ನವದೆಹಲಿ: ಭಾರತದ ಗ್ರ್ಯಾಂಡ್ ಮಾಸ್ಟರ್ ವಿಶ್ವನಾಥನ್ ಆನಂದ್ 1,50,000 ಅಮೆರಿಕನ್ ಡಾಲರ್ ಬಹುಮಾನ ಮೊತ್ತದ ಲೆಜೆಂಡ್ಸ್ ಆಫ್ ಚೆಸ್ ಆನ್ಲೈನ್ ಟೂರ್ನಮೆಂಟ್ನಲ್ಲಿ 8 ಸೋಲುಗಳೊಂದಿಗೆ ಟೂರ್ನಿಯಲ್ಲಿ 9ನೇ ಸ್ಥಾನ ಪಡೆದು ಅಭಿಯಾನ ಮುಗಿಸಿದ್ದಾರೆ.
ವಿಶ್ವನಾಥನ್ ಆನಂದ್ ಮತ್ತು ಇವಾಂಚುಕ್ ನಾಲ್ಕು ಸುತ್ತಿನ ಗೇಮ್ಗಳು ಡ್ರಾನಲ್ಲಿ ಅಂತ್ಯಗೊಂಡವು. ಕೊನೆಗೆ ಅರ್ಮಗೆಡ್ಡೊನ್ (ಟೈ ಬ್ರೇಕರ್)ನಲ್ಲೂ ಡ್ರಾ ಆಗಿದ್ದರಿಂದ ಕಪ್ಪು ಕಾಯಿಗಳನ್ನು ನಡೆಸುವವರಿಗೆ ಇವಾಂಚುಕ್ ಅವರನ್ನು ವಿಜಯಿ ಎಂದು ಘೋಷಿಸಲಾಯಿತು. ಅರ್ಮಗೆಡ್ಡೊನ್ನಲ್ಲಿ ಬಿಳಿಕಾಯಿ ನಡೆಸುವವರಿಗೆ ಆಲೋಚಿಸಲು ಹೆಚ್ಚು ಕಾಲಾವಕಾಶ ನೀಡಲಾಗುತ್ತದೆ. ಆದರೆ ಪಂದ್ಯ ಡ್ರಾ ಆದರೆ ಕಪ್ಪು ಕಾಯಿ ನಡೆಸಿದವರೇ ವಿಜೇತರೆಂದು ನಿರ್ಧರಿಸಲಾಗುತ್ತದೆ.
ಈ ಮೂಲಕ 50 ವರ್ಷದ ಭಾರತದ ಚೆಸ್ ಮಾಂತ್ರಿಕ ಆನಂದ್, ಟೂರ್ನಿಯಲ್ಲಿ 9 ಪಂದ್ಯಗಳಲ್ಲಿ 8 ಸೋಲು ಹಾಗೂ ಒಂದು ಗೆಲುವು ಸಹಿತ ಕೇವಲ 7 ಅಂಕಗಳೊಡನೆ 9ನೇ ಸ್ಥಾನ ಪಡೆದು ತಮ್ಮ ಅಭಿಯಾನ ಮುಗಿಸಿದರು.
ಜರ್ಮನಿಯ ಮ್ಯಾಗ್ನಸ್ ಕಾರ್ಲ್ಸನ್ (25 ಅಂಕ) ಮೊದಲ ಸ್ಥಾನ, ರಷ್ಯಾದ ಇಯಾನ್ ನೆಪೊಮ್ನಿಯಾಚ್ಚಿ (20) 2ನೇ ಸ್ಥಾನ, ನೆದರ್ಲೆಂಡ್ನ ಅನೀಸ್ ಗಿರಿ (18) 3 ಹಾಗೂ ರಷ್ಯಾದ ಪೀಟರ್ ಸ್ವಿಡ್ಲರ್ (14) 4 ನೇ ಸ್ಥಾನ ಪಡೆದು ಸೆಮಿಫೈನಲ್ ಪ್ರವೇಶ ಪಡೆದಿದ್ದಾರೆ. ಟೂರ್ನಿಯಲ್ಲಿ 1 ಮತ್ತು 4 ಹಾಗೂ 2 ಮತ್ತು 3 ಸ್ಥಾನ ಪಡೆದವರ ಮಧ್ಯೆ ಸೆಮಿಫೈನಲ್ ಕಾದಾಟ ನಡೆಯಲಿದೆ.
