ಹ್ಯಾಂಗ್ಝೌ (ಚೀನಾ): 19ನೇ ಏಷ್ಯನ್ ಗೇಮ್ಸ್ನಲ್ಲಿ ಭಾರತ 107 ಪದಕಗಳನ್ನು ಗೆದ್ದು ದಾಖಲೆ ಮಾಡಿತ್ತು. 4ನೇ ಪ್ಯಾರಾ ಏಷ್ಯಾಡ್ನಲ್ಲೂ ಭಾರತೀಯ ಅಥ್ಲೀಟ್ಗಳು ಹಿಂದಿನ ಪದಕ ಸಾಧನೆ ಮೀರಿ ಗೆದ್ದು ದಾಖಲೆ ಮಾಡಿದ್ದಾರೆ. ನಾಳೆ ಪ್ಯಾರಾ ಏಷ್ಯನ್ ಗೇಮ್ಸ್ಗೆ ತೆರೆ ಬೀಳಲಿದ್ದು, 6ನೇ ದಿನವಾದ ಇಂದು ಭಾರತ 17 ಪದಕ ಬಾಚಿಕೊಂಡಿದ್ದು 7 ಚಿನ್ನ, 6 ಬೆಳ್ಳಿ ಮತ್ತು 4 ಕಂಚು ಒಳಗೊಂಡಿದೆ. ಒಟ್ಟಾರೆ ಭಾರತ ಇಲ್ಲಿಯವರೆಗೆ 99 (25 ಚಿನ್ನ, 29 ಬೆಳ್ಳಿ ಮತ್ತು 45 ಕಂಚು) ಪದಕಗಳನ್ನು ಗೆದ್ದಿದೆ.
ಏಷ್ಯನ್ ಪ್ಯಾರಾ ಗೇಮ್ಸ್ನ ನಾಲ್ಕನೇ ಆವೃತ್ತಿಗೆ ಭಾರತದಿಂದ 303 ಅಥ್ಲೀಟ್‌ಗಳನ್ನು- 191 ಪುರುಷರು ಮತ್ತು 112 ಮಹಿಳೆಯರು ತೆರಳಿದ್ದರು. ಮೊದಲ ಬಾರಿಗೆ ಇಷ್ಟು ಪ್ಯಾರಾ ಅಥ್ಲೀಟ್ಗಳು ಭಾಗವಹಿಸಿದ್ದಾರೆ. 2018ರ ಏಷ್ಯನ್ ಪ್ಯಾರಾ ಗೇಮ್ಸ್ನಲ್ಲಿ ಭಾರತವು 190 ಕ್ರೀಡಾಪಟುಗಳನ್ನು ಕಳುಹಿಸಿತ್ತು. 15 ಚಿನ್ನ ಸೇರಿದಂತೆ 72 ಪದಕಗಳನ್ನು ಗೆದ್ದುಕೊಂಡಿತ್ತು.
ಇಂದಿನ ಪದಕ ಗೆಲುವು:
ಚಿನ್ನ:
- ಮಹಿಳೆಯರ ವೈಯಕ್ತಿಕ ಆರ್ಚರಿ ಕಾಂಪೌಂಡ್ ಓಪನ್ ಸ್ಫರ್ಧೆಯಲ್ಲಿ ಶೀತಲ್ ದೇವಿ ಚಿನ್ನದ ಪದಕ ಗೆದ್ದರು.
- ಪುರುಷರ 1,500 ಮೀ. ಟಿ-38 ಪುರುಷರ 1500ಮೀ ಟಿ-38 ಸ್ಪರ್ಧೆಯಲ್ಲಿ ರಮಣ್ ಶರ್ಮಾ ಚಿನ್ನದ ಪದಕ ಗೆದ್ದಿದ್ದಾರೆ. ಈವೆಂಟ್ನಲ್ಲಿ ಅವರು 4:20.80 ಸಮಯದಲ್ಲಿ ಗುರಿ ತಲುಪಿ ಏಷ್ಯಾನ್ ಗೇಮ್ಸ್ನಲ್ಲಿ ದಾಖಲೆ ಬರೆದಿದ್ದಾರೆ.
- ಬ್ಯಾಡ್ಮಿಂಟನ್ನಲ್ಲಿ ಭಾರತ ಅದ್ಭುತ ಪ್ರದರ್ಶನ ನೀಡಿದ್ದು ಒಟ್ಟು ನಾಲ್ಕು ಚಿನ್ನದ ಪದಕ ಗೆದ್ದುಕೊಂಡಿದೆ. ಪುರುಷರ ಡಬಲ್ಸ್ ನಿತೇಶ್ ಕುಮಾರ್, ತರುಣ್ ಮತ್ತು ಸಿಂಗಲ್ಸ್ನಲ್ಲಿ ಪ್ರಮೋದ್ ಭಗತ್, ಸುಹಾಸ್ ಯತಿರಾಜ್ ಹಾಗೆಯೇ ಮಹಿಳೆಯರ ಸಿಂಗಲ್ಸ್ ಎಸ್ಯು 5 ವಿಭಾಗದಲ್ಲಿ ತುಳಸಿಮತಿ ಮುರುಗೇಶನ್ ಚಿನ್ನದ ಪದಕ ಗೆದ್ದುಕೊಂಡಿದ್ದಾರೆ.
