ಬೆಂಗಳೂರು: ರಾಜ್ಯದ ಎಲ್ಲ ಶಾಲೆಗಳಲ್ಲಿ ನವೆಂಬರ್ 26ರಂದು ಸಂವಿಧಾನ ದಿನಾಚರಣೆ ನಡೆಸುವ ಕುರಿತು ಖಾಸಗಿ ಸಂಸ್ಥೆಯೊಂದು ಸಿದ್ಧಪಡಿಸಿದ್ದ ಸುತ್ತೋಲೆಯನ್ನು ಅಧಿಕಾರಿಗಳ ಗಮನಕ್ಕೆ ಬಾರದೆ ಇಲಾಖೆ ವೆಬ್ಸೈಟ್ನಲ್ಲಿ ಅಪ್ಲೋಡ್ ಮಾಡಲಾಗಿತ್ತು.
ಹೌದು, ಸಾರ್ವಜನಿಕ ಶಿಕ್ಷಣ ಇಲಾಖೆಯ ಹಿರಿಯ ಅಧಿಕಾರಗಳ ಗಮನಕ್ಕೆ ತಾರದೇ, ವೆಬ್ ಸೈಟ್ನಲ್ಲಿ ನವೆಂಬರ್ 26 ರಂದು 'ಸಂವಿಧಾನ ದಿನಾಚರಣೆ’ ಕುರಿತು ಅಕ್ಟೋಬರ್ 10ರಂದು ಸುತ್ತೋಲೆ ಹೊರಡಿಸಲಾಗಿತ್ತು. ಆ ಸುತ್ತೋಲೆ ಡಾ. ಬಿ.ಆರ್. ಅಂಬೇಡ್ಕರ್ ಸಂವಿಧಾನ ರಚಿಸಿದ್ದ ಕುರಿತು ಸಾಕಷ್ಟು ಗೊಂದಲಕಾರಿ ವಿಷಯಗನ್ನು ಒಳಗೊಂಡಿತ್ತು. ಅಂಬೇಡ್ಕರ್ ಒಬ್ಬರೇ ಸಂವಿಧಾನ ರಚಿಸಿಲ್ಲ, ಬೇರೆ ಬೇರೆ ಸಮಿತಿಗಳು ಬರೆದಿದ್ದ ಕಾನೂನುಗಳನ್ನು ಒಟ್ಟುಗೂಡಿಸಿ ಅಂಬೇಡ್ಕರ್ ಕರಡು ತಯಾರಿಸಿದ್ದರು ಎಂದು ಉಲ್ಲೇಖಿಸಲಾಗಿತ್ತು. ಇದು ಭಾರೀ ಚರ್ಚೆಗೆ ಗ್ರಾಸವಾಗಿತ್ತು.
ಈ ಸಂಬಂಧ ಪ್ರತಿಕ್ರಿಯಿಸಿರುವ ಸಚಿವ ಸುರೇಶ್ ಕುಮಾರ್, ಈ ಸುತ್ತೋಲೆಯಲ್ಲಿ ಆಯುಕ್ತರ ಹಾಗೂ ಪ್ರಧಾನ ಕಾರ್ಯದರ್ಶಿ ಸೇರಿದಂತೆ ಯಾರೊಬ್ಬರು ಸಹಿ ಮಾಡಿಲ್ಲ. ಅಂತಹ ಸುತ್ತೋಲೆಯನ್ನು ವೆಬ್‌ಸೈಟ್‌ಗೆ ಅಪ್ಲೋಡ್ ಮಾಡಿದವರು ಯಾರೆಂಬುದು ಸಹ ತಿಳಿದಿಲ್ಲ. ಹೀಗಾಗಿ ಸುತ್ತೋಲೆಯನ್ನು ಹಿಂಪಡೆಯಲಾಗಿದೆ. ಮುಂದಿನ ದಿನಗಳಲ್ಲಿ ಸುತ್ತೋಲೆ ಸಿದ್ಧಪಡಿಸಿದ್ದ ಖಾಸಗಿ ಸಂಸ್ಥೆಯನ್ನು ಕಪ್ಪು ಪಟ್ಟಿಗೆ ಸೇರಿಸಲಾಗುವುದು ಅಂತ ತಿಳಿಸಿದರು.
ಇನ್ನು ಖಾಸಗಿ ಸಂಸ್ಥೆ ನೀಡುವ ಮಾರ್ಗಸೂಚಿ ಅವಶ್ಯಕತೆ ಇಲ್ಲ. ಸಂವಿಧಾನ ದಿನದ ಆಚರಣೆ ನಮ್ಮ ಪಾಡಿಗೆ ನಾವು ಆಚರಣೆ ಮಾಡುತ್ತೀವಿ. ಬೇರೆಯವರ ಮಾರ್ಗಸೂಚಿ ಬೇಡ ಅಂತ ಸ್ಪಷ್ಟಪಡಿಸಿದರು.
