ಬೆಂಗಳೂರು: ಇದು ಬಿಜೆಪಿ ಸರ್ಕಾರದ ನಿರ್ಗಮನದ ಬಜೆಟ್ ಎಂದು ಪ್ರತಿಪಕ್ಷ ನಾಯಕ ಸಿದ್ದರಾಮಯ್ಯ ಹೇಳಿದರು. ವಿಧಾ‌ಸಭೆಯಲ್ಲಿ ಬಜೆಟ್ ಮೇಲಿನ ಚರ್ಚೆಯಲ್ಲಿ ಮಾತನಾಡಿದ ಅವರು, ಬಜೆಟ್ ಅಂದರೆ ಒಂದು ಕುಟುಂಬದ ಗೃಹಿಣಿಯ ಆಯವ್ಯಯ. ಜನರ ಸಮಸ್ಯೆ ಏನು?. ಆ ಸಮಸ್ಯೆಗೆ ಬಜೆಟ್ ಮೂಲಕ ಏನು ಪರಿಹಾರ ಅನ್ನೋದು ಮುಖ್ಯ. ತೆರಿಗೆಯಿಂದ ಬರುವ ಹಣ, ಕೇಂದ್ರದಿಂದ ಬರುವ ಅನುದಾನ ಎಷ್ಟು. ಈ ನಾಡಿನ ಅಭಿವೃದ್ಧಿಗೆ ಮಾಡುವ ವೆಚ್ಚವೇ ವ್ಯಯ. ಈ ಬಾರಿಯ ಬಜೆಟ್ ಗಾತ್ರ 3,09,182 ಕೋಟಿ ರೂ. ಈ ವರ್ಷದಂತೆ ತೆರಿಗೆ ಬೆಳವಣಿಗೆ ಮುಂದಿನ ಬಾರಿ ಆಗುವ ವಿಶ್ವಾಸ ವ್ಯಕ್ತಪಡಿಸಲಾಗಿದೆ. ಆದರೆ ಬಿಜೆಪಿ ಸರ್ಕಾರ ಮುಂದಿನ ವರ್ಷ ಇರೋದಿಲ್ಲ ಎಂದು ವಾಗ್ದಾಳಿ ನಡೆಸಿದರು.
ಮುಂದಿನ ಒಂದು ತಿಂಗಳು ಮಾತ್ರ ಈ ಸರ್ಕಾರದ ಅವಧಿ. 2022-23 ರಲ್ಲಿ ಇವರಿಗೆ ಉಳಿತಾಯದ ಬಜೆಟ್ ಮಾಡಲು ಸಾಧ್ಯವಾಗಿಲ್ಲ. ಆದರೆ ನಾನು ಸಿಎಂ ಆಗಿದ್ದಾಗ 5 ವರ್ಷ ಉಳಿತಾಯ ಬಜೆಟ್ ಮಾಡಿದ್ದೆ. ಬಜೆಟ್‌ನ ಆತ್ಮ ಪಾರದರ್ಶಕ ಆಗಿರಬೇಕು. ಜನರಿಗೆ ಸತ್ಯ ಹೇಳುವ ಕೆಲಸ ಈ ಬಜೆಟ್‌ನಲ್ಲಿ ಆಗಿಲ್ಲ. ಸರ್ಕಾರದ ಅವಧಿಯಲ್ಲಿ ಮಾಡಿರೋದು, ಮುಂದೆ ಮಾಡೋದನ್ನು ಹೇಳಬೇಕಿತ್ತು. ನಾವು 165 ಭರವಸೆಗಳನ್ನು ಕೊಟ್ಟಿದ್ದೆವು. ಅದರಲ್ಲಿ ಶೇ 90% ಭರವಸೆಗಳನ್ನು ಈಡೇರಿಸಿದ್ದೇವೆ.
