ದೇವನಹಳ್ಳಿ ಕಾಂಗ್ರೆಸ್ ಬಂಡಾಯ ಶಮನಕ್ಕೆ ಮುನಿಯಪ್ಪ ಸಭೆ: ದೂರ ಉಳಿದ ಎ ಸಿ ಶ್ರೀನಿವಾಸ್ ನಡೆ ನಿಗೂಢ

ದೇವನಹಳ್ಳಿ ವಿಧಾನಸಭಾ ಕ್ಷೇತ್ರದ ಕಾಂಗ್ರೆಸ್ ಅಭ್ಯರ್ಥಿ ಕೆ ಎಚ್ ಮುನಿಯಪ್ಪ ನೇತೃತ್ವದಲ್ಲಿ ಸಭೆ- ಕಾಂಗ್ರೆಸ್ ಮುಖಂಡರಿಂದ ಒಗ್ಗಟ್ಟು ಪ್ರದರ್ಶನ- ಕೈ ಟಿಕೆಟ್ ತಪ್ಪಿದ್ದಕ್ಕೆ ಪ್ರಬಲ ಆಕಾಂಕ್ಷಿ ಎ ಸಿ ಶ್ರೀನಿವಾಸ್ ಸಭೆಗೆ ಗೈರು

ದೇವನಹಳ್ಳಿ (ಬೆಂಗಳೂರು ಗ್ರಾಮಾಂತರ): ರಾಜ್ಯ ವಿಧಾನಸಭಾ ಚುನಾವಣೆ ಕಾಂಗ್ರೆಸ್​ನ​ ಮೊದಲನೇ ಪಟ್ಟಿಯಲ್ಲಿ ದೇವನಹಳ್ಳಿ ವಿಧಾನಸಭಾ ಕ್ಷೇತ್ರದ ಟಿಕೆಟ್ ಮಾಜಿ ಕೇಂದ್ರ ಸಚಿವ ಕೆ ಎಚ್ ಮುನಿಯಪ್ಪ ಅವರಿಗೆ ಫೈನಲ್ ಆಗುತ್ತಿದ್ದಂತೆ ತಾಲೂಕು ಕಾಂಗ್ರೆಸ್​​ದಲ್ಲಿ ಭಿನ್ನಮತ ಸ್ಫೋಟಗೊಂಡಿದೆ. ಇದೀಗ ಮೊದಲ ಬಾರಿಗೆ ಮಾಜಿ ಕೇಂದ್ರ ಸಚಿವ ಕೆ ಎಚ್ ಮುನಿಯಪ್ಪ ಅವರು ತಾಲೂಕು ಮುಖಂಡರ ಸಭೆ ಕರೆದು, ಕಾಂಗ್ರೆಸ್ ಬಂಡಾಯ ಶಮನಕ್ಕೆ ಪ್ರಯತ್ನಿಸಿದ್ದಾರೆ. ಪ್ರಬಲ ಟಿಕೆಟ್ ಆಕಾಂಕ್ಷಿ ಎ ಸಿ ಶ್ರೀನಿವಾಸ್ ಸಭೆಯಿಂದ ದೂರು ಉಳಿದಿರುವುದು ಭಿನ್ನಮತ ತಣ್ಣಗಾಗಿಲ್ಲ ಎಂಬುದಕ್ಕೆ ಸಾಕ್ಷಿಯಂತಿದೆ.

