ಬೆಂಗಳೂರು: ರಾಜ್ಯದಲ್ಲಿ ಕೋವಿಡ್ ಅಬ್ಬರದ ಹಿನ್ನೆಲೆ ದ್ವಿತೀಯ ಪಿಯುಸಿ ಪರೀಕ್ಷೆ ರದ್ದು ಮಾಡಲಾಗಿದೆ. ಇತ್ತ ವಿದ್ಯಾರ್ಥಿಗಳ ಕಲಿಕಾ ಮಟ್ಟ ನಿರ್ಧರಿಸಲು ಗ್ರೇಡಿಂಗ್ ವ್ಯವಸ್ಥೆ ಮಾಡಲಾಗಿದೆ. ಈ ಹಿನ್ನೆಲೆ ವಿದ್ಯಾರ್ಥಿಗಳ ಎಸ್ಎಸ್ಎಲ್ಸಿ ಅಂಕ, ಪ್ರಥಮ ಪಿಯುಸಿ ಅಂಕ ಪರಿಗಣಿಸಿ ಫಲಿತಾಂಶ ಪ್ರಕಟಿಸಲು ನಿರ್ಧರಿಸಲಾಗಿದೆ. ಹಾಗಾಗಿ 2020-2021ರ ಸಾಲಿನಲ್ಲಿ ದ್ವಿತೀಯ ಪಿಯುಸಿಗೆ ದಾಖಲಾಗಿರುವ ವಿದ್ಯಾರ್ಥಿಗಳ ಸಂಪೂರ್ಣ ಮಾಹಿತಿಯನ್ನು SATS PORTALನಲ್ಲಿ ನಮೂದಿಸಲು ಆದೇಶಿಸಲಾಗಿದೆ.
ವಿದ್ಯಾರ್ಥಿಗಳ ವಿವರ ಕ್ರೋಢೀಕರಿಸಲು SATS ತಂತ್ರಾಂಶವನ್ನು ಅಳವಡಿಸಲಾಗಿದೆ. ಪ್ರಸ್ತುತ ವರ್ಷ ಪ್ರಥಮ ಪಿಯುಸಿ ವಿದ್ಯಾರ್ಥಿಗಳ ಸಂಪೂರ್ಣ ಮಾಹಿತಿಯನ್ನು ಪಡೆಯಲಾಗಿದೆ. ದ್ವಿತೀಯ ವರ್ಷದ ಪಿಯುಸಿಗೆ ದಾಖಲಾಗಿ ಅರ್ಹತೆ ಪಡೆದ ವಿದ್ಯಾರ್ಥಿಗಳ ಮಾಹಿತಿಯನ್ನು ಪಡೆಯಲಾಗಿದೆ. ಎಲ್ಲಾ ಕಾಲೇಜುಗಳ ಮುಖ್ಯಸ್ಥರು, ಈಗಾಗಲೇ ದ್ವಿತೀಯ ಪಿಯುಸಿಗೆ ದಾಖಲಾದ ವಿದ್ಯಾರ್ಥಿಗಳ ಶುಲ್ಕ ಸಂಗ್ರಹಣೆ ವಿವರ ಹಾಗೂ ಅವರು ಪ್ರಥಮ ಪಿಯುಸಿಯಲ್ಲಿ ಗಳಿಸಿದ ಒಟ್ಟು ಅಂಕಗಳ ಮಾಹಿತಿ ಪಡೆದಿದ್ದಾರೆ. ಈಗ ವಿದ್ಯಾರ್ಥಿಗಳು ಪ್ರಥಮ ಪಿಯುಸಿಯಲ್ಲಿ ವಿಷಯವಾರು ಪಡೆದ ಅಂಕಗಳನ್ನು ಹಾಗೂ 10ನೇ ತರಗತಿಯಲ್ಲಿ ಪಡೆದ ಅಂಕಗಳನ್ನು SATS PORTALನಲ್ಲಿ ನಮೂದು ಮಾಡುವುದನ್ನು ಕಡ್ಡಾಯ ಮಾಡಿ ಆದೇಶಿಸಲಾಗಿದೆ.
ರಾಜ್ಯದ ಪಿಯುಸಿ ಮುಖ್ಯಸ್ಥರು ಏನು ಮಾಡಬೇಕು?
