ಶಿಕ್ಷಕರ ವೇತನಾನುದಾನ ಬಿಡುಗಡೆಗೆ ಸಿಎಂ ಜೊತೆ ಚರ್ಚಿಸಿ ನಿರ್ಧಾರ ಪ್ರಕಟ: ನಾಗೇಶ್

ಸದನದಲ್ಲೇ ನಿರ್ಧಾರ ತಿಳಿಸುವಂತೆ ಪಟ್ಟು ಹಿಡಿದ ಪ್ರತಿಪಕ್ಷ ನಾಯಕರು, ಸಿಎಂ ಜೊತೆ ಮಾತನಾಡಿ ಶುಕ್ರವಾರದ ಒಳಗೆ ಶಿಕ್ಷಣ ಸಚಿವರು ನಿರ್ಧಾರ ಪ್ರಕಟಿಸುತ್ತಾರೆ ಎಂದು ಸಭಾನಾಯಕ ಕೋಟಾ ಶ್ರೀನಿವಾಸ ಪೂಜಾರಿ ಭರವಸೆ ನೀಡಿದ್ದಾರೆ.

ಬೆಂಗಳೂರು: ಶಾಲೆಗಳಿಗೆ ಹಣ ಕೊಡಿಸಬೇಕು ಎಂಬ ಕಾಳಜಿ ನಮಗೂ ಇದೆ. ಸಿಎಂ ಬೊಮ್ಮಾಯಿ ಅವರ ಜೊತೆ ಮಾತುಕತೆ ನಡೆಸಿ, ಶಿಕ್ಷಕರ ವೇತನಾನುದಾನ ಬಿಡುಗಡೆ ಮಾಡುವ ಕುರಿತು ನಿರ್ಧರಿಸುತ್ತೇನೆ. ಬೊಮ್ಮಾಯಿ ಅವರೇ ಹಣಕಾಸು ಸಚಿವರಾಗಿರುವ ಹಿನ್ನೆಲೆ ಮಾತುಕತೆ ನಡೆಸಿ ಶಿಕ್ಷಕರಿಗೆ ನ್ಯಾಯ ಒದಗಿಸುತ್ತೇನೆ ಎಂದು ಶಿಕ್ಷಣ ಸಚಿವ ಬಿ ಸಿ ನಾಗೇಶ್​ ಸದನದಲ್ಲಿ ಭರವಸೆ ಕೊಟ್ಟಿದ್ದಾರೆ.

ವಿಧಾನ ಪರಿಷತ್​ನಲ್ಲಿ 1986-87 ರಿಂದ 1994-95ನೇ ಸಾಲಿನವರೆಗೆ ಆರಂಭವಾದ ಸತತವಾಗಿ ನಡೆಯುತ್ತಿರುವ ಎಲ್ಲಾ ಕನ್ನಡ ಮಾಧ್ಯಮ ಶಾಲಾ ಕಾಲೇಜುಗಳನ್ನು ವೇತನಾನುದಾನಕ್ಕೆ ಒಳಪಡಿಸುವಂತೆ ಸರ್ಕಾರದ ಮೇಲೆ ಸರ್ವ ಪಕ್ಷದ ಸದಸ್ಯರು ತೀವ್ರ ಒತ್ತಡ ಹೇರಿದರು. ಪ್ರತಿಪಕ್ಷ ನಾಯಕರ ಪ್ರಶ್ನೆಗಳಿಗೆ ಪ್ರತಿಕ್ರಿಯೆ ನೀಡಿದ ಸಚಿವ, 1995ಕ್ಕಿಂತ ಮುಂಚಿನ ಶಾಲೆಗಳೇ ಹೆಚ್ಚಿವೆ. ಕಾಂಗ್ರೆಸ್ ಸರ್ಕಾರ ಇದ್ದಾಗಲೂ ನಿರ್ಲಕ್ಷ್ಯ ಆಗಿದೆ. ಶಾಲೆಗಳ ಬಗ್ಗೆ ಕಳಕಳಿ ನಮ್ಮ ಸರ್ಕಾರಕ್ಕೆ ಇದೆ. ಇಲ್ಲವಾಗಿದ್ದರೆ ಸಭೆಯೇ ಆಗುತ್ತಿರಲಿಲ್ಲ. ಈಗಿನ ಆರ್ಥಿಕ ಪರಿಸ್ಥಿತಿಯಲ್ಲಿ ಹಣ ಬಿಡುಗಡೆ ಆಗಿಲ್ಲ. ಸಿಎಂ ಜತೆ ಇಂದೇ ಮಾತುಕತೆ ನಡೆಸಿ ಒಂದು ತೀರ್ಮಾನ ಕೈಗೊಳ್ಳುತ್ತೇನೆ ಎಂದರು.

