ಬೆಂಗಳೂರು: ಆರಂಭದಲ್ಲಿ ಅಬ್ಬರಿಸಿ ಅಂಕ ಪಟ್ಟಿಯಲ್ಲಿ ಪ್ರಾಬಲ್ಯ ಸಾಧಿಸಿದ್ದ ಬೆಂಗಳೂರು ಬುಲ್ಸ್, ಮಧ್ಯಂತರದಲ್ಲಿ ವೈಫಲ್ಯ ಅನುಭಿಸಿದೆ. ಇಂದು ತನ್ನ ಕೊನೆಯ ಪಂದ್ಯವನ್ನು ಹರಿಯಾಣ ಸ್ಟೀಲರ್ಸ್ ವಿರುದ್ಧ ಆಡಲಿದ್ದು, ಪ್ಲೇ ಆಫ್ ಪ್ರವೇಶಿಸಬೇಕಾದರೆ ಗೆಲುವು ಅನಿವಾರ್ಯವಾಗಿದೆ.
ಬುಲ್ಸ್ 21 ಪಂದ್ಯಗಳಲ್ಲಿ 10 ಗೆಲುವು 9 ಸೋಲು ಹಾಗೂ 2 ಸೋಲುಗಳೊಂದಿಗೆ 61 ಅಂಕ ಪಡೆದು 6ನೇ ಸ್ಥಾನದಲ್ಲಿದೆ. ಇತ್ತ ಸ್ಟೀಲರ್ಸ್ 20 ಪಂದ್ಯಗಳಿಂದ 10 ಗೆಲುವು, 7 ಸೋಲು ಮತ್ತು 3 ಟೈ ಸಾಧಿಸಿ 4ನೇ ಸ್ಥಾನದಲ್ಲಿದೆ.
12 ತಂಡಗಳಲ್ಲಿ 6 ತಂಡಗಳು ಮಾತ್ರ ಪ್ಲೇ ಆಫ್ ಪ್ರವೇಶಿಸಲಿವೆ. ಈ ಪಂದ್ಯವನ್ನು ಗೆದ್ದರೆ ಬುಲ್ಸ್ ಅಂಕ 66 ಆಗಲಿದ್ದು, ಫ್ಲೇ ಆಫ್ ಕನಸು ಉಳಿದುಕೊಳ್ಳಲಿದೆ. ಒಂದು ವೇಳೆ ಸೋತರೆ ಟೂರ್ನಿಯಿಂದ ಹೊರ ಬೀಳಲಿದೆ. ಈಗಾಗಲೇ ತಮಿಳ್ ತಲೈವಾಸ್, ತೆಲುಗು ಟೈಟನ್ಸ್, ಬೆಂಗಾಲ್ ವಾರಿಯರ್ಸ್ ಟೂರ್ನಿಯಿಂದ ಹೊರಬಿದ್ದ ತಂಡಗಳಾಗಿವೆ.
ಇತ್ತ ಸ್ಟೀಲರ್ಸ್ ಈ ಪಂದ್ಯವನ್ನು ಗೆದ್ದರೆ 2ನೇ ಸ್ಥಾನಕ್ಕೆ ಲಗ್ಗೆಯಿಡಲಿದ್ದು, ಬಹುತೇಕ ಪ್ಲೇ ಆಫ್ ಸ್ಥಾನವನ್ನು ಖಚಿತಪಡಿಸಿಕೊಳ್ಳಲಿದೆ. ಒಂದು ವೇಳೆ ಸೋತರೂ ಕೊನೆಯ ಪಂದ್ಯ ಮತ್ತೊಂದು ಅವಕಾಶವನ್ನು ನೀಡಲಿದೆ.
ಕನ್ನಡಿಗ ಪ್ರಶಾಂತ್ ರೈ ನೇತೃತ್ವದ ಪಾಟ್ನಾ ಪೈರೇಟ್ಸ್ ಪ್ರಸ್ತುತ ಪ್ಲೇ ಆಫ್ ಸ್ಥಾನವನ್ನು ಖಚಿತಪಡಿಸಿಕೊಂಡಿರುವ ಏಕೈಕ ತಂಡವಾಗಿದೆ. ಇಂದು ಪಾಟ್ನಾ ತನ್ನ ಔಪಚಾರಿಕ ಪಂದ್ಯದಲ್ಲಿ ಪ್ಲೇ ಆಫ್ ನತ್ತ ದೃಷ್ಟಿಯಿಟ್ಟಿರುವ ದಬಾಂಗ್ ಡೆಲ್ಲಿ ವಿರುದ್ಧ ಸೆಣಸಾಡಲಿದೆ.
ಇದನ್ನೂ ಓದಿ:ರಣಜಿ ಟ್ರೋಫಿ: ಪದಾರ್ಪಣೆ ಪಂದ್ಯದ ಮೊದಲ ಎಸೆತದಲ್ಲೇ ವಿಕೆಟ್ ಪಡೆದ ರಾಜ್ ಬಾವಾ
