ಚಾಮರಾಜನಗರ: ಒಂದು ದಕ್ಷಿಣ ಭಾರತದಲ್ಲೇ ಹೆಚ್ಚು ಫೋಟೋ ಕ್ಲಿಕ್ಕಿಸಿಕೊಂಡ ಹುಲಿ, ಮತ್ತೊಂದು ಎರಡೇ ದಿನದಲ್ಲಿ ಲಕ್ಷಾಂತರ ಮಂದಿಯ ಮನಕದ್ದ ಅಪರೂಪದ ಕರಿಚಿರತೆ.
ಹೌದು, ಬಂಡೀಪುರ ಅಭಯಾರಣ್ಯವನ್ನು ವಿದೇಶಿಗರಿಗೂ ಪರಿಚಯಿಸಿದ್ದ ಪ್ರಿನ್ಸ್ ಹುಲಿಯಂತೆ, ಇತ್ತೀಚೆಗೆ ಕಬಿನಿಯನ್ನು ಪ್ರವಾಸಿಗರ ಸ್ವರ್ಗವನ್ನಾಗಿಸುತ್ತಿದೆ ಅಪರೂಪದ ಕರಿಚಿರತೆ ಬಘೀರಾ.
ಇದಕ್ಕೆ ಸಾಕ್ಷಿ ಎಂಬಂತೆ ನಿಕಾನ್ ಕ್ಯಾಮರಾ ರಾಯಭಾರಿಯಾದ ಶಾಜ್ ಜುಂಗ್ ಕ್ಲಿಕ್ಕಿಸಿದ ಕಬಿನಿಯ ಕರಿಚಿರತೆಯ 2 ಪೋಟೋಗಳು ಅರ್ಥ್ ಟ್ವಿಟರ್ ಖಾತೆಯಲ್ಲಿ ಬಂದಿದ್ದೇ ತಡ 56 ಸಾವಿರಕ್ಕೂ ಹೆಚ್ಚು ರಿಟ್ವೀಟ್ಗಳಾಗಿದ್ದು ವಾಟ್ಸಾಪ್ ಸ್ಟೇಟಸ್ನಲ್ಲಿ ಇದರ ಫೋಟೋ ಹರಿದಾಡುತ್ತಿದೆ.
ಒಂದು ಕಾಲದಲ್ಲಿ ಬಂಡೀಪುರ ಪ್ರಿನ್ಸ್ ಕೂಡ ಪ್ರವಾಸಿಗರ ಮನಗೆದ್ದು ವಿದೇಶಿ ಛಾಯಾಗ್ರಾಹಕರು ಆ ಹುಲಿಯ ಫೋಟೋ ತೆಗೆಯಲೇ ಬಂಡೀಪುರಕ್ಕೆ ಬರುತ್ತಿದ್ದರು. ಯಾರಿಗೂ ಕ್ಯಾರೇ ಅನ್ನದೇ ತುಂಟಾಟವಾಡುತ್ತಾ ಸಫಾರಿ ಜೀಪಿಗೆ ಸವರಿಕೊಂಡು ಹೋಗುವಂತ ಧೈರ್ಯಶಾಲಿಯಾಗಿತ್ತು ಎನ್ನುತ್ತಾರೆ ವನ್ಯಜೀವಿ ಛಾಯಾಗ್ರಾಹಕ ವೇಣುಗೋಪಾಲ್.
ಇನ್ನು, ಇದೇ ರೀತಿ ಪ್ರವಾಸಿಗರ ಕಣ್ಣಿಗೆ ನಿತ್ಯ ಕಾಣಿಸಿಕೊಳ್ಳುತ್ತಿರುವ ಬಘೀರಾ ಕುರಿತು ವನ್ಯಜೀವಿ ಛಾಯಾಗ್ರಾಹಕ ಶ್ರೇಯಸ್ ದೇವನೂರು ಮಾತನಾಡಿ, ಈಗ ವೈರಲ್ಲಾಗಿರುವ ಚಿತ್ರ 2019ರಲ್ಲಿ ತೆಗೆದದ್ದಾಗಿದೆ. ಶಾಜ್ ಜಂಗ್ ಎಂಬವರು ಇದನ್ನು ಕ್ಲಿಕ್ಕಿಸಿದ್ದು ಸಫಾರಿ ಝೋನಿನಲ್ಲಿ ಕಾಣಿಸಿಕೊಳ್ಳುವ ಮೂಲಕ ಪ್ರವಾಸಿಗರಿಗೆ ಮುದ ನೀಡಲಿದೆ.
ಈ ಬಘೀರಾದ ಚಿತ್ರವನ್ನು ನಾನು ಸೇರಿದಂತೆ ಹಲವು ಛಾಯಾಗ್ರಾಹಕರು ಅದ್ಭುತವಾಗಿ ಸೆರೆ ಹಿಡಿದಿದ್ದೇವೆ ಎಂದು ಪ್ರತಿಕ್ರಿಯಿಸಿದರು. ಪ್ರಿನ್ಸ್ ಹುಲಿ ಬಂಡೀಪುರವನ್ನು ಖ್ಯಾತಗೊಳಿಸಿದ್ದಂತೆ ಬಘೀರಾ ಕೂಡ ಕಬಿನಿಯನ್ನು ಮತ್ತಷ್ಟು ಪ್ರಸಿದ್ಧ ಪಡಿಸಲಿದ್ದು ಬಘೀರಾ ಕಾಣಲು ದೇಶ- ವಿದೇಶದಿಂದ ಪ್ರವಾಸಿಗರು ಲಗ್ಗೆ ಹಾಕುವ ಸಮಯ ದೂರವಿಲ್ಲ ಎನ್ನುತ್ತಾರೆ ಪರಿಸರ ಪ್ರೇಮಿಗಳು.
ಓದುಗರ ಗಮನಕ್ಕೆ:
ಬಂಡೀಪುರ ಪ್ರಿನ್ಸ್ ಚಿತ್ರಕೃಪೆ- ಮಂಜುನಾಥ್ ಹೆಗ್ಡೆ
ಕಬಿನಿ ಬಘೀರಾ ಚಿತ್ರ ಕೃಪೆ- ಅರ್ಥ್ ಟ್ವಿಟರ್ ಖಾತೆ