ಬಿಜೆಪಿ ಸದಸ್ಯ ಎಸ್. ವಿ. ಸಂಕನೂರು ಮಾತನಾಡಿ, ಶಿಕ್ಷಣ ಹಕ್ಕು ಕಾಯ್ದೆಯಡಿ 1ರಿಂದ 8ನೇ ತರಗತಿವರೆಗೆ ಉಚಿತ ಶಿಕ್ಷಣ ನೀಡಬೇಕು. ಇಲ್ಲಿ ಕಾರ್ಯನಿರ್ವಹಿಸುವ ನಿವೃತ್ತಿ ಅಂಚಿನಲ್ಲಿರುವ ಶಿಕ್ಷಕರಿಗೆ ಬಾಕಿ ಇರುವ ಅನುದಾನ ಬಿಡುಗಡೆ ಮಾಡಿ. 114 ಶಾಲೆಯಲ್ಲಿ ಶಿಕ್ಷಕರು ನಿಷ್ಠೆಯಿಂದ ಕೆಲಸ ಮಾಡಿದ್ದಾರೆ. ಸಾಮಾಜಿಕ ಬದ್ಧತೆಯಡಿ ಕಾರ್ಯ ಆಗಬೇಕು. ಈ ಬಗ್ಗೆ ಒಂದು ಕ್ರಮ ಕೈಗೊಳ್ಳುವಂತೆ ಸರ್ಕಾರಕ್ಕೆ ನೀವು ಆದೇಶ ನೀಡಬೇಕು. ಸರ್ಕಾರ ಶಿಕ್ಷಣಕ್ಕೆ ಮಹತ್ವ ಕೊಟ್ಟಿರುವಾಗ ಈ ಶಾಲೆಗಳನ್ನು ಬಿಟ್ಟಿರುವುದು ಎಷ್ಟು ಸರಿ. ಯಾವುದಾದರೂ ಯೋಜನೆ ಅಡಿ ಅನುದಾನ ಬಿಡುಗಡೆ ಮಾಡಬೇಕು ಎಂದು ಒತ್ತಾಯಿಸಿದರು.

ಖಾಸಗಿ ಶಾಲೆಗಳಿಗೆ ವೇತನಾನುದಾನ: ಜೆಡಿಎಸ್ ಸದಸ್ಯ ಮರಿತಿಬ್ಬೇಗೌಡ ಮಾತನಾಡಿ, ಯಾವುದೇ ಸರ್ಕಾರಕ್ಕೆ ಬದ್ಧತೆ ಇರಬೇಕು. ಯಡಿಯೂರಪ್ಪ ಸಿಎಂ ಆಗಿ ಬಂದ ಮೇಲೆ ಶಿಕ್ಷಣ ಇಲಾಖೆಯಲ್ಲಿ ಖಾಸಗಿ ಶಿಕ್ಷಣ ಸಂಸ್ಥೆ ಮಹತ್ವ ಅರಿತು ಕನ್ನಡ ಮಾಧ್ಯಮದ ಶಿಕ್ಷಣ ನೀಡುವ ಖಾಸಗಿ ಶಾಲೆಗೆ ವೇತನಾನುದಾನ ತಂದಿದ್ದೀರಿ. 2,699 ಶಾಲೆಗಳು ಇದರ ವ್ಯಾಪ್ತಿಗೆ ಒಳಪಟ್ಟಿದ್ದು, 3 ಸಾವಿರಕ್ಕೂ ಹೆಚ್ಚು ಶಾಲೆಗಳಿಗೆ ಸವಲತ್ತು ಸಿಕ್ಕಿಲ್ಲ. ಈ ಶಿಕ್ಷಕರ ಜೀವನ ನರಕ. ಯಡಿಯೂರಪ್ಪ, ಕುಮಾರಸ್ವಾಮಿ, ಸಿದ್ದರಾಮಯ್ಯ ಸರ್ಕಾರದ ಅವಧಿಯಲ್ಲಿ ವೇತನಾನುದಾನ ಸಿಕ್ಕಿತ್ತು. ಈಗಿನ ಸರ್ಕಾರ ಚೌಕಾಸಿ ಎಣಿಸುತ್ತಿದೆ.