ಬಿಜೆಪಿಯವರು ತಮ್ಮ ಪ್ರಣಾಳಿಕೆಯನ್ನು ಮಂಡಿಸಲಿ. ನಾವು ನಮ್ಮ ಪ್ರಣಾಳಿಕೆಯನ್ನು ಸಹ ಇಡ್ತೇವೆ. ಈ ಕುರಿತು ಸದನದಲ್ಲಿ ಒಂದು ಡಿಬೇಟ್ ಆಗಲಿ. ಜನತೆಗೆ ಯಾವುದೇ ತಪ್ಪು ಮಾಹಿತಿ ಹೋಗಬಾರದು. ಯಾರು ನುಡಿದಂತೆ ನಡೆದಿದ್ದಾರೆ. ಯಾರು ನುಡಿದಂತೆ ನಡೆದಿಲ್ಲ ಅಂತ ಗೊತ್ತಾಗಲಿ. ನಾನು ಈ ಸಂಬಂಧ ಸಾವಲು ಹಾಕುತ್ತೇನೆ.
ನಾನು ಹೆಮ್ಮೆಯಿಂದ ಹೇಳ್ತೇನೆ. ಪ್ರಣಾಳಿಕೆಯಲ್ಲಿ ಹೇಳಿದ್ದ ಶೇ 90ಕ್ಕೂ ಹೆಚ್ಚು ಯೋಜನೆಗಳನ್ನು ಜಾರಿ ಮಾಡಿದ್ದೇವೆ. ಬಿಜೆಪಿ ಸರ್ಕಾರ ಒಂದು ಚಾಳಿ ಕಲಿತುಕೊಂಡಿದೆ. ಯಾವುದೇ ಆರೋಪ ಮಾಡಿದರೂ, ಹಿಂದಿನ ಸರ್ಕಾರದಲ್ಲಿ ಆಗಿಲ್ವಾ? ಅಂತ ಕೇಳ್ತಾರೆ. ನಮ್ಮ ಮೇಲೆ ಆರೋಪ ಇದ್ದರೆ ಯಾಕೆ ಅದನ್ನು ಆಗ ಪ್ರಸ್ತಾಪ ಮಾಡಲಿಲ್ಲ?, ಆಗ ಬಾಯಿಗೆ ಕಡುಬು ಸಿಕ್ಕಾಕ್ಕೊಂಡು ಕುಳಿತಿದ್ರಾ?. ಕಡ್ಲೆಪುರಿ ತಿಂತಾ ಇದ್ರಾ?. ಈಗ 4 ವರ್ಷದಿಂದ ಅಧಿಕಾರದಲ್ಲಿ ಇದ್ರಲ್ಲಾ?. ಯಾಕೆ ನೀವು ತನಿಖೆ ಮಾಡಿಸಲಿಲ್ಲ? ಎಂದು ಕೇಳಿದರು.
ಮಧ್ಯಪ್ರವೇಶಿಸಿ ಮಾತನಾಡಿದ ಜಗದೀಶ್ ಶೆಟ್ಟರ್, ನಾನು ಪ್ರತಿಪಕ್ಷ ನಾಯಕ ಇದ್ದಾಗ ಡಿನೋಟಿಫಿಕೇಷನ್ ಬಗ್ಗೆ ಪ್ರಸ್ತಾಪ ಮಾಡಿದ್ದೆ. ನ್ಯಾಯಮೂರ್ತಿ ಕೆಂಪಣ್ಣ ಆಯೋಗದ ವರದಿ ಸಹ ಬಂತು. ಆಯೋಗದ ವರದಿಯನ್ನು ನೀವು ಸಿಎಂ ಆಗಿದ್ದಾಗ ವಿಧಾನಸಭೆಯಲ್ಲಿ ಯಾಕೆ ಮಂಡಿಸಿಲ್ಲ? ಎಂದು ಪ್ರಶ್ನಿಸಿದರು.
ಓಕೆ ನಾವು ಕೆಂಪಣ್ಣ ಆಯೋಗದ ವರದಿಯನ್ನು ಸದನದಲ್ಲಿ ಮಂಡಿಸಿಲ್ಲ. ನೀವು 4 ವರ್ಷದಿಂದ ಅಧಿಕಾರದಲ್ಲಿ ಇದ್ದಿರಲ್ಲಾ. ಯಾಕೆ ಇನ್ನೂ ನೀವು ವರದಿಯನ್ನು ಮಂಡಿಸಿಲ್ಲ. ನೀವು ಮಂಡಿಸಬೇಕಿತ್ತು. ನಾನೇನಾದರೂ ವರದಿಯನ್ನು ನಾಶ ಮಾಡಿದ್ನಾ?. ವರದಿಯನ್ನು ತಕ್ಷಣದ ಮಂಡಿಸಬಹುದಿತ್ತಲ್ಲಾ? ಎಂದು ಜಗದೀಶ್ ಶೆಟ್ಟರ್ಗೆ ತಿರುಗೇಟು ನೀಡಿದರು.
