ಬಾಗಲಕೋಟೆ: ಪ್ರಭಾತ ನಗರ ಕಾಲೊನಿಯಲ್ಲಿನ ಸಾರ್ವಜನಿಕ ಉದ್ಯಾನಕ್ಕೆ ನಗರಸಭೆಯ ಹಿರಿಯ ನಿವೃತ್ತ ಅಧಿಕಾರಿ ಎಸ್ಎಸ್ ಜಯಧರ್ ಬೀಗ ಜಡಿದು ತನ್ನ ಮನೆಯ ಆಸ್ತಿಯಂತೆ ಬಳಕೆ ಮಾಡಿಕೊಳ್ಳುತಿದ್ದಾರೆ ಎನ್ನುವ ಆರೋಪಗಳು ಕೇಳಿಬಂದಿವೆ.
ಪ್ರಭಾತ ನಗರದಲ್ಲಿನ ನಗರಸಭೆಯ ಉದ್ಯಾನದಲ್ಲಿ ಇಂಟರ್ ಲಾಕಿಂಗ್ ಫೆವರ್ ಮತ್ತು ಚಿಕ್ಕಮಕ್ಕಳ ಆಡುವ ಸಾಮಗ್ರಿಗಳನ್ನು ಅಳವಡಿಸುವ ನಿಟ್ಟಿನಲ್ಲಿ ಹಲವು ವರ್ಷಗಳ ಹಿಂದೆ 4 ಲಕ್ಷ ರೂ.ಗಳಲ್ಲಿ ಟೆಂಡರ್ ಆಗಿತ್ತು. ಆದರೆ, ಇಲ್ಲಿನ ಉದ್ಯಾನದಲ್ಲಿ ಇಂಟರ್ ಲಾಕಿಂಗ್ ಬ್ರಿಕ್ಸ್ಗಳನ್ನು ಮಾತ್ರ ಅಳವಡಿಸಲಾಗಿದೆ. ಆದರೆ, ಚಿಕ್ಕಮಕ್ಕಳ ಆಡುವ ಸಾಮಗ್ರಿಗಳನ್ನು ಅಳವಡಿಸಿಲ್ಲ.
ಈ ವ್ಯಾಪ್ತಿಯಲ್ಲಿ ವಾಸಿಸುವ ಕುಟುಂಬಗಳಿಗೆ ಅನುಕೂಲವಾಗುವ ನಿಟ್ಟಿನಲ್ಲಿ ಇಲ್ಲಿ ಉದ್ಯಾನ ನಿರ್ಮಿಸಲಾಗಿದೆ. ಆದರೆ ಉದ್ಯಾನಕ್ಕೆ ಹೊಂದಿಕೊಂಡಂತೆ ಇರುವ ನಗರಸಭೆಯ ನಿವೃತ್ತ ಅಧಿಕಾರಿ ಎಸ್ಎಸ್ ಜಯಧರ್ ಅವರು ಕಾಲೊನಿ ಜನರ ಮೇಲೆ ಪ್ರಭಾವ ಬೀರಿ ಉದ್ಯಾನಕ್ಕೆ ಯಾರೂ ಕೂಡ ಬಾರದಂತೆ ಕಿಲಿ ಜಡಿದು ತಮ್ಮ ಬಳಿ ಇಟ್ಟುಕೊಂಡಿದ್ದಾರೆ. ಇದರಿಂದ ಅಲ್ಲಿನ ನಿವಾಸಿಗಳು ವಾಯುವಿಹಾರಕ್ಕಾಗಿ ಬೇರೆ ಉದ್ಯಾನಕ್ಕೆ ಹೋಗುವಂತಾಗಿದೆ.
ಗಾರ್ಡನ್ ಜಯಧರ್ ವರದಂತೆ: ಈ ಉದ್ಯಾನವನ ಅವರದ್ದಂತೆ, ನಮಗೆ ಅಲ್ಲಿ ಆಟ ಆಡುವುದಕ್ಕೆ ಬಿಡುವುದಿಲ್ಲ, ಗಾರ್ಡನ್‌ನಲ್ಲಿ ಹಾವುಗಳು ಇವೆ ಎಂದು ಹೇಳಿದ್ದಾರೆ ಎಂದು ಕಾಲೊನಿಯಲ್ಲಿನ ಚಿಕ್ಕಮಕ್ಕಳು ತಿಳಿಸಿದರು. ಉದ್ಯಾನದಲ್ಲಿ ವಿದ್ಯುತ್ ಪರಿವರ್ತಕ ಅಳವಡಿಸಿರುವುದರಿಂದ ಅಪಾಯಕ್ಕೆ ಆಹ್ವಾನ ನೀಡುವಂತಾಗಿದೆ. ಕೂಡಲೇ ಅಧಿಕಾರಿಗಳು ಸಾರ್ವಜನಿಕರಿಗೆ ಉದ್ಯಾನ ಪ್ರವೇಶಕ್ಕೆ ಮುಕ್ತ ಅವಕಾಶ ಕಲ್ಪಿಸಿ ವಿದ್ಯುತ್ ಪರಿವರ್ತಕ ಸ್ಥಳಾಂತರಿಸಬೇಕು ಎಂದು ನಾಗರಿಕರು ಒತ್ತಾಯಿಸಿದ್ದಾರೆ.
ಉದ್ಯಾನದ ಸುತ್ತಮುತ್ತಲು ತಡೆಗೋಡೆ ನಿರ್ಮಿಸಿ ತಂತಿ ಬೇಲಿ ಹಾಕಿದ್ದಾರೆ, ಆದರೆ, ನಿವೃತ್ತ ಹಿರಿಯ ಅಧಿಕಾರಿಯ ಮನೆ ಪಕ್ಕದಲ್ಲಿ ಉದ್ಯಾನಕ್ಕೆ ತಡೆಗೋಡೆಯೇ ಇಲ್ಲ, ತಂತಿ ಬೇಲಿಯೂ ಇಲ್ಲ. ಮನೆಯಿಂದ ಹೋಗಿ ಬರಲು ಮೆಟ್ಟಿಲುಗಳನ್ನು ನಿರ್ಮಿಸಿಕೊಂಡಿದ್ದಾರೆ.
ಉಳ್ಳವರ ಪಾಲಾದ ಉದ್ಯಾನ: ಸಾರ್ವಜನಿಕರ ಅನಕೂಲಕ್ಕೆ ಎಂದು ನಗರಸಭೆ ನಿರ್ಮಿಸಿದ ಉದ್ಯಾನವನ್ನು ನಗರಸಭೆಯ ಹಿರಿಯ ನಿವೃತ್ತ ಅಧಿಕಾರಿ ದುರ್ಬಳಕೆ ಮಾಡಿಕೊಳ್ಳುವುದರ ಮೂಲಕ ಸಾರ್ವಜನಿಕ ಉದ್ಯಾನ ಉಳ್ಳವರ ಪಾಲಾದಂತಾಗಿದೆ.