- ಪುರುಷರ ಲಾಂಗ್ ಜಂಪ್-ಟಿ64 ವಿಭಾಗದಲ್ಲಿ 6.80ದೂರ ಜಿಗಿದು ಹೊಸ ಏಷ್ಯನ್ ರೆಕಾರ್ಡ್ ಮತ್ತು ಪ್ಯಾರಾ ಗೇಮ್ಸ್ ದಾಖಲೆ ಧರ್ಮರಾಜ್ ಸೋಲೈರಾಜ್ ಚಿನ್ನದ ಪದಕ ಗೆದ್ದಿದ್ದಾರೆ.
ಬೆಳ್ಳಿ:
- ಪ್ರಮೋದ್ ಭಗತ್ ಅವರೊಂದಿಗೆ ಇನ್ನೋರ್ವ ಭಾರತೀಯ ಅಥ್ಲೀಟ್ ನಿತೇಶ್ ಕುಮಾರ್ ಸ್ಪರ್ಧಿಸಿದ್ದು, ಬೆಳ್ಳಿ ಪದಕ ಗೆದ್ದಿದ್ದಾರೆ. ಪುರುಷರ ಡಬಲ್ಸ್ ಎಸ್ಯು 5ನಲ್ಲಿ ಚಿರಾಗ್ ಬರೆತಾ ಮತ್ತು ರಾಜ್ ಕುಮಾರ್ ಬೆಳ್ಳಿ ಗೆದ್ದಿದ್ದಾರೆ. ಮಹಿಳೆಯರ ಡಬಲ್ಸ್ ಎಸ್ಎಲ್ 3 -ಎಸ್ಯು 5 ನಲ್ಲಿ ತುಳಸಿಮತಿ ಮುರುಗೇಶನ್ ಮತ್ತು ಮಾನಸಿ ಜೋಶಿ ಬೆಳ್ಳಿ ಗೆದ್ದರು. ಬ್ಯಾಡ್ಮಿಂಟನ್ ಪುರುಷರ ಸಿಂಗಲ್ಸ್ - ಎಸ್ಹೆಚ್ 6 ವಿಭಾಗದಲ್ಲಿ ಕೃಷ್ಣಾ ನಗರ್ ಬೆಳ್ಳಿ ಗೆದ್ದಿದ್ದಾರೆ.
- ಪುರುಷರ ವೈಯಕ್ತಿಕ ಕಂಪೌಂಡ್ ಬಿಲ್ಲುಗಾರಿಕೆ ಸ್ಪರ್ಧೆಯಲ್ಲಿ ರಾಕೇಶ್ ಕುಮಾರ್ ಇರಾನ್‌ನ ಅಲಿಸಿನಾ ಮನ್ಶೇಜಾದೆ ವಿರುದ್ಧ ಹೋರಾಟದಲ್ಲಿ ನಿಕಟವಾಗಿ ಸೋಲು ಕಂಡು ಬೆಳ್ಳಿ ಗೆದ್ದರು.
- ಪುರುಷರ ಜಾವೆಲಿನ್ ಥ್ರೋ ಎಫ್-54 ಈವೆಂಟ್ನಲ್ಲಿ ಪ್ರದೀಪ್ ಕುಮಾರ್ 25.94 ಮೀಟರ್ ದೂರ ಎಸೆದು ಬೆಳ್ಳಿ ಪದಕ ಗೆದ್ದಿದ್ದಾರೆ.
ಕಂಚು:
- ಮಹಿಳೆಯರ ಡಿಸ್ಕಸ್ ಥ್ರೋ-ಎಫ್ 37/38 ರಲ್ಲಿ 22.55 ಮೀಟರ್ ಎಸೆದು ಲಕ್ಷ್ಮಿ ಕಂಚಿನ ಪದಕ ಗೆದ್ದಿದ್ದಾರೆ.
- ಪುರುಷರ ಜಾವೆಲಿನ್ ಥ್ರೋ ಎಫ್-54 ಸ್ಪರ್ಧೆಯಲ್ಲಿ ಲಕ್ಷಿತ್ ಮತ್ತು ಅಭಿಷೇಕ್ ಚಮೋಲಿ ಕಂಚಿನ ಪದಕ ಗೆದ್ದಿದ್ದಾರೆ.
- ಪುರುಷರ ಶಾಟ್‌ಪುಟ್ ಎಫ್ 37 ಈವೆಂಟ್ನಲ್ಲಿ 14.09ರ ತನ್ನ ವೈಯಕ್ತಿಕ ಅತ್ಯುತ್ತಮ ಥ್ರೋ ದಾಖಲಿಸಿ ಮನು ಕಂಚಿನ ಪದಕ ಪಡೆದರು.
- ಪ್ಯಾರಾ ಏಷ್ಯನ್ ಗೇಮ್ಸ್ನ ಈಜು ವಿಭಾಗದಲ್ಲಿ ಭಾರತಕ್ಕೆ ಮೊದಲ ಪದಕವನ್ನು ಸುಯಶ್ ಜಾಧವ್ ತಂದುಕೊಟ್ಟರು. ಪುರುಷರ 50ಮೀ ಬಟರ್‌ಫ್ಲೈ ಎಸ್ 7 ಈವೆಂಟ್ನಲ್ಲಿ 32.22 ಸಮಯದಲ್ಲಿ ಗುರಿ ತಲುಪಿ ಕಂಚು ಗೆಲ್ಲುವಲ್ಲಿ ಯಶಸ್ವಿಯಾದರು.
ಇದನ್ನೂ ಓದಿ: ಪ್ಯಾರಾ ಏಷ್ಯನ್ ಗೇಮ್ಸ್: ಬ್ಯಾಡ್ಮಿಂಟನ್ನಲ್ಲಿ ಭಾರತಕ್ಕೆ 3 ಚಿನ್ನ
