ಚಾಮರಾಜನಗರ: ಹುಲಿ ಸಂರಕ್ಷಣೆಗೆ ಕೈಗೊಂಡ ಕ್ರಮಗಳು, ಅರಣ್ಯ ರಕ್ಷಣೆ ಜೊತೆಗೆ ಹುಲಿ ಅವಾಸ ಸ್ಥಾನಗಳ ಪರಿಣಾಮಕಾರಿ ಅಭಿವೃದ್ಧಿಗೆ ನೀಡಲಾಗುವ ಜಾಗತಿಕ ಸಂರಕ್ಷಣೆ ಭರವಸೆ/ ಟೈಗರ್ ಸ್ಟ್ಯಾಂಡರ್ಡ್ಸ್ ಸಿಎ/ಟಿಎಸ್ ಪ್ರಮಾಣ ಪತ್ರವನ್ನು ಬಂಡೀಪುರ ಹುಲಿ ಸಂರಕ್ಷಿತ ಪ್ರದೇಶಕ್ಕೆ ನೀಡಲಾಗಿದೆ.
ಹುಲಿ ದಿನಾಚರಣೆ ಪ್ರಯುಕ್ತ ಇಂದು ಕೇಂದ್ರ ಸಚಿವ ಭೂಪೇಂದ್ರ ಯಾದವ್, ದೇಶದ 14 ಹುಲಿ ಸಂರಕ್ಷಿತ ಪ್ರದೇಶಗಳಿಗೆ ಈ ಮಾನ್ಯತೆ ನೀಡಿದ್ದು ಇದರಲ್ಲಿ ಕರ್ನಾಟಕದ ಬಂಡೀಪುರ ಹುಲಿ ಸಂರಕ್ಷಿತ ಪ್ರದೇಶವೂ ಒಂದಾಗಿದೆ ಎಂದು ಹೇಳಿದ್ದಾರೆ. ಹುಲಿ ಸಂರಕ್ಷಣೆ ನಿರ್ವಹಣೆಯ ಉತ್ತಮ ಕ್ರಮಗಳನ್ನು ಅಂತಾರಾಷ್ಟ್ರೀಯ ಮಟ್ಟದ ತಜ್ಞರು ರೂಪಿಸಿದ್ದು, ಆ ಮಾನದಂಡಗಳಂತೆ ಸಂರಕ್ಷಣಾ ಕಾರ್ಯ ನಡೆದಿದ್ದರೆ ಈ ಮಾನ್ಯತೆ ದೊರೆಯಲಿದೆ.
ಇದನ್ನೂ ಓದಿ: ದೇಶದ 14 ಹುಲಿ ಸಂರಕ್ಷಿತ ಪ್ರದೇಶಗಳಿಗೆ ಜಾಗತಿಕ ಮಾನ್ಯತೆ: ಬಂಡೀಪುರ ಕೂಡ ಅತ್ಯುತ್ತಮ
ಏನಿದು ಸಿಎ/ಟಿಎಸ್ ಮಾನದಂಡ?
ಸಿಎ/ಟಿಎಸ್ ಮಾನದಂಡವು ಜಾಗತಿಕವಾಗಿ ಒಪ್ಪಿದ ಹುಲಿಗಳ ಸಂರಕ್ಷಣಾ ಮಾರ್ಗಸೂಚಿಯಾಗಿದ್ದು ಪ್ರಮುಖ 7 ದೇಶಗಳಲ್ಲಿ ಇದು ಜಾರಿಯಲ್ಲಿದೆ. ದೇಶದ 51 ಹುಲಿ ಸಂರಕ್ಷಿತ ಪ್ರದೇಶಗಳಲ್ಲಿ 14 ಪ್ರದೇಶಗಳು ಮಾತ್ರ ಈಗ ಈ ಮಾನ್ಯತೆ ಪಡೆದಿದ್ದು, ಅದರಲ್ಲಿ ರಾಜ್ಯದ ಬಂಡೀಪುರವೂ ಒಂದಾಗಿದೆ. ರಾಜ್ಯದಲ್ಲಿ ಒಟ್ಟು 524 ಹುಲಿಗಳೊಂದಿಗೆ ದೇಶದಲ್ಲಿ ಎರಡನೇ ಸ್ಥಾನಕ್ಕೆ ಕುಸಿದಿದೆ. 526 ಹುಲಿಗಳನ್ನು ಹೊಂದಿರುವ ಮಧ್ಯಪ್ರದೇಶ ಮೊದಲ ಸ್ಥಾನದಲ್ಲಿದೆ.
