ಬೆಂಗಳೂರು : ದರೋಡೆ, ಸುಲಿಗೆ, ಕೊಲೆ ಯತ್ನಗಳನ್ನು ಮಾಡಿ ಬದುಕುತ್ತಿರುವ ರೌಡಿಶೀಟರ್ ಒಬ್ಬ ತನ್ನ ಮಗುವಿಗೆ ಮದ್ಯಪಾನ ಮಾಡಿಸುತ್ತಿರುವ ಎಕ್ಸ್ಕ್ಲೂಸಿವ್ ವಿಡಿಯೋ ಒಂದು ಈ ಟಿವಿ ಭಾರತಕ್ಕೆ ಲಭ್ಯವಾಗಿದೆ.
ರೌಡಿ ಅನ್ನೋ ಅರಿವಿಲ್ಲದೆಯೇ ಪ್ರೀತಿಯ ಬಲೆಗೆ ಬಿದ್ದು ಮಾಗಡಿ ರಸ್ತೆಯ ರೌಡಿಶೀಟರ್ ಕುಮಾರೇಶ್ ಜೊತೆ ಯುವತಿ ಮದುವೆಯಾಗಿದ್ದಳು. ಮದುವೆ ಬಳಿಕ ಆರು ತಿಂಗಳಿಗೆ ತನ್ನ ಗಂಡ ರೌಡಿಶೀಟರ್ ಎಂದು ತಿಳಿದು ಮನೆ ಬಿಟ್ಟು ಹೋಗಿದ್ದಳು.
ಮದುವೆ ಬಳಿಕ ಆಕೆ ಗಂಡು ಮಗುವಿಗೂ ಜನ್ಮ ನೀಡಿದ್ದಳು. ತಾಯಿ ಮನೆಯಲ್ಲಿ ನೆಮ್ಮದಿಯಿಂದ ಇರುವಾಗ ಎಂಟ್ರಿ ಕೊಟ್ಟ ಈ ಕಿರಾತಕ ಪತ್ನಿ ಮೇಲಿನ ಕೋಪಕ್ಕೆ ಮನೆಗೆ ನುಗ್ಗಿ ಜಗತ್ತಿನ ಅರಿವೇ ಇಲ್ಲದ ಮಗುವಿಗೆ ಕಂಠ ಪೂರ್ತಿ ಕುಡಿಸಿ ಕ್ರೌರ್ಯ ಮೆರೆದಿದ್ದಾನೆ.
ಪುಟ್ಟ ಕಂದನಿಗೆ ಪಾಪಿ ತಂದೆ ಕಲಿಸಿದ ಪಾಠವೇನು ಗೊತ್ತಾ?: ಮಗುವನ್ನು ಕದ್ದುಕೊಂಡು ಬಂದ ಆಸಾಮಿ ಹೆಂಡತಿ ಮೇಲಿನ ಸೇಡಿಗೆ ಮಗುವಿಗೆ ಮದ್ಯಪಾನ ಮಾಡಿಸಿ ತನ್ನ ಸಂಬಂಧಿ ಬಳಿ ವಿಡಿಯೋ ಮಾಡಿಸಿ ತಾಯಿಗೆ ಕಳಿಸಿ ವಿಕೃತಿ ಮೆರೆದಿದ್ದಾನೆ. ಗಂಡನ ವಿಕೃತಿ ನೋಡಿದ ಮಹಿಳೆ ವನಿತಾ ಸಹಾಯವಾಣಿ ಹಾಗೂ ಮಕ್ಕಳ ಸಹಾಯವಾಣಿಗೆ ದೂರು ನೀಡಿದ್ದು ಪೊಲೀಸರ ಸಹಾಯದಿಂದ ಮಗು ರಕ್ಷಣೆ ಮಾಡಿದ್ದಾರೆ.
ಈ ಸಂಬಂಧ ಮಾಗಡಿ ರಸ್ತೆ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಾಗಿದೆ. ದೂರು ದಾಖಲಾಗುತ್ತಿದ್ದಂತೆ ಆರೋಪಿ ಎಸ್ಕೇಪ್ ಆಗಿದ್ದು, ಮಗುವನ್ನು ರಕ್ಷಣೆ ಮಾಡಿ ತಾಯಿ ಮಡಿಲು ಸೇರಿಸಲಾಗಿದೆ. ಈ ಸಂಬಂಧ ಮಕ್ಕಳ ಸಹಾಯವಾಣಿಯವರು ತನಿಖೆ ಮುಂದುವರೆಸಿದ್ದು, ಪಾಪಿ ತಂದೆಗಾಗಿ ಬಲೆ ಬೀಸಿದ್ದಾರೆ.