ಬಂಡಾಯ ತಣ್ಣಗಾಗಿಸಲು ಹರಸಾಹಸ: ಟಿಕೆಟ್ ಘೋಷಣೆ ದಿನದಿಂದ ಪ್ರಚಾರಕ್ಕಿಳಿಯದೇ ಪಕ್ಷದಲ್ಲಿದ್ದ ಬಂಡಾಯ ತಣ್ಣಗಾಗಿಸಲು ಕೆ ಎಚ್ ಮುನಿಯಪ್ಪ ಹರಸಾಹಸ ಪಟ್ಟಿದ್ದರು. ಇನ್ನು ಕಾಂಗ್ರೆಸ್ ಪಕ್ಷದ ಟಿಕೆಟ್ ಪ್ರಬಲ ಆಕಾಂಕ್ಷಿಗಳಾದ ಎ ಸಿ‌ ಶ್ರೀನಿವಾಸ್, ಶಾಂತಕುಮಾರ್, ವೆಂಕಟಸ್ವಾಮಿಗೆ ಸೆಡ್ಡು‌ ಹೊಡೆದು ಕೆ ಎಚ್ ಮುನಿಯಪ್ಪ ಟಿಕೆಟ್ ತಂದಿದ್ದಕ್ಕೆ ಪಕ್ಷದಲ್ಲಿ ಅಪಸ್ವರ ಎದ್ದಿತ್ತು.

ಇದೀಗ ಮೊದಲ ಬಾರಿಗೆ ಕೆ ಎಚ್ ಮುನಿಯಪ್ಪ ಅವರು ತಾಲೂಕು ಮುಖಂಡರ ಸಭೆ ಕರೆದಿದ್ದರು. ಆದ್ರೆ ಪ್ರಬಲ ಟಿಕೆಟ್ ಆಕಾಂಕ್ಷಿ ಎ ಸಿ ಶ್ರೀನಿವಾಸ್ ಸಭೆಯಿಂದ ದೂರು ಉಳಿದು ಗೈರು ಹಾಜರಾಗಿದ್ದಾರೆ. ಎ ಸಿ‌‌‌ ಶ್ರೀನಿವಾಸ್ ಹೊರತುಪಡಿಸಿ ಬಹುತೇಕ ನಾಯಕರ ಮನವೊಲಿಕೆಯಲ್ಲಿ ಕೆ ಎಚ್ ಮುನಿಯಪ್ಪ ಮಾಡಿದ ಪ್ಲಾನ್ ಸಕ್ಸಸ್ ಆಗಿದೆ.

ಆದ್ರೆ ಎ ಸಿ ಶ್ರೀನಿವಾಸ್ ಮುಂದಿನ ನಡೆ ನಿಗೂಢವಾಗಿದೆ. ಆದ್ರೆ ಕೆಲವೇ ದಿನಗಳಲ್ಲಿ ದೇವನಹಳ್ಳಿ ವಿಧಾನಸಭಾ ಕ್ಷೇತ್ರದಲ್ಲಿ ಪ್ರಚಾರ ಆರಂಭಿಸೋದಾಗಿ ಕೆ ಎಚ್ ಮುನಿಯಪ್ಪ ಹೇಳಿಕೆ ನೀಡಿದ್ದಾರೆ. ಆದರೆ ದೇವನಹಳ್ಳಿ ಕಾಂಗ್ರೆಸ್​​ನಲ್ಲಿ ಬಂಡಾಯದ ಹೊಗೆ ಇನ್ನೂ ನಿಂತಿಲ್ಲ. ಟಿಕೆಟ್ ಆಕಾಂಕ್ಷಿ ಮಾಜಿ ಶಾಸಕ ವೆಂಕಟಸ್ವಾಮಿ ಪಕ್ಷದಿಂದ ಅಧಿಕೃತ ಅಭ್ಯರ್ಥಿ ಕೆ ಎಚ್ ಮುನಿಯಪ್ಪಗೆ ಸಂಪೂರ್ಣ ಬೆಂಬಲ, ಸಹಕಾರ ನೀಡುವುದಾಗಿ ಸಭೆಯಲ್ಲಿ ಘೋಷಿಸಿದ್ದಾರೆ.

