿಸುವ ಸಂಸ್ಥೆಯೊಂದರಲ್ಲಿ ಕೆಲಸ ಮಾಡುತ್ತಿದ್ದ. ಈತನ ಸೋದರಿಗೆ ಮದುವೆ ನಿಶ್ಚಯವಾಗಿತ್ತು. ಆಕೆಯ ಮದುವೆಯ ಬಳಿಕ ಈತನಿಗೂ ಮದುವೆ ಮಾಡಲು ಯುವತಿ ನೋಡಲಾಗಿತ್ತು. ಮದುವೆಯ ತಯಾರಿಯ ಹಿನ್ನೆಲೆಯಲ್ಲಿ ಶಿಬು ತಾನು ಕೆಲಸ ಮಾಡುವ ಸಂಸ್ಥೆಯಲ್ಲಿ ರಜೆ ಮತ್ತು ದುಡಿದ ಹಣ ಕೇಳಿದ್ದ. ಆದರೆ ಸಂಸ್ಥೆ ಎರಡನ್ನೂ ನೀಡಲು ನಿರಾಕರಿಸಿತ್ತು.
ಇದರಿಂದ ದಿಗಿಲುಗೊಂಡ ಈತ ರೈಲ್ವೆ ಸ್ಟೇಷನ್ಗೆ ಹೋಗಿ ರೈಲು ಹತ್ತಿದ್ದಾನೆ. ತೀರಾ ಆತಂಕದಿಂದ ಮಾನಸಿಕ ಸ್ಥಿಮಿತ ಕಳೆದುಕೊಂಡು ಅಸ್ವಸ್ಥನಾಗಿದ್ದಾನೆ. ಹೀಗೆ ರೈಲು ಹತ್ತಿ ಬಂದವನು ಮಂಗಳೂರು ತಲುಪಿದ್ದಾನೆ. ಮಂಗಳೂರು ನಗರದಲ್ಲಿ ಸುಮಾರು ನಾಲ್ಕು ದಿನಗಳಿಂದ ಮಾನಸಿಕ ಅಸ್ವಸ್ಥನಾಗಿ ಬೀದಿ ಬೀದಿ ಅಳೆಯುತ್ತಿದ್ದ ಈತನನ್ನು 2019 ಮೇ ತಿಂಗಳಲ್ಲಿ ನಿರ್ಗತಿಕರಿಗೆ ನೆರವಾಗುವ ನಗರದ ವೈಟ್ ಡೌಸ್ ಸಂಸ್ಥೆಯ ಕೊರಿನ್ ರಸ್ಕಿನ್ ಅವರು ಗಮನಿಸಿ ತಮ್ಮ ಸಂಸ್ಥೆಗೆ ಕರೆದುಕೊಂಡು ಬಂದು ಚಿಕಿತ್ಸೆ ನೀಡಿದ್ದಾರೆ.
ತನ್ನ ಹೆಸರು ಬಿಟ್ಟು ಬೇರೇನೂ ಹೇಳ್ತಿರಲಿಲ್ಲ: ಸುಮಾರು ಮೂರು ವರ್ಷದಿಂದ ಈತ ತನ್ನ ಹೆಸರು ಶಿಬು ಎಂಬುದನ್ನು ಬಿಟ್ಟು ಬೇರೇನೂ ಹೇಳುತ್ತಿರಲಿಲ್ಲ. ಇತ್ತೀಚೆಗೆ ಆತನಿಗೆ ತನ್ನ ನೆನಪಿನ ಶಕ್ತಿ ಮರಳಿ ಬಂದಿದ್ದು, ಅಲಹಬಾದ್ನಲ್ಲಿ ತಾನು ಕಲಿತ ಶಾಲೆಯ ಹೆಸರನ್ನು ಹೇಳಿದ್ದಾನೆ. ಅಸ್ಪಷ್ಟವಾಗಿದ್ದ ಅವನ ಶಾಲೆಯ ಹೆಸರನ್ನು ಹುಡುಕಿ ವೈಟ್ ಡೌಸ್ ಸಂಸ್ಥೆ ಮ್ಯಾನೇಜರ್ ಅವರು ದೂರವಾಣಿ ಮೂಲಕ ಶೋಧ ನಡೆಸಿದರು.
ದೂರವಾಣಿಯಲ್ಲಿ ಅವನು ಹೇಳಿದ ಶಾಲೆ ಗೊತ್ತಾಗದಿದ್ದರೂ ಶಾಲೆಯವರ ಮೂಲಕ ಶಿಬುವಿನ ಗ್ರಾಮದ ಸರಪಂಚರನ್ನು ಸಂಪರ್ಕಿಸಲು ಸಾಧ್ಯವಾಯಿತು. ಆ ಮೂಲಕ ಶಿಬುವಿನ ತಂದೆಯ ಮೊಬೈಲ್ ನಂಬರ್ ಪತ್ತೆಯಾಗಿತ್ತು. ತನ್ನ ಮಗ ಮಂಗಳೂರಿನಲ್ಲಿ ಇರುವ ವಿಚಾರ ತಿಳಿದ ಮೊಹಮ್ಮದ್ ಆಯುಬ್ ಅವರು ಕೂಡಲೇ ಅಲಹಬಾದ್ನಿಂದ ರೈಲು ಹತ್ತಿ ಮಂಗಳೂರಿಗೆ ಬಂದಿದ್ದಾರೆ.
