ಕೊರೊನಾ ಕಾಲದಲ್ಲಿ ಶಾಲಾ ಶುಲ್ಕ ಕಟ್ಟುವುದಾದರೂ ಹೇಗೆ? ಪೋಷಕರ ಆತಂಕ

ಶಾಲೆಗಳು ಪೋಷಕರಿಗೆ ಶಾಲಾ ಶುಲ್ಕ ಕಟ್ಟುವಂತೆ ಒತ್ತಾಯ ಹೇರುತ್ತಿದೆಯೆನ್ನುವ ಆರೋಪ ಕೇಳಿಬರುತ್ತಿದೆ. ನಂದಿನಿ ಲೇಔಟ್​​ನಲ್ಲಿರುವ ಪ್ರೆಸಿಡೆನ್ಸಿ ಶಾಲೆಯ ಮುಂದೆ ಇಂದು ನೂರಾರು ಪೋಷಕರು ಜಮಾಯಿಸಿ, ಕೊರೊನಾದಂತಹ ಈ ಸಮಯದಲ್ಲಿ ಲಕ್ಷಗಟ್ಟಲೆ ಶಾಲಾ ಶುಲ್ಕ ಕಟ್ಟುವುದಾದರೂ ಹೇಗೆ? ಎಂದು ಆತಂಕ ವ್ಯಕ್ತಪಡಿಸಿದ್ದಾರೆ.

ಬೆಂಗಳೂರು: ರಾಜ್ಯದಲ್ಲಿ ಸರ್ಕಾರಿ, ಅನುದಾನಿತ ಮತ್ತು ಅನುದಾನರಹಿತ ಪ್ರಾಥಮಿಕ ಮತ್ತು ಪ್ರೌಢ ಶಾಲೆಗಳಿಗೆ 2021-22ನೇ ಸಾಲಿನ ಶೈಕ್ಷಣಿಕ ವರ್ಷವನ್ನು ಜುಲೈ 1 ರಿಂದ ಪ್ರಾರಂಭಿಸಲು ಆದೇಶಿಸಲಾಗಿದೆ‌. ಜೂನ್ 15 ರಿಂದ ದಾಖಲಾತಿ ಪ್ರಕ್ರಿಯೆ ಶುರು ಮಾಡುವಂತೆ ಸೂಚಿಸಲಾಗಿದೆ. ಆದರೆ ನಗರದ ಹಲವು ಶಾಲೆಗಳು ನಿಗಧಿ ಮಾಡಿದ ದಿನಾಂಕಕ್ಕೂ ಮುನ್ನವೇ ಪೋಷಕರಿಗೆ ಶಾಲಾ ಶುಲ್ಕ ಕಟ್ಟುವಂತೆ ಒತ್ತಾಯ ಹೇರುತ್ತಿದೆಯೆನ್ನುವ ಆರೋಪ ಕೇಳಿಬರುತ್ತಿದೆ.

ನಗರದ ನಂದಿನಿ ಲೇಔಟ್​​ನಲ್ಲಿರುವ ಪ್ರೆಸಿಡೆನ್ಸಿ ಶಾಲೆಯ ಮುಂದೆ ಇಂದು ನೂರಾರು ಪೋಷಕರು ಜಮಾಯಿಸಿದ್ದಾರೆ. ಶೈಕ್ಷಣಿಕ ವರ್ಷ ಆರಂಭವೇ ಆಗಿಲ್ಲ, ಅದಕ್ಕೂ ಮುನ್ನವೇ ಫೀಸ್ ಕಟ್ಟಿ ಅನ್ನೋದು ಎಷ್ಟು ಸರಿ? ಫೀಸ್ ಕಟ್ಟಿಲ್ಲ ಅಂದರೆ ಆನ್​ಲೈನ್ ತರಗತಿ ಇಲ್ಲ ಎಂದು ಹೇಳುತ್ತಿದ್ದಾರೆ. ಈಗಾಗಲೇ ಫೀಸ್ ಕಟ್ಟದ ಮಕ್ಕಳನ್ನು ಆನ್ ಲೈನ್ ಕ್ಲಾಸ್​​ನಿಂದ ರಿಮೂವ್ ಮಾಡಿದ್ದಾರಂತೆ. ಹೀಗಾಗಿ, ಆತಂಕಕ್ಕೆ ಒಳಗಾದ ಪೋಷಕರು, ಶಾಲೆಯ ಮುಂದೆ ಜಮಾಯಿಸಿದ್ದಾರೆ.

ಇದನ್ನೂ ಓದಿ: ಜಪ್ತಿ​​ ಮಾಡಿರವ ಬೈಕ್ ಕೊಡಿ ಎಂದು ಎಸಿಪಿ ಕಾಲಿಗೆ ಬಿದ್ದ ಯುವಕ: ವಿಡಿಯೋ ವೈರಲ್​

ಕೊರೊನಾದಂತಹ ಈ ಸಮಯದಲ್ಲಿ ಶುಲ್ಕ ಹೆಚ್ಚಳ ಮಾಡಿದರೆ ಹೇಗೆ ಕಟ್ಟೋದು? ಕಳೆದ ಬಾರಿ ಮಕ್ಕಳು ಶಾಲೆಗೆ ಹೋಗಿಲ್ಲ? ಆನ್ ಲೈನ್ ಪಾಠಕ್ಕೆ ಲಕ್ಷ-ಲಕ್ಷ ಶುಲ್ಕ ಕಟ್ಟಿದ್ದೇವೆ‌. ಮೂರನೇ ಅಲೆ ಇರುವಾಗ ಶಾಲೆಗಳು ತೆರೆಯುತ್ತೋ ಇಲ್ವೋ ಎಂಬ ಗೊಂದಲ ಇರುವ ಈ ವೇಳೆ ಲಕ್ಷ ಲಕ್ಷ ಫೀಸ್ ಕಟ್ಟಿ ಅಂದರೆ ಹೇಗೆ? ಅನ್ನೋದು ಪೋಷಕರ ಪ್ರಶ್ನೆ. ಪೋಷಕರು ದೌಡಾಯಿಸಿದ ಕಾರಣ ಸ್ಥಳಕ್ಕೆ ಪೊಲೀಸರು ಆಗಮಿಸಿದ್ದರು.