ಕಾಂಗ್ರೆಸ್ ಪಟ್ಟಿ ಬಿಡುಗಡೆ ಮುನ್ನವೇ ಅಸಮಾಧಾನ:ಕಾಂಗ್ರೆಸ್ ಪಟ್ಟಿ ಬಿಡುಗಡೆ ಆಗುವ ಮೊದಲೇ ಕೆ ಎಚ್​ ಮುನಿಯಪ್ಪ ಅವರಿಗೆ ಟಿಕೆಟ್ ಫೈನಲ್ ಆಗಿದೆ ಎಂಬ ಸುದ್ದಿ ಹರಿದಾಡುತ್ತಿದ್ದಂತೆ ದೇವನಹಳ್ಳಿ ಕಾಂಗ್ರೆಸ್ ಮುಖಂಡರಲ್ಲಿ ಭಿನ್ನಮತ ಸ್ಪೋಟಗೊಂಡಿತು. ಟಿಕೆಟ್ ನೀಡಬೇಕು ಎಂದು ಒಂದು ಗುಂಪು ನಿಂತರೆ, ಮತ್ತೊಂದು ಗುಂಪು ಟಿಕೆಟ್ ನೀಡಬಾರದು ಎಂದು ಸಾಮೂಹಿಕ ರಾಜೀನಾಮೆ ನೀಡಿತು.

ರಾಜಣ್ಣ ನೇತೃತ್ವದ ಬಣ ಮುನಿಯಪ್ಪ ಪರ ಬ್ಯಾಟ್: ಮಾರ್ಚ್ 23 ರಂದು ಮಾಜಿ ಕೇಂದ್ರ ಸಚಿವ ಕೆ ಎಚ್ ಮುನಿಯಪ್ಪಗೆ ದೇವನಹಳ್ಳಿ ವಿಧಾನಸಭಾ ಕ್ಷೇತ್ರದ ಟಿಕೆಟ್ ನೀಡಬಾರದೆಂದು ಒಂದು ಬಣ ವಿರೋಧಿಸಿತ್ತು. ಈ ವೇಳೆ ಮತ್ತೊಂದು ಬಣ ಕಾಂಗ್ರೆಸ್​ನ ಜಿಪಂ ಮಾಜಿ ಅಧ್ಯಕ್ಷ ರಾಜಣ್ಣ ನೇತೃತ್ವದ ಬಣ ಮುನಿಯಪ್ಪ ಪರ ಬ್ಯಾಟ್ ಬೀಸಿ ದೇವನಹಳ್ಳಿ ಟಿಕೆಟ್ ಕೆ. ಎಚ್ ಮುನಿಯಪ್ಪಗೆ ನೀಡಿದ್ರೆ ಗೆಲ್ಲಲಿದೆ ಅಂತ ವಿರೋಧಿ ಬಣಕ್ಕೆ ಟಾಂಗ್ ನೀಡಿದ್ದರು.

ಸದ್ಯ ಟಿಕೆಟ್ ಘೋಷಣೆ ಆಗಿದ್ದು ಮುನಿಯಪ್ಪ ಪರ ಬಣ ಸಂತಸದಲ್ಲಿದ್ದರೆ, ವಿರೋಧಿ ಬಣ ಮತ್ತಷ್ಟು ಅಸಮಾಧಾನಗೊಂಡಿದೆ. ಈ ಹಿನ್ನೆಲೆ ಅಸಮಾಧಾನಿತ ದೇವನಹಳ್ಳಿ ಕಾಂಗ್ರೆಸ್ ಮುಖಂಡರಿಗೆ ಕೈ ನಾಯಕರು ಕರೆ ಮಾಡಿ ಮನವೊಲಿಸುವ ಪ್ರಯತ್ನ ನಡೆಸಿದ್ದಾರೆ ಎಂದು ತಿಳಿದುಬಂದಿದೆ.

ಇದನ್ನೂಓದಿ:ಅಭಿಮಾನಿಗಳ ಮುಂದೆ ಕಣ್ಣೀರು ಹಾಕಿದ ತಾಯಿ - ಮಗ: ಚುನಾವಣೆಗೆ ಸ್ಪರ್ಧಿಸಲು ಸೌರಭ್​ ಚೋಪ್ರಾ ತೀರ್ಮಾನ