-SATS PORTALನಲ್ಲಿ ಈಗಾಗಲೇ ದ್ವಿತೀಯ ಪಿಯುಸಿಗೆ ದಾಖಲಾದ ವಿದ್ಯಾರ್ಥಿಗಳ, ಪ್ರಥಮ ಪಿಯುಸಿ ವಿಷಯವಾರು ಅಂಕಗಳನ್ನು ದಾಖಲಿಸಲು ಅವಕಾಶ ನೀಡಲಾಗಿದೆ. ಈಗಾಗಲೇ ಪ್ರಥಮ ಪಿಯುಸಿಯಲ್ಲಿ ವಿದ್ಯಾರ್ಥಿ ಪಡೆದ ಒಟ್ಟು ಅಂಕಗಳನ್ನು ದಾಖಲಿಸಲಾಗಿದ್ದು, ಅದನ್ನು ಸಂಗ್ರಹ ಮಾಡಲಾಗಿದೆ. ಸದ್ಯ ಒಟ್ಟು ಅಂಕಗಳಿಗೆ ಅನುಗುಣವಾಗಿ ವಿದ್ಯಾರ್ಥಿ ಪಡೆದ ವಿಷಯವಾರು ಅಂಕಗಳನ್ನು ನಮೂದಿಸುವುದು, ಸದರಿ ಅಂಕಗಳನ್ನು ಉಪನಿರ್ದೇಶಕರುಗಳಿಂದ ಈಗಾಗಲೇ ದೃಢೀಕರಿಸಿಕೊಂಡ ಪಟ್ಟಿಯನ್ನಾಧರಿಸಿ ನಮೂದಿಸಬೇಕು..
- ಒಂದು ವೇಳೆ ವಿಷಯವಾರು ಅಂಕಗಳಲ್ಲಿ ವ್ಯತ್ಯಾಸವಾದಲ್ಲಿ ಸಂಬಂಧಿಸಿದ ಪ್ರಾಚಾರ್ಯರ ಮೇಲೆ ಶಿಸ್ತು ಕ್ರಮ ಜರುಗಿಸಲಾಗುತ್ತದೆ.
- ಅನುದಾನಿತ ಹಾಗೂ ಅನುದಾನ ರಹಿತ ಪದವಿ ಪೂರ್ವ ಕಾಲೇಜುಗಳ ಪ್ರಾಚಾರ್ಯರು ಅಂಕಗಳನ್ನು ನಮೂದಿಸುವ ಸಂದರ್ಭದಲ್ಲಿ ಲೋಪವಸಗಿದ್ದರೆ, ಶಿಸ್ತು ಕ್ರಮದ ಜತೆಗೆ ಕಾಲೇಜಿನ ಮಾನ್ಯತೆ ರದ್ದುಪಡಿಸಲು ಸರ್ಕಾರಕ್ಕೆ ಶಿಫಾರಸು ಮಾಡಲಾಗುತ್ತದೆ.
- SATS Portalನಲ್ಲಿ ಎಸ್.ಎಸ್.ಎಲ್.ಸಿ ಬೋರ್ಡ್ನಿಂದ 2019ನೇ ಸಾಲಿನ ವಾರ್ಷಿಕ ಹಾಗೂ ಪೂರಕ ಪರೀಕ್ಷೆಯಲ್ಲಿ ಪಡೆದ ಅಂಕಗಳು ಸ್ವಯಂ ದಾಖಲೀಕರಣಗೊಳ್ಳುತ್ತವೆ. (auto fetch) ಅವುಗಳನ್ನು ಪರಿಶೀಲಿಸಿ submit ಮಾಡುವುದು. ಹೀಗೆ ಮಾಡಿದಾಗ 10ನೇ ತರಗತಿ ಹಾಗೂ ಪ್ರಥಮ ಪಿಯುಸಿ ಅಂಕಗಳು ಪ್ರತ್ಯೇಕವಾಗಿ ಉಳಿಯಲಿದೆ.
