ಬಳ್ಳಾರಿ: ಕರ್ನಾಟಕ- ಆಂಧ್ರ ಗಡಿ ಸರ್ವೇ ಪಾಯಿಂಟ್ ಗುರ್ತಿಸುವ ಸಲುವಾಗಿ 1896ರ ಮ್ಯಾಪ್ ಆಧರಿಸಿ ಸರ್ವೇ ಆಫ್ ಇಂಡಿಯಾದ ಡೈರೆಕ್ಟರ್ಗಳು ಮುಂದಾಗಿದ್ದು, ಇದರಿಂದ ನಮ್ಮ ರಾಜ್ಯದ ಒಂದಿಷ್ಟು ಗಡಿಭಾಗ ನೆರೆಯ ಆಂಧ್ರಪ್ರದೇಶದ ಪಾಲಾಗಲಿದೆ ಎಂದು ಗಣಿ ಅಕ್ರಮ ವಿರೋಧಿ ಹೋರಾಟಗಾರ ಟಪಾಲ್ ಗಣೇಶ್ ಆರೋಪಿಸಿದ್ಧಾರೆ.
ಈ ಸಂಬಂಧ ಈ ಟಿವಿ ಭಾರತದೊಂದಿಗೆ ಮಾತನಾಡಿದ ಅವರು, 1896 ಮ್ಯಾಪ್ ಎಂಬುದು ಪ್ರೈಮರಿ ಮ್ಯಾಪ್ (ಪ್ರಾಥಮಿಕ ನಕ್ಷೆ) ಕೂಡ ಅಲ್ಲ. ಅದನ್ನು ಎಡಿಜಿಸಿ ಸ್ವರ್ಣ ಸುಬ್ಬರಾವ್ ಹಾಗೂ ಸುಪ್ರೀಂಕೋರ್ಟ್ ಕೂಡ ಅಲ್ಲಗೆಳೆದಿದೆ. 1887ರ ಮ್ಯಾಪ್ನ ಪ್ರಕಾರ ಗಡಿ ಸರ್ವೇ ಹಾಗೂ ಗಡಿ ಗುರುತು ಪುನರ್ ಸ್ಥಾಪಿಸುವುದು ನ್ಯಾಯ ಸಮ್ಮತವಾಗಿದೆ. ಆದರೆ, ಗಡಿ ಗುರುತು ಪುನರ್ ಸ್ಥಾಪಿಸುವ ಸಲುವಾಗಿಯೇ ಪ್ರೈಮರಿ ಮ್ಯಾಪ್ ಅಲ್ಲದ ಈ 1896ರ ಮ್ಯಾಪ್ ಅನ್ನು ಆಯ್ಕೆ ಮಾಡಿಕೊಂಡಿರುವುದು ಕರ್ನಾಟಕ ರಾಜ್ಯದ ಗಡಿಭಾಗವನ್ನು ಆಂಧ್ರಪ್ರದೇಶ ಸರ್ಕಾರ ಕಬಳಿಸುವಂತಹ ಹುನ್ನಾರವಾಗಿದೆ ಎಂದರು.
ರಾಜ್ಯ ಸರ್ಕಾರ ಗ್ರಾಮಗಳ ಸರಹದ್ದಿನ ಮೇಲೆ ಗಡಿಗುರುತು ಹಾಗೂ ರಾಕ್ ಪಾಯಿಂಟ್ ಗುರ್ತಿಸುವಿಕೆ ಮತ್ತು ಪುನರ್ ಸ್ಥಾಪಿಸುವ ಅಂಶವನ್ನು ತಿಳಿಸಿದೆ. ಆದರೆ, ಕರ್ನಾಟಕ-ಆಂಧ್ರದ ಗಡಿ ಗುರುತು ಪುನರ್ ಸ್ಥಾಪಿಸುವ ವಿಚಾರದಲ್ಲಿ ಮುಖ್ಯಮಂತ್ರಿ ಬಿಎಸ್ ಯಡಿಯೂರಪ್ಪನವರು ಏಕೆ ಮೀನಾಮೇಷ ಎಣಿಸುತ್ತಿದ್ದಾರೆಂದು ಟಪಾಲ್ ಗಣೇಶ ವಾಗ್ದಾಳಿ ನಡೆಸಿದರು.
