ಬೆಂಗಳೂರು: ವೈರಲ್ ಆಗಿರುವ ಫೋಟೋದಲ್ಲಿ ಇರುವುದು ನಾವೇ, ಅದು ನಮ್ಮ ಮನೆಯೇ. ಎರಡೂವರೆ ತಿಂಗಳ ಹಿಂದಿನ ಫೋಟೋ ಅದು. ಆದರೆ ನಾವ್ಯಾರೂ ಪಕ್ಷ ವಿರೋಧಿ ಚಟುವಟಿಕೆ ನಡೆಸಲು ಸೇರಿದ್ದ ಸಭೆ ಅಲ್ಲವೆಂದು ಶಾಸಕ ಮುರುಗೇಶ್ ನಿರಾಣಿ ಸ್ಪಷ್ಟೀಕರಣ ನೀಡಿದ್ದಾರೆ.
ಮುರುಗೇಶ್ ನಿರಾಣಿ ನಿವಾಸದಲ್ಲಿ ಹಿರಿಯ ಶಾಸಕರಾದ ಉಮೇಶ್ ಕತ್ತಿ, ಎಸ್ ಎ ರಾಮದಾಸ್ ಸಭೆ ಸೇರಿದ್ದರು, ಅಸಮಾಧಾನಿತರ ಗುಂಪು ಮಾಡಿಕೊಂಡಿದ್ದಾರೆ ಎಂದು ವರದಿ ಬರುತ್ತಿದೆ. ಒಂದು ಫೋಟೋ ಬಿತ್ತರಿಸಲಾಗುತ್ತಿದೆ. ಆದರೆ ಸರ್ಕಾರದ ಬದಲಾವಣೆ, ಯಡಿಯೂರಪ್ಪ ವಿರುದ್ಧ ಪಿತೂರಿಯಂತಹ ಚರ್ಚೆ ನಡೆದಿಲ್ಲ. ನಾವು ಮೈಸೂರು ಕಡೆ ಹೋದರೆ ಅವರ ಮನೆಗೆ ಹೋಗುತ್ತೇವೆ. ಅವರು ಬೆಂಗಳೂರಿಗೆ ಬಂದಾಗ ನಮ್ಮ ಮನೆಗೆ ಬರುತ್ತಾರೆ ಎಂದು ನಿರಾಣಿ ಹೇಳಿದ್ದಾರೆ.
ಉಮೇಶ್ ಕತ್ತಿ ಹಿರಿಯರು, ಮೊದಲನೇ ಹಂತದಲ್ಲೇ ಅವರನ್ನು ಮಂತ್ರಿ ಮಾಡಬೇಕಿತ್ತು. ಆದರೆ ಕಾರಣಾಂತರಗಳಿಂದ ಆಗಿಲ್ಲ. ಮುಂದೆ ಸಂಪುಟ ವಿಸ್ತರಣೆ ವೇಳೆ ಸಚಿವರನ್ನಾಗಿ ಮಾಡಿ ಒಳ್ಳೆಯ ಖಾತೆ ಕೊಡಬೇಕೆಂದು ಮುಖ್ಯಮಂತ್ರಿ, ರಾಜ್ಯಾಧ್ಯಕ್ಷರು, ರಾಷ್ಟ್ರೀಯ ನಾಯಕರಿಗೂ ವಿನಂತಿ ಮಾಡುತ್ತೇನೆ. ಪ್ರತಿ ಶಾಸಕನಿಗೂ ಸಚಿವನಾಗುವ ಆಸೆ ಇದ್ದೇ ಇರುತ್ತದೆ. ಅದೇ ರೀತಿ ನನಗೂ ಇದೆ. ಆದರೆ ನನ್ನನ್ನು ಸಚಿವನನ್ನಾಗಿ ಮಾಡದಿದ್ದರೂ ಬೇಸರವಿಲ್ಲ, ಅಭಿವೃದ್ಧಿ ಕೆಲಸ ಮಾಡುತ್ತೇನೆ ಎಂದು ನಿರಾಣಿ ಸ್ಪಷ್ಟಪಡಿಸಿದ್ದಾರೆ.
