ಚಿಕ್ಕೋಡಿ (ಬೆಳಗಾವಿ): ಕ್ವಾರಂಟೈನ್ನಿಂದ ಬಿಡುಗಡೆಯಾಗಿದ್ದಕ್ಕೆ ಪಾರ್ಟಿ ಕೊಟ್ಟ ಭೂಪನಿಗೆ ಕೊರೊನಾ ವಕ್ಕರಿಸಿದ್ದು, ಚಿಕ್ಕೋಡಿಯ ನಣದಿವಾಡಿ ಗ್ರಾಮದಲ್ಲಿ ಆತಂಕ ಹೆಚ್ಚಾಗಿದೆ. ಗ್ರಾಮವನ್ನ ಈಗ ಬಫರ್ ಝೋನ್ ಎಂದು ಘೋಷಿಸಲಾಗಿದೆ.
ಹೊರ ರಾಜ್ಯಗಳಿಂದ ಬಂದವರಿಗೆ 14 ದಿನ ಕ್ವಾರಂಟೈನ್ ಮಾಡಬೇಕು ಎಂಬ ನಿಯಮವಿದೆ. ಆದರೆ, ಸರ್ಕಾರದ ಆದೇಶ ಬಂದಿದೆ ಎಂದು ಹೇಳಿ ವ್ಯಕ್ತಿಯೊಬ್ಬರನ್ನು 7 ದಿನಗಳಲ್ಲಿ ಕ್ವಾರಂಟೈನ್ನಿಂದ ಬಿಡುಗಡೆಗೊಳಿಸಿ ಕಳುಹಿಸಲಾಗಿತ್ತು.
ಬಿಡುಗಡೆಗೂ ಮುನ್ನ ಆತನ ಗಂಟಲು ದ್ರವ ಮತ್ತು ರಕ್ತದ ಮಾದರಿ ಪರೀಕ್ಷೆಗಾಗಿ ಕಳುಹಿಸಲಾಗಿತ್ತು. ಅದರ ವರದಿ ಬಂದಿದ್ದು, ಸೋಂಕು ತಗುಲಿರುವುದು ದೃಢಪಟ್ಟಿದೆ. ಕ್ವಾರಂಟೈನ್ನಿಂದ ಬಿಡುಗಡೆಯಾದ ಬಳಿಕ ಗ್ರಾಮದಲ್ಲಿ ಕ್ಷೌರಿಕನೊಂದಿಗೆ ಹೇರ್ಕಟ್ ಮಾಡಿಸಿಕೊಂಡಿದ್ದಾನೆ. ಈತನಾದ ಬಳಿಕ ಆ ಕ್ಷೌರಿಕ 100ಕ್ಕೂ ಹೆಚ್ಚು ಮಂದಿಗೆ ಹೇರ್ಕಟ್ ಮಾಡಿದ್ದಾನೆ.
ಹೇರ್ಕಟ್ ಮಾಡಿಸಿಕೊಂಡ ದಿನವೇ 25 ಸ್ನೇಹಿತರಿಗೆ ಪಾರ್ಟಿ ಕೊಟ್ಟಿದ್ದಾನೆ ಎನ್ನಲಾಗಿದೆ. ಹೀಗಾಗಿ ಗ್ರಾಮದ ಜನರನ್ನೇ ಕ್ವಾರಂಟೈನ್‌ಗೆ ಒಳಪಡಿಸುವ ಭೀತಿ ಎದುರಾಗಿದೆ.