ಪರೇಶ್ ಮೇಸ್ತಾ, ಡಿ.ಕೆ.ರವಿ, ಅಕ್ರಮ ಲಾಟರಿ ಪ್ರಕರಣ, ಕಲಬುರ್ಗಿ ಹತ್ಯೆ ಪ್ರಕರಣ ಸೇರಿದಂತೆ ಎಂಟು ಕೇಸ್ ಸಿಬಿಐಗೆ ಕೊಟ್ಟಿದ್ದೇನೆ. ಆವಾಗ ಮೋದಿ ಪ್ರಧಾನ ಮಂತ್ರಿ ಇದ್ರು. ನನ್ನ ಅಧಿಕಾರದಲ್ಲಿ 8 ಪ್ರಕರಣಗಳನ್ನು ಸಿಬಿಐ ತನಿಖೆಗೆ ಒಪ್ಪಿಸಿದ್ದೆ. ನೀವು ಒಂದು ಪ್ರಕರಣವನ್ನಾದರೂ ಸಿಬಿಐ ತನಿಖೆಗೆ ಒಪ್ಪಿಸಿದ್ರಾ? ಎಂದು ಸಿದ್ದರಾಮಯ್ಯ ಪ್ರಶ್ನಿಸಿದರು. ಈ ವೇಳೆ ಎದ್ದು ನಿಂತ ಬಿಜೆಪಿ ಶಾಸಕಿ ರೂಪಾಲಿ ನಾಯಕ್, ಪರೇಶ ಮೇಸ್ತಾ ಸಾಕ್ಷಿ ನಾಶ ಮಾಡಿ ಸಿಬಿಐಗೆ ಕೊಟ್ಟಿದ್ದೀರಾ ಎಂದು ಆರೋಪಿಸಿದರು. ಈ ವೇಳೆ ಪ್ರತಿಪಕ್ಷ-ಆಡಳಿತ ಪಕ್ಷ ನಡುವೆ ವಾಗ್ವಾದ ನಡೆಯಿತು.
ನಿಮ್ಮ ಕಾಲದಲ್ಲಿ ಲೋಕಾಯುಕ್ತ ಮುಚ್ಚಿಬಿಟ್ರಿ ಅಂತಾರೆ. ಆಗ ಭಾಸ್ಕರ್ ರಾವ್ ಅನ್ನೋ ಲೋಕಾಯುಕ್ತ ಅವರ ಮಗ ಡೀಲ್ ಮಾಡ್ತಿದ್ದಾರೆ ಅನ್ನೋ ಆರೋಪ ಬಂತು. ಆಗ ಎಸಿಬಿ ಪ್ರಾರಂಭ ಮಾಡಿದೆವು ಅಂತ ಸದನದಲ್ಲಿ ಸಿದ್ದರಾಮಯ್ಯ ಸಮರ್ಥಿಸಿಕೊಂಡರು. ಗುಜರಾತ್, ಉತ್ತರ ಪ್ರದೇಶ, ಮಧ್ಯಪ್ರದೇಶ, ಗೋವಾ, ಹರಿಯಾಣ ರಾಜ್ಯಗಳಲ್ಲಿ ಲೋಕಾಯುಕ್ತ ಇಲ್ಲ, ಎಸಿಬಿ ಇದೆ ಎಂದರು.
ಇದನ್ನೂ ಓದಿ:ಕಾಂಗ್ರೆಸ್ ಅತೀ ಭ್ರಷ್ಟ ಸರ್ಕಾರ ನೀಡಿತ್ತು, ತನಿಖೆಯಾಗದ ಎಲ್ಲಾ ಪ್ರಕರಣ ಲೋಕಾಯುಕ್ತಕ್ಕೆ ಶಿಫಾರಸು: ಸಿಎಂ ಘೋಷಣೆ
