ಬೆಳಗಾವಿ: ಸಂಸತ್ನಲ್ಲಿ ಭದ್ರತಾ ಲೋಪವಾದ ಹಿನ್ನೆಲೆ ಕಾಂಗ್ರೆಸ್ ಶಾಸಕರು ಕೇಂದ್ರ ಸರ್ಕಾರದ ವಿರುದ್ಧ ವಾಗ್ದಾಳಿ ನಡೆಸಿದ್ದಾರೆ. ಸುವರ್ಣಸೌಧದಲ್ಲಿ ಮಾತನಾಡಿದ ಶಾಸಕ ರಿಜ್ವಾನ್ ಅರ್ಷದ್, "ಸಂಸತ್ ಮೇಲೆ ಸುಮಾರು 20 ವರ್ಷಗಳ ಹಿಂದೆ ದಾಳಿಯಾಗಿತ್ತು. ಅನೇಕರು ಪ್ರಾಣ ಕಳೆದುಕೊಂಡಿದ್ದರು. 20 ವರ್ಷದ ಬಳಿಕ ಆನಿವರ್ಸರಿ ಆಗಿದೆ. ಇಂದು ಲೋಕಸಭೆ ಕಲಾಪದ ವೇಳೆ ಇಬ್ಬರು ದುಷ್ಕರ್ಮಿಗಳು ಒಳನುಗ್ಗಿ, ಸ್ಮೋಕ್ ಕ್ರ್ಯಾಕರ್ವೊಂದನ್ನು ಸ್ಪ್ರೇ ಮಾಡುತ್ತಾರೆ ಎಂದರೆ ನರೇಂದ್ರ ಮೋದಿ ನೇತೃತ್ವದ ಬಿಜೆಪಿ ಸರ್ಕಾರ ಎಷ್ಟು ಅಸಮರ್ಥವಾಗಿದೆ ಎಂದು ತಿಳಿಯುತ್ತದೆ. ಇದು ಇವರ ನಿರ್ಲಕ್ಷ್ಯನೋ, ಅಸಹಾಯಕತೆನೋ ನನಗೆ ಅರ್ಥವಾಗುತ್ತಿಲ್ಲ" ಎಂದು ಟೀಕಿಸಿದರು.
ಸಂಸದ ಪ್ರತಾಪ್ ಸಿಂಹ ಮೇಲೆ ಕೇಸ್ ದಾಖಲಾಗಬೇಕು: "ನನಗೆ 56 ಇಂಚಿನ ಎದೆ ಇದೆ, ಶಕ್ತಿ ಇದೆ. ಎಲ್ಲರಿಗೂ ಭದ್ರತೆ ಕೊಡುತ್ತೀವಿ ಅಂತ ಘೋಷಣೆ ಕೂಗುತ್ತಾರೆ. ಕಲಾಪ ನಡೆಯುವಾಗ ಸಂಸತ್ ರಕ್ಷಣೆ ಮಾಡದೇ ಇರುವಂತಹ ಅಸಮರ್ಥ ಸರ್ಕಾರವನ್ನು ಇತಿಹಾಸದಲ್ಲಿ ನೋಡಿಲ್ಲ. ಸಂಸದ ಪ್ರತಾಪ್ ಸಿಂಹ ಅವರ ಕಚೇರಿಯಿಂದಲೇ ಪಾಸ್ ಕೊಡಲಾಗಿರುವುದರಿಂದ ಅವರ ಮೇಲೆ ಮೊದಲು ನ್ಯಾಷನಲ್ ಸೆಕ್ಯುರಿಟಿ ಆಕ್ಟ್ ಅಡಿ ಪ್ರಕರಣ ದಾಖಲಿಸಬೇಕು. ಇದೇ ರೀತಿ ಬೇರೆ ಯಾರಾದರೂ ಪಾಸ್ ನೀಡಿದ್ದರೆ ಬಿಜೆಪಿಯವರು ಯುಎಪಿಎ, ಎನ್ಎಸ್ಎ ಪ್ರಕರಣ ಹಾಕುತ್ತಿದ್ದರು. ಇದೊಂದು ದೊಡ್ಡ ಷಡ್ಯಂತ್ರ ಎಂದು ಕೊಗುತ್ತಿದ್ದರು" ಎಂದು ವಾಗ್ದಾಳಿ ನಡೆಸಿದರು.
ಘಟನೆಯನ್ನು ಖಂಡಿಸುತ್ತೇನೆ: ಇದೇ ವೇಳೆ ಮಾತನಾಡಿದ ವಿಧಾನ ಪರಿಷತ್ ಸದಸ್ಯ ಬಿ.ಕೆ.ಹರಿಪ್ರಸಾದ್, "ಈ ಹಿಂದೆ ಉಗ್ರಗಾಮಿಗಳು ಪಾರ್ಲಿಮೆಂಟ್ ಮೇಲೆ ದಾಳಿ ನಡೆಸಿದ್ದರು. ಹುತಾತ್ಮರಿಗೆ ಸಂತಾಪ ಸೂಚಿಸುವ ದಿನವೇ ಈ ಘಟನೆ ನಡೆದಿದೆ. ಹೊಸ ಪಾರ್ಲಿಮೆಂಟ್ ಕಟ್ಟಿದ್ದಾರೆ. ಆದರೂ ರಾಷ್ಟ್ರದ ಭದ್ರತೆ ಕುಸಿದಿದೆ. ಭದ್ರತಾ ವೈಫಲ್ಯದ ಹೊಣೆಯನ್ನ ಗೃಹ ಸಚಿವರು ಹೊರಬೇಕು. ಈ ಘಟನೆಯನ್ನು ನಾನು ಖಂಡಿಸುತ್ತೇನೆ" ಎಂದು ಹೇಳಿದರು.
ಅಮಿತ್ ಶಾ ರಾಜೀನಾಮೆ ಕೊಡಬೇಕು: ಈ ಬಗ್ಗೆ ಮಾತನಾಡಿದ ಕಾಂಗ್ರೆಸ್ ಶಾಸಕ ಅಜಯ ಸಿಂಗ್, "ಲೋಕಸಭೆಯಲ್ಲಿ ಈ ರೀತಿ ಆಗಿರುವುದು ದೇಶದ ದೊಡ್ಡ ಭದ್ರತಾ ವೈಫಲ್ಯ. ಪಾರ್ಲಿಮೆಂಟ್ ನಲ್ಲಿ ಈ ರೀತಿ ಆದರೆ ಸಾರ್ವಜನಿಕ ಪರಿಸ್ಥಿತಿ ಏನು?. ಘಟನೆಯ ಸಂಪೂರ್ಣ ಜವಾಬ್ದಾರಿ ಕೇಂದ್ರ ಸರ್ಕಾರ ಹೊರಬೇಕು. ಅಮಿತ್ ಶಾ ಘಟನೆಯ ಹೊಣೆ ಹೊತ್ತು ರಾಜೀನಾಮೆ ನೀಡಬೇಕು" ಎಂದು ಆಗ್ರಹಿಸಿದರು.
ಇದನ್ನೂ ಓದಿ: ಸಂಸತ್ ನಮಗೆ ದೇಗುಲ ಇದ್ದಂತೆ, ತಂದೆಯಾಗಿ ಖಂಡಿಸುತ್ತೇನೆ: ಮನೋರಂಜನ್ ತಂದೆ ಪ್ರತಿಕ್ರಿಯೆ
