ಚಾಮರಾಜನಗರ: ಕೊಳ್ಳೇಗಾಲ ತಾಲೂಕಿನ ಹಳೇ ಅಣಗಳ್ಳಿ ಗ್ರಾಮದಲ್ಲಿ ಮಹಿಷ ದಸರಾವನ್ನು ಗ್ರಾಮಸ್ಥರು ಆಚರಿಸಿ ಮಹಿಷಾಸುರ, ನಾಲ್ವಡಿ ಕೃಷ್ಣರಾಜ ಒಡೆಯರ್ ಹಾಗೂ ಡಾ.ಬಿ.ಆರ್.ಅಂಬೇಡ್ಕರ್ ಭಾವಚಿತ್ರವನ್ನು ಮೆರವಣಿಗೆ ಮಾಡಿ ಗಮನ ಸೆಳೆದರು.
ಗ್ರಾಮದ ಯಜಮಾನರು ಹಾಗೂ ರೈತಮುಖಂಡ ಅಣಗಳ್ಳಿ ಬಸವರಾಜು ನೇತೃತ್ವದಲ್ಲಿ ಹಳ್ಳಿ ದಸರಾ - ಮಹಿಷ ಹಬ್ಬವನ್ನು ಆಚರಿಸಿದರು. ಟ್ರ್ಯಾಕ್ಟರ್ ಮೂಲಕ ಮೂವರ ಭಾವಚಿತ್ರಗಳನ್ನು ಗ್ರಾಮದ ಎಲ್ಲ ಬೀದಿಗಳಲ್ಲಿ ಮೆರವಣಿಗೆ ಮಾಡಿ ಉತ್ಸವ ಆಚರಿಸಿದರು.
ಪರಂಪರೆ ಉಳಿಸಲು ಹಬ್ಬ: ರೈತ ಮುಖಂಡ ಅಣಗಳ್ಳಿ ಬಸವರಾಜು ಮಹಿಷ ಹಬ್ಬ ಕುರಿತು ಮಾತನಾಡಿ, ಮೈಸೂರಿನಲ್ಲಿ ದೊರೆ ಮಹಿಷ ನಮ್ಮ ರಾಜರಾಗಿದ್ದರು. ಆ ಕಾಲದಲ್ಲಿ ಜನಪರವಾಗಿ ಆಳ್ವಿಕೆ ನಡೆಸಿ ಜನರಿಗಾಗಿ ಪ್ರಾಣ ತೆತ್ತಿದ್ದಾರೆ. ರಾಜ್ಯಾದ್ಯಂತ ಮಹಿಷ ದಸರಾ ಆಚರಣೆಯಾಗಬೇಕಿದೆ ಎಂದರು.
ಹಿಂದಿನ ಚರಿತ್ರೆ, ಇತಿಹಾಸ ಮುಂದಿನ ಪೀಳಿಗೆಗೆ ಗೊತ್ತಾಗಲಿ ಎಂಬ ಉದ್ದೇಶದಿಂದ ಈ ಹಬ್ಬವನ್ನು ಜಾತ್ಯತೀತವಾಗಿ, ರಾಜಕೀಯವಿಲ್ಲದೇ ಮಾಡಲಾಗಿದೆ. ನಮ್ಮ ಮೈಸೂರು ಪ್ರಾಂತ್ಯವನ್ನಾಳಿದ ಮಹಿಷ ಎಲ್ಲರಿಗೂ ತಿಳಿಯಲಿ ಎಂಬ ಉದ್ದೇಶ ಇದಾಗಿದೆ. ನಾವು ಸ್ವತಂತ್ರ ಭಾರತದಲ್ಲಿದ್ದು, ಪೂಜಿಸುವುದು, ಮೆರವಣಿಗೆ ಮಾಡುವುದು ಅವರವರ ಆಯ್ಕೆಯಾಗಿದೆ. ಅದನ್ನು ಸ್ವತಂತ್ರವಾಗಿ ಬಿಡಬೇಕು ಎಂದು ಅಭಿಪ್ರಾಯಪಟ್ಟರು.
