ಟೋಕಿಯೋ: ಭಾರತದ ಟೇಬಲ್ ಟೆನಿಸ್ ಆಟಗಾರ್ತಿಯರಾದ ಸುತೀರ್ಥ ಮುಖರ್ಜಿ ಮತ್ತು ಮನಿಕಾ ಬಾತ್ರಾ ಟೋಕಿಯೋ ಒಲಿಂಪಿಕ್ಸ್ನ ಮಹಿಳೆಯರ ವಿಭಾಗದಲ್ಲಿ ಮೊದಲ ಸುತ್ತಿನಲ್ಲಿ ಜಯ ಸಾಧಿಸಿದ್ದಾರೆ.
ಶನಿವಾರ ಮಧ್ಯಾಹ್ನ ಟೋಕಿಯಾ ಮೆಟ್ರೋಪಾಲಿಟನ್ ಜಿಮ್ನಲ್ಲಿ ನಡೆದ ಪಂದ್ಯದಲ್ಲಿ ಮುಖರ್ಜಿ ಸ್ವೀಡನ್ನ ಲಿಂಡಾ ಬರ್ಗ್ಸ್ಟೋರ್ಮ್ ವಿರುದ್ಧ 4-3ರ ಗೇಮ್ಗಳ ಅಂತರದಿಂದ ಗೆಲುವು ಸಾಧಿಸಿದರು. ಮುಖರ್ಜಿ 5-11, 11-9, 11-13, 9-11, 11-3, 11-9, 11-5 ಗೇಮ್ಸ್ಗಳ ಅಂತರದಿಂದ ಗೆಲುವು ಸಾಧಿಸಿದರು.
ಮೊದಲ ಗೇಮ್ನಲ್ಲಿ ಸುಲಭವಾಗಿ ಸೋಲುಕಂಡ ಮುಖರ್ಜಿ 2ನೇ ಗೇಮ್ ಗೆದ್ದು 1-1ರಲ್ಲಿ ಸಮಬಲ ಸಾಧಿಸಿದರು. ಆದರೆ, ಸ್ವೀಡನ್ ಆಟಗಾರ್ತಿ 3 ಮತ್ತು 4ನೇ ಗೇಮ್ ಗೆದ್ದು 3-1ರಲ್ಲಿ ಮುನ್ನಡೆ ಸಾಧಿಸಿದರು. ಸೋಲುವ ಅಂತದಲ್ಲಿದ್ದ ಭಾರತೀಯ ಆಟಗಾರ್ತಿ ನಂತರ ತಿರುಗಿ ಬಿದ್ದು ಸತತ ಮೂರು ಗೇಮ್ ಗೆದ್ದು ಮೊದಲ ಪಂದ್ಯದಲ್ಲಿ ಗೆಲುವು ಸಾಧಿಸಿದರು.
ಇದಕ್ಕೂ ಮುನ್ನ ಭಾರತದ ಸ್ಟಾರ್ ಪ್ಯಾಡ್ಲರ್ ಮನಿಕಾ ಬಾತ್ರ ಬ್ರಿಟನ್ನ ಟಿನ್ ಟಿನ್ ಹೋ ಅವರನ್ನು 4-0ಯಲ್ಲಿ ಗೆಲುವು ಸಾಧಿಸಿ 2ನೇ ಸುತ್ತಿಗೆ ಪ್ರವೇಶ ಪಡೆದರು. ಮನಿಕಾ 11-7, 11-6, 12-10, 11-9 ರಲ್ಲಿ ಇಂಗ್ಲೆಂಡ್ ವಿರುದ್ಧ ಪ್ರಾಬಲ್ಯಯುತ ಗೆಲುವು ಸಾಧಿಸಿದರು.
ಇಂದು ಬೆಳಗ್ಗೆ ಮಿಶ್ರ ಡಬಲ್ಸ್ನಲ್ಲಿ ಶರತ್ ಕಮಲ್ ಜೊತೆಗೂಡಿ ಮೊದಲ ಸುತ್ತಿನಲ್ಲಿ 0-4ರ ಗೇಮ್ ಅಂತರದಲ್ಲಿ ಸೋಲು ಕಂಡಿದ್ದರು. ಆದರೆ ಸಿಂಗಲ್ಸ್ನಲ್ಲಿ ತಮ್ಮ ಸಾಮರ್ಥ್ಯವನ್ನು ವೃದ್ಧಿಸಿಕೊಂಡು ಗೆಲುವು ಪಡೆದರು.
