ಬೆಂಗಳೂರು: ನಗರದಲ್ಲಿ ಪೊಲೀಸರು ಎಷ್ಟೇ ಕಠಿಣ ಕ್ರಮ ಕೈಗೊಂಡಿದ್ದರೂ ಸಹ ಕೆಲವರು ಬುದ್ಧಿ ಕಲಿಯುತ್ತಿಲ್ಲ. ಅದರಲ್ಲೂ ಬೈಕ್ ವ್ಹೀಲಿಂಗ್ ಶೋಕಿ ಮಾಡುವವರ ಉಪಟಳ ಹೆಚ್ಚುತ್ತಲೇ ಇದೆ. ವಾಹನ ಸವಾರರಿಗೆ ಎಷ್ಟೇ ತೊಂದರೆ ಆದರೂ ಅದಕ್ಕೆ ತಲೆಕೆಡಿಸಿಕೊಳ್ಳದ ಕೆಲ ಪುಂಡರು ವ್ಹೀಲಿಂಗ್ ಕೃತ್ಯವನ್ನು ಮುಂದುವರಿಸಿದ್ದಾರೆ.
ಸೈಯದ್ ಎಂಬಾತ ವ್ಹೀಲಿಂಗ್ ಮಾಡಿ ವಿಡಿಯೋವನ್ನು ದೊಡ್ಡ ಸಾಧನೆ ಎಂಬಂತೆ ಸಾಮಾಜಿಕ ಜಾಲತಾಣದಲ್ಲಿ ಅಪ್ಲೋಡ್ ಮಾಡಿದ್ದಾನೆ. ಈತನ ಹುಚ್ಚಾಟಕ್ಕೆ ಯುವತಿಯೊಬ್ಬಳು ಬೈಕ್ ಹಿಂದೆ ಕೂತು ಸಾಥ್ ನೀಡಿದ್ದಾಳೆ. ನಗರದ ಜಕ್ಕೂರು ರಸ್ತೆ, ತುಮಕೂರು ರಸ್ತೆ, ನಗರದ ಹೊರವಲಯ ರಸ್ತೆ , ಬಿಇಎಲ್ ರಸ್ತೆಗಳಲ್ಲಿ ಹಾವಳಿ ನಡೆಸಿದ್ದಾರೆ.
ಇದೇ ಸೈಯ್ಯದ್ ಕೆಲ ಪುಂಡರ ಜೊತೆ ಸೇರಿ ಕೈಯಲ್ಲಿ ಡ್ರ್ಯಾಗರ್ ಹಿಡಿದು ವ್ಹೀಲಿಂಗ್ ಮಾಡಿದ್ದಾರೆ. ಇಷ್ಟೇ ಅಲ್ಲದೇ ರಸ್ತೆಯಲ್ಲಿ ಹಾಕಿದ್ದ ಬ್ಯಾರಿಕೇಡ್ಗಳನ್ನು ಒದ್ದು ಪುಂಡಾಟ ಆಟಾಟೋಪ ಮೆರೆದಿದ್ದಾರೆ. ಸದ್ಯ ಈ ವಿಡಿಯೋಗಳು ಸಾಮಾಜಿಕ ಜಾಲತಾಣಗಳಲ್ಲಿ ಸಾಕಷ್ಟು ವೈರಲ್ ಆಗಿವೆ.
ಸದ್ಯ ಬೆಂಗಳೂರಲ್ಲಿ ಕೆಲ ಕಿಡಿಗೇಡಿಗಳು ಬೈಕ್ ನಲ್ಲಿ ಸುತ್ತುತ್ತ ರಸ್ತೆಯಲ್ಲಿ ಮಾರಕಾಸ್ತ್ರ ಹಿಡಿದು ಕಾನೂನುಬಾಹಿರ ಕೃತ್ಯಗಳಲ್ಲಿ ಭಾಗಿಯಾಗುತ್ತಿದ್ದಾರೆ. ಪೊಲೀಸರು ವ್ಹೀಲಿಂಗ್ಗೆ ಬ್ರೇಕ್ ಹಾಕಲು ಎಷ್ಟೇ ಕಠಿಣ ಕ್ರಮ ಕೈಗೊಂಡರೂ ಪೂರ್ಣ ಪ್ರಮಾಣದಲ್ಲಿ ಕಡಿವಾಣ ಹಾಕಲು ಸಾಧ್ಯವಾಗುತ್ತಿಲ್ಲ ಎಂಬುದೇ ವಿಪರ್ಯಾಸ ಎಂದು ಸಾರ್ವಜನಿಕರು ಬೇಸರ ಹೊರಹಾಕಿದ್ದಾರೆ.
ಇದನ್ನೂ ಓದಿ: ಗೋಲಿ ಆಡುವ ವಿಚಾರದಲ್ಲಿ ಗಲಾಟೆ: ಬೈಕ್, ಕಾರು ಜಖಂ