ಶಿಕ್ಷಣ ಇಲಾಖೆ, ಅದರಲ್ಲೂ ಕನ್ನಡ ಮಾಧ್ಯಮ ಶಿಕ್ಷಣ ಉಳಿಸಲು ಆಗದ ಸರ್ಕಾರ ನಾಲಾಯಕ್. ಇಂತಹ ಸರ್ಕಾರ ಬೇಕಾ? 576 ಹುದ್ದೆಗೆ ವೇತನಾನುದಾನ ನೀಡಲಾಗದಿದ್ದರೆ ಹೇಗೆ? ಸಿಎಂ ನೇತೃತ್ವದಲ್ಲಿ ನಡೆದ ಸಭೆಯಲ್ಲಿ ಈ‌ ಬಗ್ಗೆ ತೀರ್ಮಾನ ಆಗಿದೆ. ಆದರೆ ಈಗ ಅನುದಾನ ನೀಡಲು ಎದುರಾಗಿರುವ ಸಮಸ್ಯೆ ಏನು? ವಿಧಾನ ಪರಿಷತ್ ನಡಾವಳಿಯನ್ನು ಆರ್ಥಿಕ ಇಲಾಖೆ ಪರಿಗಣಿಸಲ್ಲ ಅಂದರೆ ಏನು? ಸರ್ಕಾರದ ಆರ್ಥಿಕ ಇಲಾಖೆ ಈ ಅನುದಾನ ಬಿಡುಗಡೆ ಸಂಬಂಧ ಆದೇಶ ಹೊರಡಿಸಿದೆ.

ಕಡಿಮೆ ಸಂಬಳಕ್ಕೆ ದುಡಿಯುತ್ತಿರುವ ಶಿಕ್ಷಕರು: ಸಾಕಷ್ಟು ಶಿಕ್ಷಕರಿಗೆ ವಯಸ್ಸಾಗಿದೆ. ಕೋವಿಡ್ ನಂತರ ಮಕ್ಕಳು ಕಾಲೇಜಿಗೆ ಬರುತ್ತಿಲ್ಲ. ಹಿಂದಿನಿಂದ ಬಂದ ವ್ಯವಸ್ಥೆ ಬದಲಾಗಿದ್ದೇಕೆ? ನಮ್ಮ ತಾಳ್ಮೆ ಕೆಟ್ಟಿದೆ. ನಾಳೆಯಿಂದಲೇ ಶಿಕ್ಷಕರಿಗೆ ಅನುದಾನ ನೀಡಿಕೆ ಪ್ರಾರಂಭವಾಗಲಿದೆ ಎಂದು ಪರಿಷತ್​ಗೆ ಸಿಎಂ ಬಂದು ಭರವಸೆ ನೀಡುವವರೆಗೆ ನಾನು ಬಾವಿಯಿಂದ ಆಚೆ ಬರುವುದಿಲ್ಲ. ಶಿಕ್ಷಕರು ಕೆಲವರು ಪುಕ್ಕಟೆ, ಇಲ್ಲ 2 ಸಾವಿರ ರೂ.ಗೆ ಕೆಲಸ ಮಾಡುತ್ತಿದ್ದಾರೆ.

ಇದನ್ನೂ ಓದಿ: ಹಿಂದುಳಿದ ತಾಲೂಕುಗಳ ವಾಸ್ತವ ಪರಿಶೀಲನೆಗಾಗಿ ಹೊಸ ಸಮಿತಿ ರಚಿಸಲು ಚಿಂತನೆ : ಸಚಿವ ಜೆ ಸಿ ಮಾಧುಸ್ವಾಮಿ

