’ಉಗ್ರರು ಎರಡು ಬ್ಯಾಗ್​​​​​​​ನಲ್ಲಿ ಬಾಂಬ್​ ಹಿಡಿದು ಬೆಂಗಳೂರಿಗೆ ಬಂದಿದ್ದಾರೆ’.... ಕರೆ ಮಾಡಿದವ ಅಂದರ್​

ಟೆರರಿಸ್ಟ್ ಎರಡು ಬ್ಯಾಗ್​ನಲ್ಲಿ ಬಾಂಬ್ ಹಿಡಿದು ಜೀವನ್ ಭೀಮಾನಗರ ಮುರುಗೇಶ್ ಪಾಳ್ಯದಲ್ಲಿರುವ ರಾಜರಾಜೇಶ್ವರಿ ಥಿಯೇಟರ್ ಬಳಿ ಬಂದಿದ್ದಾರೆಂದು ಗಣೇಶ್ ಎಂಬ ವ್ಯಕ್ತಿಯೊಬ್ಬ ಸಂಖ್ಯೆ 100ಕ್ಕೆ ಕರೆ ಮಾಡಿದ್ದ. ಪೊಲೀಸರಿಗೆ ಚಳ್ಳೆಹಣ್ಣು ತಿನ್ನಿಸಲು ಮುಂದಾದ ಆರೋಪಿಯನ್ನ ಬಂಧಿಸುವಲ್ಲಿ ಜೀವನ್ ಭೀಮಾನಗರ ಪೊಲೀಸರು ಯಶಸ್ವಿಯಾಗಿದ್ದಾರೆ.

ಬೆಂಗಳೂರು : ಬೆಂಗಳೂರಿಗೆ ಎರಡು ಬ್ಯಾಗ್​ನಲ್ಲಿ ಬಾಂಬ್ ಹಿಡಿದು ಟೆರರಿಸ್ಟ್ ಬಂದಿದ್ದಾರೆ ಎಂದು ಪೊಲೀಸರಿಗೆ ಚಳ್ಳೆಹಣ್ಣು ತಿನ್ನಿಸಲು ಮುಂದಾದ ಆರೋಪಿಯನ್ನ ಬಂಧಿಸುವಲ್ಲಿ ನಗರ ಪೊಲೀಸರು ಯಶಸ್ವಿಯಾಗಿದ್ದಾರೆ.

ಎರಡು ಬ್ಯಾಗ್​ನಲ್ಲಿ ಬಾಂಬ್ ಹಿಡಿದು ಟೆರರಿಸ್ಟ್ ಗಳು, ಜೀವನ್ ಭೀಮಾನಗರ ಮುರುಗೇಶ್ ಪಾಳ್ಯದಲ್ಲಿರುವ ರಾಜರಾಜೇಶ್ವರಿ ಥಿಯೇಟರ್ ಬಳಿ ಬಂದಿದ್ದಾರೆ ಎಂದು ಗಣೇಶ್ (34) ಎಂಬ ವ್ಯಕ್ತಿ ಸಂಖ್ಯೆ 100ಕ್ಕೆ ಕರೆ ಮಾಡಿದ್ದ. ಈ ಸುದ್ದಿಯ ನಿಜಾಂಶ ಪತ್ತೆ ಹಚ್ಚಲು ತಕ್ಷಣವೇ ಕಾರ್ಯಪ್ರವೃತ್ತರಾದ ಇಲಾಖೆ, ಈ ವಿಷಯವನ್ನ ಜೀವನ್ ಭೀಮಾನಗರ ಪೊಲೀಸರಿಗೆ ಮಾಹಿತಿ ನೀಡಿದ್ದರು. ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲನೆ ನಡೆಸಿದ ಪೊಲೀಸರಿಗೆ ಅಸಲಿಯತ್ತು ಗೊತ್ತಾಗಿದೆ.

ತಕ್ಷಣ ಗಣೇಶನಿಗೆ ಪೊಲೀಸರು‌ ಕರೆ ಮಾಡಿದಾಗ ಮೊಬೈಲ್ ನಂಬರ್​ ಸ್ವಿಚ್ ಆಫ್ ಎಂದು ತಿಳಿದು ಬಂದಿದೆ. ಕೂಡಲೇ ಸ್ಥಳೀಯರೊಬ್ಬರ ಮಾಹಿತಿ ಮೇರೆಗೆ ಆರೋಪಿಯನ್ನ ಹುಡುಕಾಟ ನಡೆಸಿ ಗಣೇಶ್​ನನ್ನು ಬಂಧಿಸಿ ಜೀವನ್ ಭೀಮಾನಗರ ಪೊಲೀಸರು ತನಿಖೆ ಚುರುಕುಗೊಳಿಸಿದ್ದಾರೆ.