ಬಾಡಿಗೆ, ಲೀಸ್​, ಗುತ್ತಿಗೆಯಲ್ಲಿ ಅಕ್ರಮ ಆರೋಪ: ಬಿಬಿಎಂಪಿ ಆಸ್ತಿ ವಿವರ ಕೇಳಿದ ಸರ್ಕಾರ

ಬೆಂಗಳೂರಿನ ಬಿಬಿಎಂಪಿ ಆಸ್ತಿಯ ಬಾಡಿಗೆ, ಲೀಸ್​ ಹಾಗೂ ಗುತ್ತಿಗೆಯಲ್ಲಿ ಅಕ್ರಮ ನಡೆದಿದೆ ಎಂಬ ಆರೋಪದ ಹಿನ್ನೆಲೆ ಬಿಬಿಎಂಪಿಯ ಆಸ್ತಿ ವಿವರಗಳನ್ನು ಸರ್ಕಾರ ಕೇಳಿದೆ ಎಂದು ಸಾಮಾಜಿಕ ಕಾರ್ಯಕರ್ತ ಅಮರೇಶ್​ ತಿಳಿಸಿದ್ದಾರೆ.

ಬೆಂಗಳೂರು: ನಗರ ಹಾಗೂ ಸುತ್ತಲಿನ ಪ್ರದೇಶದಲ್ಲಿ ಬಿಬಿಎಂಪಿ ಅಂದಾಜು 4 ಸಾವಿರ ಕೋಟಿಯಷ್ಟು ಆಸ್ತಿ ಹೊಂದಿದೆ. ಈ ಆಸ್ತಿಯನ್ನು ಚಿಲ್ಲರೆ ಕಾಸಿಗೆ ಲೀಸ್​, ಬಾಡಿಗೆ ಹಾಗೂ ಗುತ್ತಿಗೆ ನೀಡಲಾಗಿದೆ ಎಂಬ ಆರೋಪದ ಹಿನ್ನೆಲೆ ಸರ್ಕಾರ, ಆಸ್ತಿ ವಿವರವನ್ನು ಕೇಳಿರುವುದು ಸ್ವಾಗತಾರ್ಹ ಎಂದು ಸಾಮಾಜಿಕ ಕಾರ್ಯಕರ್ತ ಅಮರೇಶ್ ಹೇಳಿದರು.

ನಗರದಲ್ಲಿ ಬಾಡಿಗೆ, ಗುತ್ತಿಗೆ ಹಾಗೂ ಲೀಸ್​ಗೆ ನೀಡಿರುವ ಬಿಬಿಎಂಪಿಯ ಆಸ್ತಿ ವಿವರಗಳನ್ನು ಸರ್ಕಾರಕ್ಕೆ ನೀಡಲಾಗಿದೆ ಎಂದು ಆಯುಕ್ತ ಬಿ.ಹೆಚ್.ಅನಿಲ್ ಕುಮಾರ್ ತಿಳಿಸಿದ್ದಾರೆ.

ಕೆಲವು ಸಂಘ ಸಂಸ್ಥೆಗಳಿಗೆ ನೀಡಿದ ಗುತ್ತಿಗೆ, ಬಾಡಿಗೆ ಅವಧಿ ಮುಗಿದ ಹಿನ್ನೆಲೆ ಅವುಗಳನ್ನು ವಶಕ್ಕೆ ಪಡೆಯಲಾಗಿದೆ. ಹಿಂದೆ ಕಡಿಮೆ ಮೊತ್ತದ ಬಾಡಿಗೆ, ಗುತ್ತಿಗೆ ನೀಡಿರುವುದರಿಂದ ಹೆಚ್ಚಿನ ಮೊತ್ತದ ತೆರಿಗೆ ಬಾಕಿ ಉಳಿದಿದೆ. ಈ ಎಲ್ಲ ಮಾಹಿತಿಯನ್ನು ಸರ್ಕಾರಕ್ಕೆ ನೀಡಲಾಗಿದೆ ಎಂದರು.

ಬಿಬಿಎಂಪಿಯ ಕೆಲವು ಆಸ್ತಿ ಪತ್ರಗಳನ್ನು ನಾಶ ಮಾಡಲಾಗಿದೆ. ಅಧಿಕಾರಿಗಳು ಇದರಲ್ಲಿ ಶಾಮೀಲಾಗಿದ್ದಾರೆ ಎಂದು ಸಾಮಾಜಿಕ ಕಾರ್ಯಕರ್ತ ಅಮರೇಶ್ ಆರೋಪಿಸಿದ್ದಾರೆ.