ಮಂಗಳೂರು: ಅಮೆರಿಕದಲ್ಲಿ 10,000 ಮಂದಿಗೆ 7 ಜನರ ಹಾಗೆ ಫಿಸಿಯೋಥೆರಪಿಸ್ಟ್‌ಗಳು ಇದ್ದಾರೆ. ಆದರೆ, ಭಾರತದಲ್ಲಿ ಇರೋದು 10 ಸಾವಿರಕ್ಕೆ 0.05 ಮಂದಿ ಮಾತ್ರ. ವರ್ಷಂಪ್ರತಿ ರಾಜ್ಯದಲ್ಲಿ 10,000 ವೈದ್ಯಕೀಯ ವಿದ್ಯಾರ್ಥಿಗಳು ಶಿಕ್ಷಣ ಮುಗಿಸಿ ಹೊರ ಬರುತ್ತಿದ್ದಾರೆ. ಆದರೆ, ದೇಶದಲ್ಲಿನ ಜನಸಂಖ್ಯೆಗನುಗುಣವಾಗಿ ಫಿಸಿಯೋಥೆರಪಿಸ್ಟ್‌ಗಳ ಕೊರತೆಯಿದೆ. ಅದನ್ನು ನೀಗಿಸುವ ಪ್ರಯತ್ನ ಆಗಬೇಕಾಗಿದೆ ಎಂದು ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಮತ್ತು ವೈದ್ಯಕೀಯ ಶಿಕ್ಷಣ ಸಚಿವ ಡಾ. ಕೆ. ಸುಧಾಕರ್ ಹೇಳಿದರು.
ನಗರದ ಟಿಎಂಎ ಪೈ ಸಭಾಂಗಣದಲ್ಲಿ ದಕ್ಷಿಣ ಕನ್ನಡ ಫಿಸಿಯೋಥೆರಪಿ ಬೋಧಕರ ಸಂಘದ ವತಿಯಿಂದ ಆಯೋಜಿಸಿರುವ ಮಂಗಳೂರು ಫಿಸಿಯೋಕಾನ್ - 2022ರ ಅಧ್ಯಕ್ಷತೆವಹಿಸಿ ಮಾತನಾಡಿದ ಅವರು, 19ನೇ ಶತಮಾನದಿಂದೀಚೆಗೆ ವಿಶ್ವಕ್ಕೆ ಫಿಸಿಯೋಥೆರಪಿಯ ಮಹತ್ವ ಅರಿವಾಗಿದೆ. ಭಾರತವು ಪಂಚಕರ್ಮ, ಅಭ್ಯಂಗ ಸ್ನಾನದಂತಹ ಚಟುವಟಿಕೆಗಳ ಮೂಲಕ ಹಿಂದಿನಿಂದಲೂ ಫಿಸಿಯೋಥೆರಪಿ ಬಗ್ಗೆ ಅಪಾರ ಜ್ಞಾನವನ್ನು ಹೊಂದಿದೆ ಎಂದರು.
ಕಾರ್ಯಕ್ರಮಕ್ಕೆ ಚಾಲನೆ ನೀಡಿ ಮಾತನಾಡಿದ ಕೇರಳ ರಾಜ್ಯಪಾಲ ಆರಿಫ್ ಮಹಮ್ಮದ್ ಖಾನ್, ಪ್ರಕೃತಿ ನೀಡಿರುವ ಸುಂದರ ಜೀವನವು ಪ್ರತಿ ಹಂತಗಳಲ್ಲೂ ಬದಲಾವಣೆ ಆಗುತ್ತಿರುತ್ತದೆ. ಫಿಸಿಯೋಥೆರಪಿ ಕ್ಷೇತ್ರ ಕೂಡ ಆಯಾಯ ಕಾಲಘಟ್ಟಕ್ಕೆ ಅನುಗುಣವಾಗಿ ಆಧುನಿಕ ತಂತ್ರಜ್ಞಾನಗಳ ಬಗ್ಗೆ ತಿಳಿದು ಕೌಶಲ್ಯವನ್ನು ಮೇಲ್ದರ್ಜೆಗೇರಿಸಿಕೊಳ್ಳುವ ಅವಶ್ಯಕತೆ ಇದೆ ಎಂದು ಹೇಳಿದರು.
ನಾಲ್ಕೈದು ತಿಂಗಳುಗಳ ಅವಧಿಯಲ್ಲಿ ಕೇರಳಲ್ಲಿ ಮೂರು ವಿವಿಗಳ ಘಟಿಕೋತ್ಸವದಲ್ಲಿ ಭಾಗವಹಿಸಿದ್ದೆ. ಇದರಲ್ಲಿ ಚಿನ್ನದ ಪದಕ ಪಡೆದವರಲ್ಲಿ ಹಾಗೂ ಶ್ರೇಯಾಂಕ ಗಳಿಸಿದವರಲ್ಲಿ ಶೇ. 73ರಷ್ಟು ವಿದ್ಯಾರ್ಥಿಗಳು ಹೆಣ್ಣು ಮಕ್ಕಳು ಎಂಬುದು ಗಮನಾರ್ಹ. ವಯನಾಡ್‌ನ ಪಶು ವೈದ್ಯಕೀಯ ವಿವಿಯ ಘಟಿಕೋತ್ಸವದಲ್ಲಿ ಚಿನ್ನದ ಪದಕ ಪಡೆದ 23 ವಿದ್ಯಾರ್ಥಿಗಳಲ್ಲಿ ಓರ್ವ ಮಾತ್ರ ವಿದ್ಯಾರ್ಥಿಯಾಗಿರುವುದು ಮಹಿಳೆ ಸಬಲೀಕರಣಗೊಳ್ಳುತ್ತಿರುವ ವೇಗವನ್ನು ದೃಢಪಡಿಸಿದೆ ಎಂದರು.
ಇದೀಗ ಅತ್ಯಧಿಕ ಅಂಕ ಪಡೆದ ಈ ಸಮ್ಮೇಳನದಲ್ಲಿ ಸನ್ಮಾನಗೊಂಡ ಮೂರು ಮಂದಿಯೂ ವಿದ್ಯಾರ್ಥಿನಿಯರು ಎನ್ನುವುದು ಉಲ್ಲೇಖನೀಯ. ಮಹಿಳೆಯರನ್ನು ಶಿಕ್ಷಣ, ಹೊರ ಜಗತ್ತಿನಿಂದ ಹಿಂದಕ್ಕೆ ತಳ್ಳುತ್ತಿರುವವರು ಈ ಬಗ್ಗೆ ಆಲೋಚನೆ ಮಾಡಬೇಕಾಗಿದೆ ಎಂದು ಅವರು ಹೇಳಿದರು.
ಇದನ್ನೂ ಓದಿ: ಚುನಾವಣೆ ಸುಧಾರಣೆ ಕುರಿತು ಚರ್ಚೆಗೆ 2 ದಿನ ಫಿಕ್ಸ್: ಸ್ಪೀಕರ್ ಕಾಗೇರಿ