ಮೊಹಮ್ಮದ್ ಅಯುಬ್ ಅವರು ಮಂಗಳೂರಿನಲ್ಲಿ ವೈಟ್ ಡೌಸ್ನಲ್ಲಿ ಮಗನನ್ನು ಕಂಡು, ಶಿಬು ತನ್ನ ತಂದೆಯನ್ನು ಕಂಡು ಭಾವುಕರಾದರು. ಅಪ್ಪುಗೆಯೊಂದಿಗೆ ತಾವು ಕಳೆದುಕೊಂಡ ಕ್ಷಣಕ್ಕಾಗಿ ದುಖಪಟ್ಟರು. ಆತ್ಮೀಯತೆಯ ಈ ಕ್ಷಣ ಎಲ್ಲರ ಕಣ್ಣನ್ನು ತೇವಗೊಳಿಸಿತು.
ಶಿಬುವಿಗಾಗಿ ದೇಶದೆಲ್ಲಡೆ ಸುತ್ತಾಡಿದ್ದ ತಂದೆ: ಕಳೆದು ಹೋದ ಶಿಬುವಿಗಾಗಿ ಈತನ ತಂದೆ ದೇಶದ ವಿವಿಧೆಡೆ ತೆರಳಿದ್ದಾರೆ. ಲಕ್ಷಾಂತರ ಖರ್ಚು ಮಾಡಿ ಹುಡುಕಾಡಿದ್ದಾರೆ. ಆದರೆ, ಶಿಬು ಎಲ್ಲಿಯೂ ಸಿಗದೆ ಕಣ್ಣೀರಿನಲ್ಲಿ ಮೂರು ವರ್ಷ ಕಳೆದಿದ್ದಾರೆ. ಈತನಿಗಾಗಿ ಈತನ ತಾಯಿ ನಿತ್ಯ ರೋಧಿಸುತ್ತಿದ್ದು, ಇಂದು ತಂದೆಯ ಪೋನ್ ಮೂಲಕ ತಾಯಿ ಜೊತೆಗೆ ವಿಡಿಯೋ ಕಾಲ್ ಮಾಡಿ ಮಾತಾಡಿದ್ದಾನೆ.
ಶಿಬು ವೈಟ್ ಡೌಸ್ನಲ್ಲಿ ಎಲ್ಲರೊಂದಿಗೆ ಆತ್ಮೀಯವಾಗಿ ಬೆರೆಯುತ್ತಿದ್ದ. ಈತ ಇಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದ ನಿರ್ಗತಿಕರಲ್ಲಿ ಒಬ್ಬನಾಗಿ ಚಿಕಿತ್ಸಾ ಕೇಂದ್ರದಲ್ಲಿ ನೀರಿನ ಜವಾಬ್ದಾರಿ ವಹಿಸಿದ್ದ. ಈತ ಮರಳಿ ತನ್ನ ಮನೆಗೆ ಹೋಗುತ್ತಿರುವುದು ಎಲ್ಲರ ಖುಷಿಗೆ ಕಾರಣವಾಗಿತ್ತು. ಎಲ್ಲರೂ ಈತನನ್ನು ಆತ್ಮೀಯವಾಗಿ ಬೀಳ್ಕೊಟ್ಟಿದ್ದಾರೆ.
ಶಿಬು ಕೂಡ ಗೇಟಿನ ಹೊರಗಡೆ ಕಣ್ಣೀರಿಡುತ್ತಲೇ ತನ್ನ ತಂದೆ ಜೊತೆಗೆ ಅಲಹಬಾದ್ಗೆ ಹೊರಟಿದ್ದಾನೆ. ಶಿಬು ಊರಿಗೆ ಹೋಗಿ ಮದುವೆಯಾಗುವ ಇಚ್ಛೆಯನ್ನು ಹೊಂದಿದ್ದಾನೆ. ಇದು ಮಂಗಳೂರಿನ ವೈಟ್ ಡೌಸ್ ಸಂಸ್ಥೆ ಮೂಲಕ 398 ನೇ ನಿರ್ಗತಿಕರನ್ನು ಮನೆಯವರಿಗೆ ಸೇರಿಸಿದ ಪ್ರಕರಣವಾಗಿದೆ.
ಇದನ್ನೂ ಓದಿ: ಕಳೆದುಹೋದ ಮಗುವನ್ನು ಹುಡುಕುತ್ತ ಮಾನಸಿಕ ಅಸ್ವಸ್ಥಳಾದ ತಾಯಿ.. ಚಿಕಿತ್ಸೆ ಬಳಿಕ ಮಹಿಳೆ ಗುಣಮುಖ
