ಮ್ಯಾಡ್ರಿಡ್ : ಲೆಜೆಂಡರಿ ಟೆನಿಸ್ ಪ್ಲೇಯರ್ ರಾಫೆಲ್ ನಡಾಲ್ ಯುಎಸ್ ಓಪನ್ನಿಂದ ಹೊರ ಬಂದಿರುವುದಾಗಿ ಶುಕ್ರವಾರ ಘೋಷಣೆ ಮಾಡಿದ್ದಾರೆ. ಜೊತೆಗೆ ಪಾದದ ಗಾಯದಿಂದ ಬಳಲುತ್ತಿರುವುದರಿಂದ ಈ ವರ್ಷದ ಯಾವುದೇ ಟೂರ್ನಿಗಳಲ್ಲಿ ಆಡುವುದಿಲ್ಲ ಎಂದು ಅವರು ಹೇಳಿದ್ದಾರೆ.
ಫ್ರೆಂಚ್ ಓಪನ್ ಸೆಮಿಫೈನಲ್ನಲ್ಲಿ ನೊವಾಕ್ ಜೋಕೊವಿಕ್ ವಿರುದ್ಧ ಸೋಲು ಕಂಡ ಬಳಿಕ ವಿಂಬಲ್ಡನ್ ಮತ್ತು ಒಲಿಂಪಿಕ್ಸ್ನಲ್ಲಿ ಆಡಿರಲಿಲ್ಲ. ಇದೀಗ ಗಾಯದ ಕಾರಣದಿಂದ ಮತ್ತೊಂದು ಪ್ರಮುಖ ಟೂರ್ನಿಯಿಂದ ಹೊರ ಬಿದ್ದಿದ್ದಾರೆ.
ಇದನ್ನು ಘೋಷಿಸುತ್ತಿರುವುದಕ್ಕೆ ದಯವಿಟ್ಟು ಕ್ಷಮೆಯಿರಲಿ, 2021ರಲ್ಲಿ ನಾನು ಟೆನಿಸ್ನಲ್ಲಿ ಆಡಲು ಸಾಧ್ಯವಾಗುತ್ತಿಲ್ಲ. ನಿಮಗೆ ಗೊತ್ತಿದೆ. ನಾನು ಕಳೆದ ವರ್ಷದಿಂದಲೂ ನನ್ನ ಪಾದದ ನೋವಿನಿಂದ ಸಾಕಷ್ಟು ನೋವು ಅನುಭವಿಸಿದ್ದೇನೆ ಮತ್ತು ಕೆಲವು ಪ್ರಮುಖ ಟೂರ್ನಮೆಂಟ್ಗಳನ್ನು ಕಳೆದುಕೊಂಡಿದ್ದೆ ಎಂದು ತಮ್ಮ ಸಾಮಾಜಿಕ ಜಾಲತಾಣದಲ್ಲಿ ವಿಡಿಯೋ ಮೂಲಕ ತಿಳಿಸಿದ್ದಾರೆ.
ತಮ್ಮ ವೃತ್ತಿಜೀವನದಲ್ಲಿ ಬಹುಕಾಲದಿಂದಲೂ ಪಾದದ ನೋವು ತುಂಬಾ ಹೆಚ್ಚಾಗಿದೆ ಎಂದು 35 ವರ್ಷದ ನಡಾಲ್ ಹೇಳಿದ್ದಾರೆ. ಆದರೆ, ನನಗೆ ಗಾಯ ಹೊಸದೇನಲ್ಲ. 2005ರಿಂದ ನಾನು ಅನುಭವಿಸುತ್ತಿರುವ ಅದೇ ಗಾಯವಾಗಿದೆ.
ಆ ಕ್ಷಣದಲ್ಲಿ ವೈದ್ಯರು ನನ್ನ ಭವಿಷ್ಯದ ವೃತ್ತಿಜೀವನದ ಬಗ್ಗೆ ಋಣಾತ್ಮಕವಾಗಿ ತಿಳಿಸಿದ್ದರು. ಆದರೆ, ನಾನು ಕನಸು ಕಾಣಲು ಸಾಧ್ಯವಾಗದ ವೃತ್ತಿಯನ್ನು ಹೊಂದಲು ಸಾಧ್ಯವಾಯಿತು. ಹಾಗಾಗಿ, ಮತ್ತೆ ಚೇತರಿಸಿಕೊಳ್ಳುವ ವಿಶ್ವಾಸ ನನಗಿದೆ ಎಂದು ನಡಾಲ್ ತಿಳಿಸಿದ್ದಾರೆ.
ಇದನ್ನು ಓದಿ: ಆರ್ಸಿಬಿಗೆ ಆನೆಬಲ.. ಹಸರಂಗ ಸೇರಿದಂತೆ ಬೆಂಗಳೂರು ತಂಡಕ್ಕೆ ಮೂವರ ಸೇರ್ಪಡೆ..