- ಒಂದು ವೇಳೆ ವಿದ್ಯಾರ್ಥಿಯು 2019ರ ಹಿಂದಿನ ವರ್ಷದಲ್ಲಿ ಅಥವಾ ಖಾಸಗಿಯಾಗಿ 10ನೇ ತರಗತಿ ತೇರ್ಗಡೆ ಹೊಂದಿದಲ್ಲಿ ಸದರಿ ವಿದ್ಯಾರ್ಥಿಯ ಎಸ್.ಎಸ್.ಎಲ್.ಸಿ ನೋಂದಣಿ ಸಂಖ್ಯೆ ನಮೂದಿಸಿ ಮ್ಯಾನುವಲ್ (Manual) ಆಗಿ, ಅಂಕಪಟ್ಟಿ ಆಧರಿಸಿ ಅಂಕಗಳನ್ನು ನಮೂದು ಮಾಡುವುದು. ನಂತರ ಅಂಕಪಟ್ಟಿಯ ಸ್ಕ್ಯಾನ್ ಪ್ರತಿಯನ್ನು ಅಪಲೋಡ್ ಮಾಡಿ submit ಮಾಡಬೇಕು. ಹೀಗೆ ಮಾಡಿದಾಗ 10ನೇ ತರಗತಿ ಹಾಗೂ ಪ್ರಥಮ ಪಿಯುಸಿ ಅಂಕಗಳು ಪ್ರತ್ಯೇಕವಾಗಿ ಇರಲಿದೆ. ಹಾಗೇ ಒಂದು ವೇಳೆ ವಿದ್ಯಾರ್ಥಿಯು ಸಿಬಿಎಸ್‌ಇ, ಐಸಿಎಸ್‌ಇ ಅಥವಾ ಇನ್ನಾವುದೇ ಮಂಡಳಿ ( ದಾಖಲಾತಿ ಮಾರ್ಗದರ್ಶಿಯಲ್ಲಿನ ಪಟ್ಟಿಯಲ್ಲಿದಂತೆ) ಕೂಡ ಹೀಗೇ ಮಾಡಬೇಕೆಂದು ಆದೇಶಿಸಲಾಗಿದೆ.
ಅಪಲೋಡ್ ಮಾಡದ ಕಾಲೇಜುಗಳಿಗೆ ಪಿಯು ಬೋರ್ಡ್ ಸೂಚನೆ:
ಇಲಾಖೆಯಿಂದ ಸಾಕಷ್ಟು ಬಾರಿ ಸೂಚಿಸಿದಾಗ್ಯೂ ಕೂಡ ಕೆಲವು ಕಾಲೇಜುಗಳು 2020 ಸಾಲಿನಲ್ಲಿ ಪ್ರಥಮ ಪಿಯುಸಿಯಲ್ಲಿ ಉತ್ತೀರ್ಣರಾದ ವಿದ್ಯಾರ್ಥಿಗಳನ್ನು ದ್ವಿತೀಯ ಪಿಯುಸಿಗೆ ದಾಖಲು ಮಾಡಿಕೊಂಡು, ಶುಲ್ಕ ಹಾಗೂ ಪ್ರಥಮ ಪಿಯುಸಿ ಒಟ್ಟು ಅಂಕಗಳನ್ನು ನಮೂದಿಸದೇ ಇರುವುದು ಕಂಡುಬಂದಿದೆ.
ಇದನ್ನೂ ಓದಿ: ಪಕ್ಷದ ಒಗ್ಗಟ್ಟು ಹೀಗೇ ಇರಲಿ, ಮೈ ಮರೆಯಬೇಡಿ: ಡಿಕೆಶಿ ಕರೆ
ಹೀಗಾಗಿ, ಕಾಲೇಜುಗಳ ಪಟ್ಟಿಯನ್ನು ಆಯಾ ಜಿಲ್ಲಾ ಉಪನಿರ್ದೇಶಕರುಗಳಿಗೆ ರವಾನಿಸಲಾಗಿದೆ. ಈ ಕೂಡಲೇ ಆಯಾ ಕಾಲೇಜಿನವರು, ಮೊದಲು ವಿದ್ಯಾರ್ಥಿಯ ಶುಲ್ಕ ಸಂಗ್ರಹಣೆ ಹಾಗೂ ಒಟ್ಟು ಅಂಕಗಳ ವಿವರ ದಾಖಲು ಮಾಡಬೇಕು. ಇನ್ನು ಜೂನ್ 15 ಕೊನೆಯ ದಿನಾಂಕವಾಗಿದ್ದು, ನಂತರ ಯಾವುದೇ ತಿದ್ದುಪಡಿಯಾಗಲಿ, ಸೇರ್ಪಡೆಯಾಗಲಿ, ಹೆಸರು ಕಡಿಮೆ ಮಾಡುವುದಾಗಲಿ, ಇವುಗಳಿಗೆ ಅವಕಾಶವಿರುವುದಿಲ್ಲ. ಇದರಿಂದ ಭವಿಷ್ಯದಲ್ಲಿ ಆಗುವ ಪರಿಣಾಮಗಳಿಗೆ ಆಯಾ ಕಾಲೇಜುಗಳ ಪ್ರಾರ್ಚಾಯರು ಕಾರಣ ಎಂದು ಸ್ಪಷ್ಟಪಡಿಸಿದೆ.