ಕಳೆದ 110 ದಿನದಿಂದ ಶಿಕ್ಷಕರು ಧರಣಿ ಮಾಡುತ್ತಿದ್ದಾರೆ. ಇವರಿಗೆ ಮನಸ್ಸು ಬೇಡವಾ? ಸರ್ಕಾರ ಚಿಂತನೆ ನಡೆಸಬೇಕು. ಈ ಸಮಸ್ಯೆ ಬಗೆಹರಿಸಬೇಕು. ಸದನ ಸುಗಮವಾಗಿ ನಡೆಯಲು ನಾವು ಬಿಡುತ್ತೇವೆ. ಶಿಕ್ಷಕರ ಸಂಘಟನೆ ಬಲವಾಗಿದೆ. ನಿರ್ಲಕ್ಷ್ಯ ಹೆಚ್ಚಾದರೆ ಸರ್ಕಾರವನ್ನು ಕಿತ್ತೊಗೆಯುವ ಶಕ್ತಿ ಶಿಕ್ಷಕರಿಗೆ ಇದೆ. ಅವರಿಗೆ ವೇತನಾನುದಾನ ಬಿಡುಗಡೆ ಮಾಡಿ, ನೀವೇ ಮತ ಪಡೆಯಿರಿ ಎಂದರು.

ಪ್ರತಿಪಕ್ಷ ನಾಯಕ ಬಿ.ಕೆ. ಹರಿಪ್ರಸಾದ್ ಮಾತನಾಡಿ, ಬಹಳ ಗಂಭೀರ ವಿಚಾರವಾಗಿದೆ. 26.64 ಕೋಟಿ ರೂ. ವಾರ್ಷಿಕ ಅನುದಾನ ಅಗತ್ಯ ಬೀಳಲಿದೆ. ಸದನದ ನಿರ್ಣಯವನ್ನೇ ಹಣಕಾಸು ಇಲಾಖೆ ಪರಿಗಣಿಸಿಲ್ಲ ಅಂದರೆ ನಾವು, ಸರ್ಕಾರ ಇರುವುದು ವ್ಯರ್ಥ. ಶಾಲೆಗಳಲ್ಲಿ ಹುದ್ದೆಗಳು ಖಾಲಿ ಇವೆ. ಅನಗತ್ಯ ವಿಚಾರಕ್ಕೆ ಸರ್ಕಾರ ಹಣ ನೀಡುತ್ತಿದೆ. ಮಕ್ಕಳ, ರಾಜ್ಯದ ಭವಿಷ್ಯ ರೂಪಿಸುವ ಶಿಕ್ಷಕರಿಗೆ ಯಾಕೆ ಅನುದಾನ ಸಿಗುತ್ತಿಲ್ಲ. ಆದಷ್ಟು ಬೇಗ ಸರ್ಕಾರ ನಿರ್ಧಾರ‌ ಕೈಗೊಳ್ಳಬೇಕು ಎಂದರು. ಬಿಜೆಪಿ ಸದಸ್ಯ ಹನುಮಂತ ನಿರಾಣಿ, ಮಧು ಜಿ. ಮಾದೇಗೌಡ, ನಾಗರಾಜ್ ಯಾದವ್, ಪುಟ್ಟಣ್ಣ, ಭೋಜೇಗೌಡ, ಪ್ರಕಾಶ್ ರಾಥೋಡ್, ನಾರಾಯಣಸ್ವಾಮಿ, ಪಿ.ಆರ್. ರಮೇಶ್ ಮತ್ತಿತರರು ಮಾತನಾಡಿದರು.

ಪ್ರತಿಪಕ್ಷ ನಾಯಕರಿಂದ ಒತ್ತಾಯ: ಸಭಾಪತಿ ಬಸವರಾಜ್ ಹೊರಟ್ಟಿ ಮಾತನಾಡಿ, ಸರ್ಕಾರಕ್ಕೆ 26 ಕೋಟಿ ದೊಡ್ಡದೇನಲ್ಲಾ, ಆದಷ್ಟು ಬೇಗ ಅನುದಾನ ಬಿಡುಗಡೆ ಮಾಡಿಸಿ ಎಂದರು. ಸದನದ ಅವಧಿ ಮುಗಿಯುವ ಮುನ್ನವೇ ನಿರ್ಧಾರ ಕೈಗೊಳ್ಳಿ ಎಂದು ಪ್ರತಿಪಕ್ಷಗಳು ಒತ್ತಾಯಿಸಿದವು. ಪ್ರತಿಪಕ್ಷ ನಾಯಕ ಬಿ.ಕೆ. ಹರಿಪ್ರಸಾದ್, ಬಿಜೆಪಿ ಸದಸ್ಯ ಪುಟ್ಟಣ್ಣ ಸರ್ಕಾರ ಶಿಕ್ಷಕರಿಗೆ ನ್ಯಾಯ ಒದಗಿಸಬೇಕೆಂದು ಒತ್ತಾಯಿಸಿದರು. ನಾಳೆಯಾದರೂ ಉತ್ತರ ಕೊಡಿಸಿ ಎಮದು ವಿಪಕ್ಷ ನಾಯಕರುಗಳು ಹೇಳಿದರು. ಸಭಾ ನಾಯಕರು ಸಹ ತಕ್ಷಣ ಉತ್ತರ ನೀಡಲಾಗದು. ಒತ್ತಡ ಹೇರಬಾರದು ಎಂದರು.

