ಸ್ಯಾಂಟಿಯಾಗೊ (ದಕ್ಷಿಣ ಅಮೆರಿಕ): ಈ ವರ್ಷ ಚಿಲಿಯಲ್ಲಿ ನಡೆಯುವ ಮಹಿಳಾ ಜೂನಿಯರ್ ಹಾಕಿ ವಿಶ್ವಕಪ್ 2023ಕ್ಕಾಗಿ ಭಾರತವು ಬೆಲ್ಜಿಯಂ, ಕೆನಡಾ ಮತ್ತು ಜರ್ಮನಿಯೊಂದಿಗೆ ಸಿ ಗುಂಪಿನಲ್ಲಿ ಸ್ಥಾನ ಪಡೆದಿದೆ. ನವೆಂಬರ್ 29ರಂದು ಮೊದಲ ದಿನದಂದು ಭಾರತವು ಕೆನಡಾ ವಿರುದ್ಧ ತನ್ನ ಅಭಿಯಾನ ಪ್ರಾರಂಭಿಸಲಿದೆ. ನವೆಂಬರ್ 29ರಿಂದ ಡಿಸೆಂಬರ್ 10ರವರೆಗೆ ನಡೆಯಲಿರುವ ಪಂದ್ಯಾವಳಿಯಲ್ಲಿ ತಲಾ ನಾಲ್ಕು ತಂಡಗಳ ನಾಲ್ಕು ಗುಂಪುಗಳಾಗಿ ವಿಂಗಡಿಸಲಾದ 16 ತಂಡಗಳಲ್ಲಿ ಭಾರತವೂ ಸೇರಿದೆ. ವಿಶ್ವದ 16 ಅತ್ಯುತ್ತಮ ತಂಡಗಳ ಪಂದ್ಯವನ್ನು ಸ್ಯಾಂಟಿಯಾಗೊದ ರಾಷ್ಟ್ರೀಯ ಕ್ರೀಡಾಂಗಣದ ಹೊಸ ಮೈದಾನದಲ್ಲಿ ಆಡಿಸಲಾಗುತ್ತದೆ.
ಪೂಲ್ ಎ ಆಸ್ಟ್ರೇಲಿಯಾ, ಚಿಲಿ, ನೆದರ್ಲ್ಯಾಂಡ್ಸ್ ಮತ್ತು ದಕ್ಷಿಣ ಆಫ್ರಿಕಾವನ್ನು ಹೊಂದಿದ್ದರೆ, ಪೂಲ್ ಬಿ ಅರ್ಜೆಂಟೀನಾ, ದಕ್ಷಿಣ ಕೊರಿಯಾ, ಸ್ಪೇನ್ ಮತ್ತು ಜಿಂಬಾಬ್ವೆಯನ್ನು ಒಳಗೊಂಡಿದೆ. ಪೂಲ್ ಡಿ ಇಂಗ್ಲೆಂಡ್, ಜಪಾನ್, ನ್ಯೂಜಿಲೆಂಡ್ ಮತ್ತು ಯುನೈಟೆಡ್ ಸ್ಟೇಟ್ಸ್ ತಂಡಗಳನ್ನು ಒಳಗೊಂಡಿದೆ. ಸ್ಪರ್ಧೆಯ ಮೊದಲ ದಿನ ಕೆನಡಾ ಎದುರಿಸುವ ಭಾರತವು ಡಿಸೆಂಬರ್ 1ರಂದು ತನ್ನ ಎರಡನೇ ಪಂದ್ಯದಲ್ಲಿ ಜರ್ಮನಿಯನ್ನು ಎದುರಿಸುತ್ತದೆ.
ಟೂರ್ನಿಯು ಏಷ್ಯಾದಿಂದ ಭಾರತ, ಜಪಾನ್ ಮತ್ತು ದಕ್ಷಿಣ ಕೊರಿಯಾ ತಂಡಗಳನ್ನು ಒಳಗೊಂಡಿದೆ. ಮಹಿಳಾ ಜೂನಿಯರ್ ಏಷ್ಯಾ ಕಪ್ 2023ರ ವಿಜೇತ ಭಾರತ ತಂಡದ ಕ್ಯಾಪ್ಟನ್ ಪ್ರೀತಿ ಮಾತನಾಡಿ, "ವಿಶ್ವಕಪ್‌ಗಾಗಿ ಪೂಲ್ಸ್ ಅನಾವರಣಗೊಂಡಿದೆ. ಇದು ಸಂತಸದ ಸುದ್ದಿ. ಜಗತ್ತಿನೆಲ್ಲೆಡೆಯ ಅತ್ಯುತ್ತಮ ಜೂನಿಯರ್ ತಂಡಗಳ ವಿರುದ್ಧ ಸ್ಪರ್ಧಿಸಲು ನಾವು ಸಜ್ಜಾಗಿದ್ದೇವೆ. ನಮ್ಮ ತಂಡಕ್ಕೆ ಇದು ರೋಮಾಂಚನಕಾರಿ ಕ್ಷಣ. ಪ್ರತಿ ಪೂಲ್ ಪ್ರತಿಭಾವಂತ ಮತ್ತು ಅಸಾಧಾರಣ ಎದುರಾಳಿಗಳಿಂದ ಕೂಡಿದೆ. ಅವರೊಂದಿಗೆ ಸ್ಪರ್ಧಿಸಲು ನಾವು ಉತ್ಸುಕರಾಗಿದ್ದೇವೆ" ಎಂದರು.
ಭಾರತ ಮಹಿಳಾ ತಂಡದ ಮುಖ್ಯ ಕೋಚ್ ಜನ್ನೆಕೆ ಸ್ಕೋಪ್‌ಮನ್, “ಏಷ್ಯಾ ಕಪ್ ಗೆದ್ದ ನಂತರ ತಂಡದ ಆತ್ಮವಿಶ್ವಾಸ ಹೆಚ್ಚಾಗಿದೆ. ಆದರೆ ನಾವು ಪ್ರಪಂಚಾದ್ಯಂತದ ಬಲಿಷ್ಠ ತಂಡಗಳನ್ನು ಎದುರಿಸಲಿರುವುದರಿಂದ ವಿಶ್ವಕಪ್ ಹೆಚ್ಚು ಸವಾಲಿನದ್ದಾಗಿರುತ್ತದೆ. ನಮ್ಮ ತಂಡದ ಕೌಶಲ್ಯವನ್ನು ಇನ್ನಷ್ಟು ವೃದ್ಧಿಸಲು ಈ ಸ್ಪರ್ಧೆ ಸಹಕಾರಿಯಾಗಲಿದೆ" ಎಂದು ಹೇಳಿದರು.
ಇದನ್ನೂ ಓದಿ: SAFF Championship: ನಾಯಕ ಚೆಟ್ರಿ ಹ್ಯಾಟ್ರಿಕ್ ಗೋಲು; ಪಾಕಿಸ್ತಾನ ವಿರುದ್ಧ ಭಾರತಕ್ಕೆ ಭರ್ಜರಿ ಜಯ
