ಮದ್ಯ ಇಲಿಗಳ ಪಾಲು... ಲಾಕ್​ಡೌನ್​ ವೇಳೆ ಕಿಕ್ಕೇರಿಸಿಕೊಂಡ ಕೊಳ್ಳೇಗಾಲದ ಮೂಷಿಕಗಳು!

ಕೊಳ್ಳೆಗಾಲದ ಸುರೇಶ್​ ಎಂಬ​ ಬಾರ್​ನಲ್ಲಿ ಮೂಷಿಕಗಳು 3 ಕೇಸಿನಷ್ಟು ಮದ್ಯದ ಬಾಟಲ್​ಗಳನ್ನು ತುಂಡರಿಸಿ ಎಣ್ಣೆ ಹೊಡೆದು ಕಿಕ್ಕೇರಿಸಿಕೊಂಡಿವೆ.

ಚಾಮರಾಜನಗರ: ಲಾಕ್​ಡೌನ್​ನಲ್ಲಿ ಎಣ್ಣೆ ಸಿಗದೆ ಕುಡಕರು ಚಡಪಡಿಸುತ್ತಿದ್ದರೆ ಮೂಷಿಕಗಳು ಎಣ್ಣೆ ಹೊಡೆದು ಕಿಕ್ಕೇರಿಸಿಕೊಂಡಿರುವ ಘಟನೆ ಕೊಳ್ಳೇಗಾಲದ ಸುರೇಶ್ ಬಾರ್​ನಲ್ಲಿ ನಡೆದಿದೆ‌.

ಬಾಗಿಲಿನ ಸಂದಿಯಿಂದ ಹರಿದು ಬರುತ್ತಿದ್ದ ಬ್ರಾಂದಿ, ವಿಸ್ಕಿಯನ್ನು ಕಂಡು ಬಾರ್ ಮಾಲೀಕ ಅಬಕಾರಿ ಇಲಾಖೆಗೆ ಮಾಹಿತಿ ನೀಡಿ ಅವರಿಂದಲೇ ಸೀಲ್ ಆಗಿದ್ದ ಬಾಗಿಲನ್ನು ತೆರೆಸಿದಾಗ ಇಲಿಗಳ ಕರಾಮತ್ತು ಬೆಳಕಿಗೆ ಬಂದಿದೆ.

ಲಾಕ್​ಡೌನ್​ನಿಂದ ಬಾರ್ ಬಂದ್​ ಆಗಿದ್ದರಿಂದ ಧೈರ್ಯವಾಗಿ ಇಲಿಗಳ ಹಿಂಡು 3 ಕೇಸಿನಷ್ಟು ಮದ್ಯದ ಬಾಟಲ್​ಗಳನ್ನು ತುಂಡರಿಸಿ ಅವಾಂತರಗೊಳಿಸಿವೆ ಎನ್ನಲಾಗ್ತಿದೆ. ಕೊನೆಗೆ, ಒಡೆದು ಹೋದ ಬಾಟಲ್​​​ಗಳನ್ನು ಬಿಸಾಡಿ ಬಾರ್ ಬಾಗಿಲನ್ನು ಅಬಕಾರಿ ಇಲಾಖೆ ಅಧಿಕಾರಿಗಳು ಮತ್ತೆ ಬಂದ್ ಮಾಡಿದ್ದಾರೆ.