ಸಚಿವರು ನಾನು ಮಾತನಾಡಿದ ನಂತರ ಉತ್ತರ ನೀಡುತ್ತೇನೆ ಎಂದರು. ಪ್ರತಿಪಕ್ಷ ಸಚೇತಕ ಪ್ರಕಾಶ್ ರಾಥೋಡ್ ಮಾತನಾಡಿ, ಎರಡು ದಿನದಲ್ಲಿ ಉತ್ತರ ಕೊಡಿಸಿ ಎಂದರು. ಬಿಜೆಪಿ ಸದಸ್ಯ ಪುಟ್ಟಣ್ಣ, ಜೆಡಿಎಸ್ ಸದಸ್ಯ ಮರಿತಿಬ್ಬೇಗೌಡ, ಕಾಂಗ್ರೆಸ್ ಸದಸ್ಯ ನಾಗರಾಜ್ ಯಾದವ್ ಬಾವಿಗಿಳಿದು ಧರಣಿಗೆ ಮುಂದಾದರು. ಸರ್ಕಾರದ ಪರವಾಗಿ ಸಭಾನಾಯಕರು ಮನವೊಲಿಸುವ ಯತ್ನ ಮಾಡಿದರು. ಸಚಿವ ನಾಗೇಶ್ ಮತ್ತೊಮ್ಮೆ ಸಿಎಂ ಜತೆ ಸಮಾಲೋಚಿಸಿ ಉತ್ತರ ಕೊಡುತ್ತೇನೆ ಎಂದರು. ಪ್ರತಿಪಕ್ಷ ನಾಯಕರು ಸಹ ಒತ್ತಾಯಿಸಿ, ಮುಂದಿನ ಒಂದೆರಡು ದಿನದಲ್ಲಿ ಸಿಎಂ ಇಲ್ಲಿ ಬರುತ್ತಾರೆ. ಅವರ ಮೂಲಕ ಉತ್ತರ ಕೊಡಿಸುತ್ತೇನೆ ಎನ್ನಲಿ ಸಾಕು ಎಂದರು.

ಅಂತಿಮವಾಗಿ ಸಭಾನಾಯಕ ಕೋಟಾ ಶ್ರೀನಿವಾಸ ಪೂಜಾರಿ ಮಾತನಾಡಿ, ಇನ್ನೆರಡು ದಿನದಲ್ಲಿ ಸಿಎಂ ಜತೆ ಸಚಿವ ನಾಗೇಶ್ ಅವರು ಮಾತುಕತೆ ನಡೆಸುತ್ತಾರೆ. ಸಿಎಂ ಮಾತುಕತೆಯಿಂದ ಬರುವ ತೀರ್ಮಾನವನ್ನು ಸದನ ಮುಕ್ತಾಯವಾಗುವ ಮುನ್ನ ತಿಳಿಸುತ್ತೇವೆ. ತಾವೇ ಬಂದು ಉತ್ತರ ನೀಡಿ ಎಂದು ಮನವಿ ಮಾಡುತ್ತೇವೆ. ತುಂಬಾ ಬಲವಂತ ಕೇಳಿ ಬಂದಾಗ ಶುಕ್ರವಾರದ ಒಳಗೆ ಉತ್ತರ ನೀಡುವ ಭರವಸೆಯನ್ನು ನೀಡಿದರು. ದರಣಿ ನಿರತ ಸದಸ್ಯರು ತಮ್ಮ ಸ್ಥಳಕ್ಕೆ ವಾಪಸ್ ತೆರಳಿದರು.

ಇದನ್ನೂ ಓದಿ: ಕಾಂಗ್ರೆಸ್​ನ ಫ್ರೀ ವಿದ್ಯುತ್​ಗೆ ಸದನದಲ್ಲಿ ಟಾಂಗ್ ನೀಡಿದ ಇಂಧನ ಸಚಿವ ಸುನೀಲ್ ಕುಮಾರ್..!