ಮಾದರಿಯಾದ ಮಹಿಳೆಯರು: ಸ್ವಾವಲಂಬಿ ಜೀವನಕ್ಕೆ ಅಮೃತ ಸಂಜೀವಿನಿ ಒಕ್ಕೂಟ

ಬಂಟ್ವಾಳ ತಾಲೂಕಿನ ಸಂಗಬೆಟ್ಟು ಗ್ರಾಮ ವ್ಯಾಪ್ತಿಯ ಅಮೃತ ಸಂಜೀವಿನಿ ಹೆಸರಿನ ಒಕ್ಕೂಟ ವಿವಿಧ ಯೋಜನೆಗಳನ್ನು ಕೈಗೆತ್ತಿಕೊಂಡು ಯಶಸ್ವಿಯಾಗಿದೆ. ಮಹಿಳೆಯರು ಸ್ವಾವಲಂಬಿ ಜೀವನ ನಡೆಸಲು ಈ ಒಕ್ಕೂಟ ಸಹಕಾರಿಯಾಗಿದೆ.

ಬಂಟ್ವಾಳ: ಹಡಿಲು ಬಿದ್ದ ಕೃಷಿ ಭೂಮಿಯಲ್ಲಿ ಮತ್ತೆ ಕೃಷಿ ಮಾಡಲು ಸರ್ಕಾರ, ಸಹಕಾರ ಸಂಘಗಳು ಉತ್ತೇಜನ ನೀಡುತ್ತಿರುವ ಪ್ರಸ್ತುತ ದಿನಗಳಲ್ಲಿ ಇಲ್ಲಿನ ಮಹಿಳಾ ತಂಡ ಸ್ವ ಸಹಾಯ ಸಂಘಗಳ ಒಕ್ಕೂಟದ ಮೂಲಕ ಕೃಷಿ ಮಾಡಿ ತಾಲೂಕಿನಲ್ಲಿ ಪ್ರಥಮ ಸ್ಥಾನ ಪಡೆದ ಹೆಗ್ಗಳಿಕೆ ಹೊಂದಿದೆ. ಬಂಟ್ವಾಳ ತಾಲೂಕಿನ ಸಂಗಬೆಟ್ಟು ಗ್ರಾಮ ವ್ಯಾಪ್ತಿಯ ಅಮೃತ ಸಂಜೀವಿನಿ ಹೆಸರಿನ ಒಕ್ಕೂಟ ಈ ಹೆಗ್ಗಳಿಕೆಗೆ ಪಾತ್ರವಾಗಿದ್ದು, ಮಹಿಳೆಯರು ಉದ್ಯೋಗ ಮಾಡುವ ಮೂಲಕ ಗಮನ ಸೆಳೆದಿದ್ದಾರೆ.

ಲಾಕ್​ಡೌನ್​​ ಸಮಯದಲ್ಲಿ ಕೆಲಸವಿಲ್ಲದೆ ಸುಮ್ಮನೆ ಕಾಲಹರಣ ಮಾಡುವ ಬದಲು ಉದ್ಯೋಗ ಮಾಡುವ ನಿಟ್ಟಿನಲ್ಲಿ ಅಮೃತ ಸಂಜೀವಿನಿ ಒಕ್ಕೂಟ ವಿವಿಧ ಯೋಜನೆಗಳನ್ನು ಕೈಗೆತ್ತಿಕೊಂಡು ಯಶಸ್ವಿಯಾಗಿದೆ. ಕಳೆದ ವರ್ಷ ಲಾಕ್​ಡೌನ್​​ ಬಳಿಕ ಸಂಗಬೆಟ್ಟು ಗ್ರಾಮ ಪಂಚಾಯತ್​ನಲ್ಲಿ ಅಮೃತ ಸಂಜೀವಿನಿ ಒಕ್ಕೂಟದ ಸಮುದಾಯ ಸಂಪನ್ಮೂಲ ವ್ಯಕ್ತಿಗಳಾದ ಪ್ರೇಮಾ, ಬ್ಯಾಂಕ್ ಸಖಿ ವೇದಾವತಿ ಹಾಗೂ ಮುಖ್ಯ ಬರಹಗಾರ್ತಿ ಸುಕನ್ಯಾ ಅವರು ಸೇರಿ ಸಮಾಲೋಚನೆ ನಡೆಸಿ ಒಕ್ಕೂಟದ ಮೂಲಕ ಸಾಲ ನೀಡಿ ಕೃಷಿ ಅಭಿವೃದ್ಧಿ ಯೋಜನೆಯ ಯಶಸ್ಸಿಗೆ ಕಾರಣರಾಗಿದ್ದಾರೆ.

