ಬೆಂಗಳೂರು: ನಾವು ಯು.ಟಿ.ಖಾದರ್ ಹಕ್ಕನ್ನು ನಾವು ಕಿತ್ತುಕೊಂಡಿಲ್ಲ. ಆದರೆ ಪಾಕಿಸ್ತಾನದಿಂದ ಅವರ ನೆಂಟರನ್ನು ಕರೆತರಲು ಹೊರಟರೆ ಅದಕ್ಕೆ ಅವಕಾಶವಿಲ್ಲ. ಬಹುಸಂಖ್ಯಾತರು ಸುಮ್ಮನಿರುವುದು ದೌರ್ಬಲ್ಯವಲ್ಲ. ಪ್ರತೀಕಾರಕ್ಕೆ ನಿಂತರೆ ಏನಾಗಲಿದೆ? ಎಂಬುದನ್ನು ಒಮ್ಮೆ ಯೋಚಿಸಿ ಎಂದು ಯು.ಟಿ.ಖಾದರ್‌ಗೆ ಸಚಿವ ಸಿ.ಟಿ.ರವಿ ಎಚ್ಚರಿಕೆ ಕೊಟ್ಟರು.
ನಗರದ ಖಾಸಗಿ ಹೋಟೆಲ್ನಲ್ಲಿ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ನಮ್ಮ ಪ್ರಣಾಳಿಕೆಯಲ್ಲಿ ಪೌರತ್ವದ ಬಗ್ಗೆ ಸ್ಪಷ್ಟಪಡಿಸಿದ್ದೆವು. ಮೂರು ದೇಶಗಳ ಧಾರ್ಮಿಕ ಅಲ್ಪಸಂಖ್ಯಾತರಿಗೆ ಪೌರತ್ವ ಕೊಡುವ ನಿಟ್ಟಿನಲ್ಲಿ ಪೌರತ್ವ ಕಾಯ್ದೆ ಜಾರಿಗೆ ಬಂದಿದೆ. ನಮಗೆ ಬಹುಮತವಿದೆ. ಸಿಎಬಿ ವಿರೋಧಿಸುವವರು ಬಹುಮತವನ್ನು ವಿರೋಧಿಸಿದಂತೆ ಎಂದು ಆಕ್ರೋಶ ವ್ಯಕ್ತಪಡಿಸಿದ್ರು.
ಸಮಾಜವನ್ನು ಹೊತ್ತಿ ಉರಿಸುವಲ್ಲಿ ಖಾದರ್ ನಿಸ್ಸೀಮರು. ಇಂತಹ ಮನಸ್ಥಿತಿಯೇ ಗೋದ್ರಾ ಕರಸೇವಕರ ಘಟನೆಗೆ ಕಾರಣವಾಗಿತ್ತು. ನಾವು ಕೂಡ ಪ್ರತಿಕ್ರಿಯೆಗೆ ಹೊರಟರೆ ಏನಾಗಲಿದೆ? ಯಾವ ಪರಿಣಾಮ ಎದುರಿಸಬೇಕು? ಎಂದು ಒಮ್ಮೆ ನೆನಪಿಸಿಕೊಳ್ಳಿ. ಬಹುಸಂಖ್ಯಾತರು ತಾಳ್ಮೆಯಿಂದ ಇದ್ದಾರೆ. ನಮ್ಮ ಸಹನೆ ದೌರ್ಬಲ್ಯವಲ್ಲ ಎಂದು ಆಕ್ರೋಶ ವ್ಯಕ್ತಪಡಿಸಿದರು.
ಪಾಕಿಸ್ತಾನದ ಎಲ್ಲರಿಗೂ ಪೌರತ್ವ ನೀಡಲು ನಾವು ಸಿದ್ಧ. ಆದರೆ ಅಖಂಡ ಭಾರತ ಆಗಬೇಕು. ಅಲ್ಲಿಯವರೆಗೂ ಧಾರ್ಮಿಕ ಅಲ್ಪಸಂಖ್ಯಾತರಿಗೆ ಪೌರತ್ವ ನೀಡುತ್ತೇವೆ. ನಾವು ನಿರಾಶ್ರಿತರಿಗೆ ಪೌರತ್ವ ನೀಡುತ್ತಿದ್ದೇವೆಯೇ ಹೊರತು ನುಸುಳುಕೋರರು ಮತ್ತು ಆಕ್ರಮಣಕಾರರಿಗೆ ಅಲ್ಲ. ಅವರಿಗೆ ಪೌರತ್ವ ಕೊಡಲು ಸಾಧ್ಯವಿಲ್ಲ ಎಂದು ಸ್ಪಷ್ಟಪಡಿಸಿದರು.
ನಾವು ದ್ವೇಷದ ರಾಜಕಾರಣ ಮಾಡಲ್ಲ. ಸುವರ್ಣ ಚತುಷ್ಪತ ಹಾದಿ ಮಾಡಿದ್ದು ವಾಜಪೇಯಿ. ಆದರೆ ಅವರ ನಾಮಫಲಕ ತೆರವಿಗೆ ನೂರಾರು ಕೋಟಿ ರೂ ಖರ್ಚು ಮಾಡಿದ ಮಹಾನುಭಾವರು ಇವರು. ಇವರಿಂದ ನಾವು ಕಲಿಯಬೇಕಿಲ್ಲ ಎಂದರು.
ಇಂದಿರಾ ಕ್ಯಾಂಟೀನ್ನಲ್ಲಿ ಅವ್ಯವಹಾರ ನಡೆಯುತ್ತಿದ್ದು, ಅದನ್ನು ಮುಚ್ಚಿದರೆ ಬೊಕ್ಕಸದಲ್ಲಿ ಹಣ ಉಳಿಯಲಿದೆ. ಯಾರು ನೆಂಟರಿಗೆ ಗುತ್ತಿಗೆ ಕೊಟ್ಟಿದ್ದಾರೆ? ಎಂದು ಎಲ್ಲರಿಗೂ ಗೊತ್ತಿದೆ ಎಂದು ಕಿಡಿಕಾರಿದರು. ಕಾಂಗ್ರೆಸ್ನವರು ಕೊಳ್ಳೆ ಹೊಡೆದ ಹಣದಲ್ಲಿ ಕ್ಯಾಂಟೀನ್ ನಡೆಸಿದರೆ ಅವರ ಪಾಪಕ್ಕೆ ಪ್ರಾಯಶ್ಚಿತ್ತ ಆಗಲಿದೆ. ಬೇಕಿದ್ದರೆ ಸೋನಿಯಾ ಕ್ಯಾಂಟೀನ್ ಎಂದು ನಾನ್ ವೆಜ್ ಹೋಟೆಲ್ ಕೂಡಾ ತ‌ರೆಯಿರಿ. ಆದರೆ ಸರ್ಕಾರದಿಂದ ಹಣ ಕೊಡುವುದಾದರೆ ಅನ್ನಪೂರ್ಣೇಶ್ವರಿ ಎಂದು ಹೆಸರಿಡಿ ಎಂದರು.