ಒಕ್ಕೂಟದಲ್ಲಿ ಒಟ್ಟು 59 ಗುಂಪುಗಳು ಕಾರ್ಯ ನಿರ್ವಹಿಸುತ್ತಿದ್ದು, 25 ಗುಂಪುಗಳು ಯೋಜನೆಯಲ್ಲಿ ಸಕ್ರಿಯವಾಗಿದೆ. 25 ತಂಡಗಳಲ್ಲಿ 4 ಗುಂಪಿನ ಸದಸ್ಯರು ಬ್ಯಾಂಕ್​ನಿಂದ ಸಾಲ ಪಡೆದು ಆರ್ಥಿಕ ಹಾಗೂ ಸಮುದಾಯ ಬಂಡವಾಳ ತೆಗೆದುಕೊಂಡು ಜೀವನೋಪಾಯ ಚಟುವಟಿಕೆ ಮಾಡಿಕೊಂಡು ಬರುತ್ತಿದ್ದಾರೆ. ಅಣಬೆ ಬೀಜವನ್ನು ಪಡೆದು ಮನೆ ಬಳಿಯೇ ಅಣಬೆ ಕೃಷಿ ಮಾಡಿ ಪ್ರಗತಿ ಹೊಂದಿದ್ದಾರೆ. ಇದಕ್ಕೆ 10 ಸಾವಿರ ರೂ. ಸಬ್ಸಿಡಿ ಪಡೆದುಕೊಂಡಿದ್ದಾರೆ. ಒಕ್ಕೂಟದ ಸದಸ್ಯರು ಸ್ಥಳೀಯರಾದ ಸುಮಲತಾ ಅವರು ಹಡಿಲು ಭೂಮಿಯಲ್ಲಿ ಪೊದರು ತುಂಬಿದ ಜಾಗವನ್ನು ಜೆಸಿಬಿ ಯಂತ್ರದಲ್ಲಿ ಸಮತಟ್ಟು ಮಾಡಿ ವಿವಿಧ ರೀತಿಯ ತರಕಾರಿ ಬೀಜವನ್ನು ಬಿತ್ತನೆ ಮಾಡಿ ತರಕಾರಿ ಕೃಷಿ ನಡೆಸಿದ್ದಾರೆ.

ಇದನ್ನೂ ಓದಿ: ಹಸಿರುವನ ಬೆಳೆಸಿ ಮನಗೆದ್ದಉಪನ್ಯಾಸಕ.. 1 ಎಕರೆ ಜಾಗದಲ್ಲಿ ಅಶ್ವತ್ಥ್ ಗಿಡಗಳನ್ನ ನೆಟ್ಟು ಪೋಷಣೆ

ಕಳೆದ 6 ತಿಂಗಳ ಅವಧಿಯಲ್ಲಿ 14 ಲಕ್ಷದ 50 ಸಾವಿರ ರೂ. ಸಾಲ ಪಡೆದು ಅದರ ಮೂಲಕ ಸದಸ್ಯರು ದಿನಸಿ ಅಂಗಡಿ, ಫಾಸ್ಟ್ ಫುಡ್, ಟೇಲರಿಂಗ್, ರೊಟ್ಟಿ ತಯಾರಿಕಾ ಘಟಕದಂತಹ ಸ್ವಾವಲಂಬಿ ಯೋಜನೆಯನ್ನು ರೂಪಿಸಿ ಅದರಲ್ಲಿ ಅಭಿವೃದ್ಧಿ ಹೊಂದಿ ಸಾಲ ಮರುಪಾವತಿ ಮಾಡಿದ್ದಾರೆ. ಅಮೃತ ಸಂಜೀವಿನಿ ಒಕ್ಕೂಟ ತನ್ನ ಕಾರ್ಯ ವೈಖರಿಗೆ 2021ರಲ್ಲಿ ನಡೆದ ಮಹಿಳಾ ದಿನಾಚರಣೆಯ ಕಾರ್ಯಕ್ರಮದಲ್ಲಿ ದಕ್ಷಿಣ ಕನ್ನಡ ಜಿಲ್ಲಾ ಪಂಚಾಯತ್ ನೇತ್ರಾವತಿ ಸಭಾಂಗಣದಲ್ಲಿ ತಾಲೂಕಿನಲ್ಲಿ ಪ್ರಥಮ ಸ್ಥಾನ ಪಡೆದು ಪುರಸ್ಕಾರವಾಗಿ ಒಂದೂವರೆ ಲಕ್ಷ ರೂ. ಅನ್ನು ತನ್ನ ಒಕ್ಕೂಟಕ್ಕೆ ಪಡೆದುಕೊಂಡಿರುತ್ತದೆ.

ಅಮೃತ ಸಂಜೀವಿನಿ ಒಕ್ಕೂಟವು ತನ್ನ ಸದಸ್ಯರಿಗೆ ಯಾವುದೇ ರೀತಿಯ ಕುಂದು ಕೊರತೆ ಬಾರದ ರೀತಿಯಲ್ಲಿ ನೋಡಿಕೊಳ್ಳುತ್ತಿದೆ. ಸಮುದಾಯ ಸಂಪನ್ಮೂಲ ವ್ಯಕ್ತಿ ಪ್ರೇಮಾ, ತಾಲೂಕು ಪಂಚಾಯತ್​​ನ ದೀಕ್ಷಿತಾ, ಕುಶಾಲಪ್ಪ, ಗ್ರಾಮ ಪಂಚಾಯತ್ ಅಭಿವೃದ್ಧಿ ಅಧಿಕಾರಿ ಪದ್ಮಾ ನಾಯ್ಕ ಹಾಗೂ ಸಿಬಂದಿ ವರ್ಗ ಒಕ್ಕೂಟದ ಕಾರ್ಯಗಳಿಗೆ ಸಂಪೂರ್ಣ ಸಹಕಾರ ನೀಡಿದ್ದಾರೆ.